Read Paite Chin 2 KORINTHTE 12 Bible Online

2 KORINTHTE 12 - Paite Chin bible

2 KORINTHTE 12

¹Ka kiuangsak lai ding hi. Ka phattuampih ding a omkei na a, himahleh Toupa kiang a kipan kilakna leh theihsakna thu ka genzom ding hi.

²Khrist a mi khat ka thei; huai mi tuh kum sawmlehli ahita a, pumpi in hia a om ka theikei, pumpi lou in hia a om ka thei sam kei: Pathian in a thei, van thumna hial ah laktouh in a om hi.

³Huai mi mahmah, sapum in hia a om, sapum lou in hia ka theikei; Pathian in a thei hi;

⁴Paradise a laktouh a a omdan, thugen vuallouh, mihing gensiang loute a za chih ka thei hi.

⁵Mi huchibang ahihleh ka suang ding; himahleh ka hatlouhna louzaw keimah ka kisuang kei ding hi.

⁶Suan ut mah leng mihai ka hi kei ding, thu taktak ka gendek ngal a; himahleh ka kidek ding, huchilou in zaw kuapeuh in honmuh bang uleh ka lak a thu a zak sang un hon ngai thupizaw kha ding uhi.

⁷Huan theihsakna a thupi mahmah ziak a ka kingaihlet luat louhna ding in ka sa ah ling honpia ahi, Setan sawltak, khutthak nuhna dia hon zang ding ngei; huchilou in zaw ka kingailian kha ding hi.

⁸Huai thil tungtang thu ah hon awngsut theihna ding in Toupa thumvei ka ngen hi.

⁹Huan aman ka kiang ah, “Ka hehpihna nang di’n a hun hi, ka thilhihtheihna hatlouhna ah ahi hihkim a a om” a chi hi. Huchi in Khrist thilhihtheihna ka tung a a omtheihna ding in kipaktak in ka hatlouhnate ka suang zaw ding hi.

¹⁰Huaiziak in Khrist ziak a hatlouhna ah, liamna ah, taksapna ah, sawina ah, lungngaihna ah ka kipak zel hi; ka hatlouh peuhpeuh chiang in ahi ka hat zawk.

¹¹Hai ka na hita: nou hailou theilou in n’on bawl ua ahi: kei pen noumau hon pahtawi ding keive, bangmah hi kei mah leng, banglam peuh ah leng sawltaklian thuneipente ka phalou kei hi.

¹²Ka sawltaklian hih chiamtehnate kuhkalna chiteng toh chiamtehnate, thillamdangte, thilhihtheihnate in na lak ua hih ahi taktak hi.

¹³Bang lam ah ahia, saptuam pawl dangte sang a niam zaw a bawl a na omna uh? Keimah ngeingei in k’on hihbuai louhna lam thu ah a hih kei ngal leh. Huai diklouhna ah hon ngaidam un.

¹⁴Ngai un, hiai na kiang ua hong ding a ka sawm a thumveina ahi; noute k’on hihbuai kei ding, na thilneihte uh hilou in noumau hondeih ka hi zaw hi; tate’n nu leh pate ding in a kholkhawm sak ding uh ahi kei a, nu leh pate’n tate ding in a kholkhawm sak zaw ding uh ahi.

¹⁵Huan ken zaw na kha ua ding a kipaktak in ka kizangbei ding a, ka kizangbei vek lai ding hi. A kan a val a nou k’on it ziak in ken noute itna tawm zaw muhna in ka nei ahi maw?

¹⁶Himahleh kei mahmah in k’on hihbuai louhna ah kei lepchiah pil leh zekhemna a noute hon man na sa ua hiam.

¹⁷Na kiang ua ka misawl kuahiamte zang in nou k’on hamphat pih ngei ahia?

¹⁸Noute kiang a hongpai ding in Titas ka ngen a, amah toh unaupa k’on sawl hi. Titas in nou a hon hamphatpih himhim hia? Kha kibang a gamta khawm ka hi kei ua hia? Khap kibang a pai ka hi kei ua hia?

¹⁹Noumau kiang a kou leh kou kiphalam n’on sa ua hia? Khrist ah Pathian mitmuh in ahi thu ka gen uh. Himahleh deihtakte aw, bangkim noumau bawl hoihna ding ahi.

²⁰Ka hongpai chiang in bangchi hiam a ka lamet bang a k’on muh kei leh kei deih bang in n’on mu kei kha ding uh chih leh, bangchi hiam in kitainate, kihazatnate, hehnate, kilangkhennate, kigennate, kihuaukhumnate, kingaihlet luatnate, buainate a om in k’on mukha ding chih ka lau hi.

²¹Na kiang ua ka hong chiang in ka Pathian in na lak uah honhih zahlak nawn in thil hihkhialte leh thilsianglou hihte, kingaite, huk ching a kisik tuanlou in mi tampite ka kahkhum kha ding chih ka lau hi.