Read Paite Chin 2 KORINTHTE 13 Bible Online

2 KORINTHTE 13 - Paite Chin bible

2 KORINTHTE 13

¹Hiai pen na kiang a ka hong a a thumveina ding ahi. “Theihpih nih hiam, thum hiam kam ah thu chiteng hihkip in a om ding hi.”

²Ka genkholta a, a nihveina a na kiang ua ka omlai a ka gen bang in, tun ah na kiang ua omlou in, tuma lam a thil hihkhialte kiang ah leh midang tengteng kiang ah ka genkhol nawn dek hi, ka hong nawn leh ka hawi kei ding, chih;

³Khrist keimah a thugen zelpa pen ze-etna na zon ziak un, amah zaw noumau lam ah a hatlou kei a, na lak uah thilhihtheitak ahizaw hi.

⁴Amah hatlouhna ziak a kilhlup himahleh Pathian thilhihtheihna ziak in a hing gige hi. Kou leng amah ah ka hat kei uhi, himahleh, noumau lam a Pathian thilhihtheihna ziak in a kiang ah ka hingsam ding uhi.

⁵Ginna ah na omna uhiam chih noumau ngeingei ki enchian zel un. Ahihkeileh noumau ah Jesu Khrist a om chih noumau ngeingei in na thei chian kei ua hia? Deihlouh na hih kei ngal uleh.

⁶Kou deihlouh in ka omkei uh chih na thei lai ding un ka gingta hi.

⁷Huan thil himhim na hihkhelh louhna ding un Pathian kiang ah ka ngen zel uh; koute deihhuai a ka lat theihna ding uh ahi kei a, koute deihlouh in om mahle ung noute’n a kilawm peuhmah na hih theihna ding uh ahizaw hi.

⁸Thutak gum ding lou in zaw, thutak dou ding in bangmah ka hih theikei uhi.

⁹Koute ka hatlouh lai un leng noute na hat un ka kipak uhi; noumau hoihlam a na kibawlphat uh thumna a ka nget uh ahi.

¹⁰Huaiziak in hihse ding hilou a bawlhoih ding zaw a, Toupa’n thuneihna honpiak bangzel in, na kiang ua ka om chiang a nakpitak a k’on taihilh louhna ding in, na kiang ua ka omlouh lai in hiai thu ka gelh ahi.

¹¹A tawppen in, unaute aw, kipaktak in om un, na omdan uh bawlhoih unla; k’on ngetna limsak unla, khamuangtak in om unla; lungsim munkhat pu unla, kituaktakin om unla; huchi in itna leh lemna Pathian na kiang ua om ding ahi.

¹²Tawp siangthou in chibai kibuk un.

¹³Mi Siangthou tengteng in chibai a honbuk uhi.

¹⁴Toupa Jesu Khrist hehpihna, Pathian itna, Kha Siangthou kithuahpihna na vek ua kiang ah om hen, Amen.