Read Paite Chin 2 KORINTHTE 2 Bible Online

2 KORINTHTE 2 - Paite Chin bible

2 KORINTHTE 2

¹Himahleh keimah lamthu ah zaw hiai ka na tum chiltelta ahi, lungkham nadia na kiang ua hong nawn talou ding in.

²Ken k’on hih lungkham leh ka hih lungkhampen mahlou in kuan ahia kei honhih kipak ding?

³Huchi in huai mahmah ka gelh ahi, huchilou in zaw ka hong in ka kipahna dingte lak ah lungkhamna ka mu zaw kha ding a; ka kipahna zaw na vek ua kipahna a hih k’on gintaksak chiat ngal hi.

⁴Khitui tampi kekawm in lungtang a haksa leh lauthawng pipi a ka gelh ahi; hih lungkham a na omna ding uh ahi kei a, na tung ua itna thupi zawsem ka nei chih na theihzawkna ding uh ahi.

⁵Himahleh kuapeuh in mite a hih lungkham leh keimah kia honhih lungkham ahi kei a, uanggen lua bel hilou in, na vek un a honhih lungkham chiat ahizaw hi.

⁶Huchibang mi adin gawtna na piaktak uh a ki hun ahi.

⁷Huchi in na ngaidam un na khamuan zawta ding uh ahi, huchilou in zaw bang chichi hiam in mi huchibang a lungkham luatna in a valhzou kha ding.

⁸Huaiziak in amah na itna uh hihkip ding in k’on ngen hi.

⁹Hiaiziak mah in leng ka gelh ahi, bang peuhmah thu na man uleh, na man louh uh theihchetna ding in.

¹⁰Banglam peuh a mi na ngaihdam uh ken leng ka ngaidam hi; ken ka ngaihdam khitsa, bangpeuh ka na ngaihdam tak leh noumau ziak in Khrist ah ka ngaidam ta ahi.

¹¹Huchilou in zaw Setan in nuamtak honsa kha ding hi; a tup lah i haih ngal kei uhi.

¹²Huan Khrist Tanchinhoih gen ding a Troas ka tun in, Toupa ah kongkhak honsak in ka om uhi.

¹³Himahleh ka unaupa Titas ka muhlouh ziak in ka khalam ah zaw muanna himhim ka nei tuankei a, huchi in amaute kampha in ka khen a, ka pawt a, Masidonia gam ah ka paita hi.

¹⁴Himahleh Khrist vualzohna a honpi zel pa leh koute a munchih a amah theihna gimnamtui theisakpa Pathian kiang ah kipahthu om hen.

¹⁵Hotdam a omlelte leh mangthang lellelte ah Pathian adin Khrist gimnamtui ka hi uhi;

¹⁶Pawl khatte adin sihna lak ah sihna ding gimnam ka hi ua, pawl khatte din hinna lak a hinna ding in gimnam ka hi uh. Hiai bangte adin kua ahia chingzou ding?

¹⁷Mi tampi in Pathian thu mite khem a sumsinna a a zat bang un kou zaw ka zang kei uhi; Pathian sawltak hi zaw in, chihtaktak in Pathian mitmuh in Khrist ah thu ka gen zel uhi.