Read Paite Chin 2 KORINTHTE 3 Bible Online

2 KORINTHTE 3 - Paite Chin bible

2 KORINTHTE 3

¹Koumau kigenhoih pan nawn dek ka hi uhia? Ahihkeileh, na kiang ua piak ding hiam aw na kiang ua kipan hiam genhoihna lai, mi khenkhat adia a kiphamoh bang in kou din a kiphamoh sam ding ahia?

²Noute ka lai uh, na lungtang ua gelh, mi tengteng theih leh sim na hi uhi;

³Khrist lai, kou hon gelhsak laitui a gelh hilou, Pathian hing Kha gelh hi zaw, suangpek a gelh hilou, sa lungtang pek a gelh hi zaw na hi uh chih chiantak in na taklang ta uhi.

⁴Huan Pathian lam ah huchibang muanna Khrist vang in ka nei uhi;

⁵Bangpeuh koumau a kipan a pawt a sim ding in koumau kia in ka chin uh ka chi kei ua; ka chin theihna uh Pathian kiang a kipan ahizaw.

⁶Amahmah in thukhun thak nasemte hi ding in hon chingsak a; a lai thu gelhlel nasemte ding hilou in, a Kha nasemte din ahizaw hi; lai thu gelh lel in zaw ahihlum nak a, Kha in bel a hihhing hi.

⁷Mosi mel a vak ziak in Israel tate’n a mel a en gige theikei ua, huai thupina a mang hiaihiai a; sihna nasepna suang a laimal gelh bawn, huchi tel a thupi a a tun leh,

⁸Kha nasepna pen bangchi phet a thupi in a tung diam aw?

⁹Siamlouh tansakna nasepna bawn a thupi leh, diktatna nasepna a thupizaw mahmah ding ahi.

¹⁰Hih thupi a omsa in hiai ah zaw thupina himhim a neita ngal kei a, thupina thupizaw in a khuhtak ziak in.

¹¹Mangta hiaihiai bawn thupi a a tun leh, om gige ding thupi a tuam in omzaw mahmah ding ahi.

¹²Huan, huchibang lametna ka neih ziak un hangsantak apan ngamna ka nei uhi,

¹³Mosi hih bang in ka hihkei ua, aman zaw thupina mang hiaihiai man tawpna Israel tate’n a et gige louhna ding un a mai maikhuhna in a khuh a;

¹⁴A lungsim ubel hihkhauh in a om a; tuni tanpha in Thukhun Lui a sim un khuhna ngeina hawk louh in a om gige ngal a, huai khuhna Khrist ah hihmang in a omta hi.

¹⁵Himahleh tuni tanpha in Mosi Laibu a sim peuh chiang un a lungtang uah khuhna a om gige hi.

¹⁶Himahleh a lungtang uh Toupa lam a ngat peuh chiang un khuhna lakmang ahita ding hi.

¹⁷Huan Toupa huai Kha ahi a, Toupa Kha omna peuh ah noplenna a om zel hi.

¹⁸Huchi in eite zaw i vek un mai khuhlou in limlang bang a Toupa thupina tangsawn sak zel in, amah kibatpih ngeingei a om ding in hihlamdan in i om zel uhi; hiai Toupa a kipan i muh ahi; Amah tuh Kha ahi.