Read Paite Chin 2 KORINTHTE 4 Bible Online

2 KORINTHTE 4 - Paite Chin bible

2 KORINTHTE 4

¹Huaiziak in hehpihna ka muh bangzel uleh hiai nasepna ka neih ziak un ka lungke kei uhi;

²Thil zumhuai kiselte ka pampaih zawta ua, zekhemna thu ka zang kei ua, Pathian thu tuh mi khemna ding in ka zang kei ua, thutak theisak in Pathian mitmuh in michih sialehpha theihna mit ka tungsak uhi.

³Himahleh ka Tanchinhoih uh khuh a a om leh, mangthang lelte ah ahi khuh a a om;

⁴Khrist Pathian batpih leh a thupidan Tanchinhoih vak in amau a salhvak theihlouhna ding in, huaite ah hiai khovel pathian in a gingtaloute lungsim a sukmial sakta hi.

⁵Koumau thu ka genkei ua, Khrist Jesu Toupa thu ka genzaw uhi, koute leng Jesu ziak in sikha ka hih uh leng ka gen zel uhi.

⁶Jesu Khrist mel ah Pathian thupidan theihna vak honpe ding in, “Mial a kipan vak a vakkhe ding” chipa Pathian in i lungtangte a salvakta ngal hi.

⁷Himahleh thilhihtheihna thupina koute a hilou a, Pathian a a hihtheih zawkna ding in huai gou tuh leibel ah ka kem uhi.

⁸Alanglang ah nehden in ka om ua, himahleh ningkitel in ka om tuankei uhi; mangbang in ka om ua himahleh ka lungke tuankei uhi;

⁹Sawi in ka om ua, himahleh taisan in ka omkei uh; khetpuk in ka om ua, himahleh hihmang in ka omkei uh.

¹⁰Ka sapum uah chiklaipeuh in leng Jesu sihna ka pu zel ua, Jesu hinna leng ka sapum ua a lat theihna ding in.

¹¹Koute hingdam a omlaite Jesu ziak a si ding a matsak in ka om gige ua Jesu hinna leng ka sa sithei ua a lattheihna ding in.

¹²Huchi in koute ah sihna in a sem gige a, nou ah bel hinna in a sem gige hi.

¹³Himahleh “Ka ging a, huaiziak in thu ka gen ahi” chih gelhpa ginna lungsim ngei pu in, kou leng ka ging ua, thu leng ka gen uhi;

¹⁴Toupa Jesu kaithoupa’n koute leng Jesu ah hon kaithou sam ding a, noumau toh amah omna mun ah hon dingsak ding chih thei in.

¹⁵Bangkim noumau hoihna ding ahi ngal a, hehpihna mi tamzaw ziak a hihkhan a om a, Pathian thupina ding a kipahthugenna nakpitak a a khansak theihna ding in.

¹⁶Huai thu ziak in ka bah kei uhi; i pawlam mihing zawngkhal hiaihiai mahleh, i sunglam mihing pen niteng a bawlthak zel in a omzaw ahi.

¹⁷Ka gimthuakna neukha uh tu mitphiatkal sung kia a om ding in, thupina thupitak tangtawn a ding in a hon bawlsak hulhul ahi;

¹⁸Thil muhtheihte enlou in, thil muhtheihlouhte ka en zaw uhi; thil muhtheihte zaw sawtlou kal a ding ahi a, thil muhtheihlouhte bel tangtawn a ding ahizaw hi.