Read Paite Chin 2 KORINTHTE 5 Bible Online

2 KORINTHTE 5 - Paite Chin bible

2 KORINTHTE 5

¹I omna lei a puanin pen hihsiat in om mahleh van ah inn, khut a lamlouh, tangtawn a om ding, Pathian a kipan inn kip i nei uh chih i thei uhi.

²Van a kipan i omna ding silhthuah ut mahmah in hiai puanin ah thum chihtak in i thum gige uhi.

³Huchibang a silh in omleng vuaktang in i omkei ding uhi.

⁴Eite hiai puanin a i omsung in gikpua in thum petmah in i thum ngal ua, silhlou a om i ut ziak ahi kei a, silhthuah a om i ut ziak ahizaw, sithei pen hinna valh zoha a om theihna ding in.

⁵Huan huai mahmah ding a hon sutuahpa khamna Kha hon pepa Pathian ahi.

⁶Huchi in pumpi a i omlai teng in Toupa kiang ah i omkei chih thei in, muangtakin i om gige uhi.

⁷Muthei a pailou in, ginna in i paizaw zel uhi.

⁸Muangtakin i om, huan pumpi a omlou a Toupa kiang a om i utzaw hi.

⁹Huaiziak in om in, om keileng, amah kipahpih lam mi hih i tum chinten ahi.

¹⁰Michih in sapum a thilhihte a sia a pha in, i hih bangbang a i muhchiat theihna ding in, Khrist thukhenna tutphah ma ah hihlat in i omvek ding uhi.

¹¹Huchi in Toupa kihtakna dan thei in mihingte ka hanthawn zel uhi, koute hihna Pathian kiang ah latsak a om bang in, na sialehpha theihna uah leng latsak a ka om uh ka lamen uhi.

¹²Na kiang uah ka kigenhoih nawn uh ahi kei a, lungtang hilou a, dinmun lel suangte bang ahi hiam dawnna ding na neih theihna ding un kou lam ah suan theihna honbawl in ka genzaw uhi.

¹³Ka hai uleh Pathian adin ahi a; ka pil uleh noumau adin ahi.

¹⁴Khrist itna in a honsawl teitei ahi; hichi’n ka ngaihtuah uhi: mi tengteng sihsik in mi khat a si a, huaiziak in mi tengteng a si uhi;

¹⁵Mi tengteng sih sik a Khrist a sihna pen a hingte leng amau adia a hin nawnlouh ua, a sihsik ua si a thounawn ading a a hin zawkna ding uh ahi.

¹⁶Huchi a hih ziak in tuban kou zaw salam ah kuamah ka thei nawnta kei ding uh; salam ah Khrist na theita mahle ung leng; tun zaw ka theita kei uhi.

¹⁷Huchi a hih ziak in, kuapeuh Khrist a a om leh thilsiam thak a honghi a; thilluite a mangta a, ngai un, a hong thakta uhi.

¹⁸Himahleh bangkim Pathian kiang a kipan a pawt ahi a; aman Khrist ziak in amah toh kituak in honbawl a kituahna nasepna a honpia hi;

¹⁹Huchi in Pathian in Khrist ah khovel amah toh kituaknawn in a bawl a, a tatleknate uh tatlekna a sehsak lou in, kituahnawnna thu hon kemsak ahi.

²⁰Huaiziak in, Khrist palai ka hi ua, Pathian in koute zang in a hon ngen ahi; Pathian toh kituakta un aw chi in, Khrist sik in k’on ngen uhi.

²¹Amah a Pathian diktatna i hong hih theihna ding in khelhna himhim theilou amah Pathian in eite ziak in khelhna in a bawl hi.