Read Paite Chin 2 KORINTHTE 6 Bible Online

2 KORINTHTE 6 - Paite Chin bible

2 KORINTHTE 6

¹Pathian hehpihna phattuampih lou a na tan louhna ding un, amah seppih koute’n k’on ngen petmah uhi.

²“Hun kipahhuai ah k’on ngaikhia a, hotdamna ni ah k’on panpih” a chi ngal a. Ngai un, tu hun kipahuai ahi a; ngai un, tu hotdamna ni ahi!

³Ka nasepna uh dem a omlouhna ding in banglam peuh ah kuamah pukloh ding himhim ka bawl kei uhi.

⁴Pathian nasemte bang in bangkim ah mi mit tung in ka om zawzel ua, nakpi a kuhkalna ah, haksatna ah, taksapna ah, lunggimna ah,

⁵Vuakna ah, hentakna ah, buaina ah, sepgimna ah, ihmutmohna leh gilkialna ah;

⁶Siangthouna, theihna, dohtheihna, chitna, Kha Siangthou leh

⁷Itna taktak, thutakna leh Pathian thilhihtheihna nei in; taklam leh veilam a diktatna galvante zang in;

⁸Thupina leh pahtawi louhna, min gensiat leh min genhoihna ah leng;

⁹Midiktat hi ngal in mikhemte bang a bawl in ka om ua; min thangtak hi ngal in theih thamlouh bang in, si dekdek a vuak a om in, hihlup louh in ngai dih ua, ka hing uhi;

¹⁰Lungkham tak a om in, himahleh kipak gige ngal in; zawngtak hi ngal a, bangkim a midangte hih hausa in ka om uhi.

¹¹Korinthte aw, na kiang uah ka kamka ua, ka lungtang uh hihlet in a om hi.

¹²Koumau henchip in na omkei ua, noumau na thil deihlam uah na kihenchip zaw uh.

¹³Huchi in k’on piak bangbang honpe thuk sam ding in tate kiang a gen bang in ka gen ahi, nou leng na lungtangte uh zasak sam un.

¹⁴Ginglou mite toh kituak loupi a hakkol paw khawm in omkei un; diktatlouhna leh diktatna in bang ahia kikopna a neih uh? Ahihkeileh, mial leh vak in bang ahia kithuahna a neih uh?

¹⁵Belial leh Khrist in leng bang ahia kituahna a neih uh? Ahihkeileh, ginglou leh gingmi’n bang ahia tankhawm a neih uh?

¹⁶Milimte leh Pathian tempul in leng bang ahia kituahna a neih uh? Eite zaw Pathian hing tempul i hi ngal ua; “Pathian in, amau ah ka om dia, amau ah leng ka pawt dia; huan a Pathian uh ka hidia, amau leng ka mite ahi ding uh, a chih bang in.

¹⁷Huaiziak in, a lak ua kipan in hongpawt unla, a tuam in om un, thil sianglou himhim khoih kei un, Toupa’n a chi, huchi in, k’on kipahpih dia,

¹⁸Nou din na Pa uh ka hidia, nou leng kei din tanu tapa na hi ding uh, Toupa bangkim hihthei in a chi” chi in.