Read Paite Chin 2 KORINTHTE 7 Bible Online

2 KORINTHTE 7 - Paite Chin bible

2 KORINTHTE 7

¹Huchi in, deihtakte aw, huai thuchiam i neih ziak un, sa leh kha buahna tengteng ah i kisiangsak ding uh, Pathian laudansiam kawm a siangthouna hih kim in.

²Na lungtang uah mun hon awn un; kua tung mah ah ka khial kei uh, kuamah ka hihgawp kei uh, kuamah tung ah hamphat ka tum kei uhi.

³Huai siamlouh nou hong tangsak ding in ka chi kei; sih leh sih chiat a, dam leh dam chiat ding in ka lungtang uah nou k’on vom uh chih tuma zek in ka genta hi.

⁴Nou lam ah zaw ka pau ngamdan a thupi a k’on suan dan a thupi hi: khamuanna in ka dim a, ka haksatna tengteng uah nuamsa in ka dimlet hi.

⁵Masidonia gam ka tun un leng ka sa un muanna himhim a nei tuankei a, khatlam khatlam a hihgim in ka om zawta ua; pawlam kisualnate a om a; sunglam launate leng a om hi.

⁶Himahleh, nuaisiah a omte khamuanpa, Pathian in,

⁷Titas hongna in hon khamuanta a; a hongna kia in ahi kei a, na lungkham dante uh, na kahdante uh, ka tung a na phattuamngaihdante uh honhilh in, noumau a a khamuanna mah in leng a hon khamuanta ahi; huchi in, ka kipak nawn sem hi.

⁸Ka laikhak in honhih lungkham mah leng, ka kisik kei hi; a tung in ahihleh ka kisik a, huai laikhak in nou a honhih lungkham chih ka theih ziak in; himahleh sawtloukal kia ahi.

⁹Tun zaw ka kipak ahi, hih lungkham a na om ziak uh ahi kei a, kisikna ding a na lungkham ziak un ahizaw hi. Koumau ziak a bangmah na tan louhna ding un Pathian deihlam bang a hih lungkham in na om uhi.

¹⁰Pathian deihlama lungkhamna in hotdamna ding in, kisikna a bawl a, kisikhuai thil a tun kei; khovel lungkhamna in bel sihna a tunzaw hi.

¹¹Enmah un, Pathian deihlama lungkhamna in bangchibang chihtakna, bangchibang kihahsiang nopna, bangchibang kiawilouhna, bangchibang patauhna, bangchibang lunggulhna, bangchibang phattuamngaihna, bangchibang gawtna ahia nou adia hontut tak. Bangkim ah huai thu ah na siang uh chih na kihihlang ta uhi.

¹²Huchi in, na kiang uah gelh mahleng, a gilou hihpa ziak in ka gelh kei a, a gilou thuakpa ziak in leng ka gelh sam kei, ka tung ua na phattuam ngaihdan uh Pathian mitmuh a na kiang ua theihsaka a om theihna ding in ka gelh ahizaw hi.

¹³Huaiziak in, khamuan in ka omta him ua; koumau khamuanna kia lou ah leng, Titas kipahna ziak in ka kipak nawnsem ua, nou tengteng in a lungsim na hihhalhsak tak ziak un.

¹⁴A kiang ah banglam peuh ah leng noumau honsuang mahle ung, ka zahlak ngal kei ua, zahlak nak sang in bangkim, na kiang ua thu taktaka ka genzel bang un, Titas ma a k’on suan uh thu taktak a honghita ngei hi.

¹⁵Huan, na vek ua a thu na mandante uh, lau leh ling kawm a amah na kipahpih dante uh theigige in, a lungsim noumau lam ah a nakte’n nawnsem ta ahi.

¹⁶Thil bangkim ah na tung ua ka muan ziak in ka kipak ahi.