Read Paite Chin 2 KORINTHTE 9 Bible Online

2 KORINTHTE 9 - Paite Chin bible

2 KORINTHTE 9

¹Misiangthoute adia thilpiak thu zaw na kiang uah ka gelh a kiphamoh kei hi.

²Na kiman dan uh ka thei ngal a, huailam thu ah zaw kum khat ahita Akhaia gamte kimansa in a omta uh chi in Masidonia gam a mite kiang ah k’on na suang zel a; na phattuamngaihna un a lak ua mi tampi a tawk halhta hi.

³Himahleh huailam thu ah zaw k’on suanna bangmahlou a hong hih louhna ding in unaute ka hohsak zel a, ka gen bangtak a mansa a nana om theihna ding un.

⁴Huchilou in zaw Masidonia gam a mi kuate hiam in a honzuih zenzen uleh, kimanlou in hong mu le uh, noute kia hilou in noute k’on ginna uh lam ah kou leng ka zahlak kha ding uhi.

⁵Huaiziak in unaute bel nou kiang a hong masa a, hoihtak a thilpiak na chiamkholhte uh na bawlkhol ding a, nget kiphamoh in ka gingta hi, laksak teitei bang hilou a phaltak a piak bang zaw in mansa a na omna ding un.

⁶Himahleh huailam thu ah zaw, theh tawm in a at tawm ding a, theh tam in a at tam ding hi.

⁷Michih in it pipi a pelou in, piaklouh theihlouh a ngaihtuah a pe tuanlou in, a lungtang ua a tup bangzel un pe chiat uhen; Pathian in kipaktak a pemite a it hi.

⁸Huan Pathian in hehpihna chiteng in na tung uah a vukthei ahi; huchi in nou bangkim ah a hun ngial nei gige in, nasep hoih chiteng a ding in na hau thei ding uhi;

⁹“A hawmzak a; gentheite kiang ah a pia a; a diktatna tangtawn in a om gige” chih gelh bang in.

¹⁰Thehpa kiang a a chi pepa leh nek ding a tanghou pepa’n na theh ding uh chi a honpe dia a hon hih pungsak ding a, na diktatna gahte uh leng a hon hih pungsak ding.

¹¹Thilphalna chiteng kou ziak a Pathian kiang a kipahthu genna pen nei ding a, bangkim a hihhauh a om in,

¹²Hiai sepsakna nna in misiangthoute taksapna awngte a huksak kia ahi kei a, Pathian kiang a kipahthu genna tampi in, a luang let nalai ahi.

¹³Hiai nasepna a etkhiak a om in Khrist Tanchinhoih lam a na thugin uh na zuihdan uleh amau ading leh mi tengteng adia thilpiak a na thilphal dan un Pathian na hihthupi ding uh ahi;

¹⁴Amau ngei in leng na tung ua Pathian hehpihna thupi mahmah ziak in, nou adia thumsak kawm in a hon ngai mahmah uhi.

¹⁵A thilpiak genzawh vuallouh ziak in Pathian kiang ah kipahthu om hen.