Read Paite Chin GALATIATE 1 Bible Online

GALATIATE 1 - Paite Chin bible

GALATIATE 1

¹Paul, Jesu Khrist leh misi lak a kipan a kaithoupa, Pa Pathian ziak a sawltak, mihing sawlkhiak hilou, mihing vanga leng hi sam lou,

²leh ka kiang a unau om tengtengte’n, Galatia gam a saptuamte kiang ah:

³Pa Pathian leh i Toupa Jesu Khrist apan hehpihna leh lemna na kiang uah om hen;

⁴Aman i Pathian leh a Pa deihdan in, tulai khovel gilou tak lak a a hon suahtaksak theihna ding in i khelhnate ading in amah mah a hong kipeta hi;

⁵Pathian kiang ah thupina tangtawn in om hen, Amen.

⁶Khrist hehpihna ziak a nou honsampa huchi guih a Tanchinhoih tuam lam a na kisuan san uh lamdang ka sa hi;

⁷Tanchinhoih dang om ahi kei a; noumau hon hihbuai in Khrist Tanchinhoih hih lamdan ut kuate hiam a om uh ahizaw hi.

⁸Himahleh koumau hiam, van a kipan a hongsuk angel nangawn in leng, Tanchinhoih na kiang ua ka gensa pen loungal uh Tanchinhoih dang himhim hon na hilhta a om uleh hamsiat in om uhen.

⁹Tuma a ka gen bang un, tua gennawn ding ka hi. Tanchinhoih na muh pen loungal uh, Tanchinhoih dang kuapeuh in nou a honhilh leh hamsiat in om uhen.

¹⁰Ahihleh tuin mihing maipha hia ka zon Pathian a? Ahihkeileh mihing ahi maw lungtaisak ka tup? Mihing nana lungtaisak lel hitaleng, Khrist sikha ka hi kei ding hi.

¹¹Huchi in unaute aw, ka Tanchinhoih genpen mihing lamthu ahi kei chih k’on theisak hi.

¹²Mihing kiang a kipan a ka muh leng ahi kei, mi honhilh leng ka hi sam kei, Jesu Khrist kilakna ziak a mu ka hi zaw hi.

¹³Judate sabiakdan a nidanglai ka omdan na thei khinta ngal ua, huchi a Pathian saptuamte nakpitak a sawi in ka hihbuai gige hi:

¹⁴Huan ka pipute thugousiah tung a phatuam ka ngaih tuankhol ziak in Judate sabiakdan lam ah ka chipihte lak a ka khanvual tampite ka na khengta hi.

¹⁵Ka nu gilsung a kipan a hon hihtuampa leh a hehpihna ziak a honsampa Pathian in,

¹⁶Jentelte lak a a Tanchinhoih ka hilh theihna ding a a Tapa lungkimtak a keimah a a kilaksak lai in, sa leh sisan toh kidong lou in,

¹⁷Sawltak ka hih ma a sawltak nana hisate kiang a Jerusalem khua a hohtou tuanlou in, Arabia gam ah ka paimang paha; huan Damaska khua ah ka kik nawnta hi.

¹⁸Kum thum a beinung in Kifa veh ding in Jerusalem khua ah ka vahoh tou a, a kiang ah ni sawmlehnga ka tam hi.

¹⁹Sawltak dangte, Toupa unau Jakob kia loungal kuamah ka mu kei hi.

²⁰Na kiang ua ka thugelhte ngai dih ua, Pathian mitmuh ah ka zuau kei hi.

²¹Huai nung in Suria leh Silisia gamte ah ka hongpai hi.

²²Judia gam a saptuam, Khrist a omte meltheih ka hi naikei lai hi,

²³“Tuma lam a hon sawipan tuma a khatvei ginna thu a hihbuai tuh tuin a gen zawta” chih mi gen kia a za uhi.

²⁴Huan keimah ziak in Pathian a pahtawita uhi.