Read Paite Chin GALATIATE 2 Bible Online

GALATIATE 2 - Paite Chin bible

GALATIATE 2

¹Kum sawmlehli a beinung in Titas mah leng pi in, Barnaba toh Jerusalem khua ah ka va hohtou nawn hi.

²Kilakna ziak in ka va hohtou a, Jentelte kiang a Tanchinhoih ka tangkoupih amau ka vahilh a; himahleh milian deuhte a tuam in ka hilh a; huchilou in zaw a thawn in ka taikha hiam ahihkeileh taithawnta ka hi kha ding hi.

³Himahleh ka kiang a om Titas, hial leng Grik mi himahleh zeksum sak teitei in a omkei hi.

⁴Huai unau taklou, a guk a pilut a omte, sal a honlak theihna ding ua Khrist Jesu a noplenna i neih uh enkhe ding a honglutte ziak in ahi.

⁵Himahleh Tanchinhoih thutak nou ading a bittak a kep a hihtheihna ding in amau kiang ah mitphiatkal lel leng ka kipe himhim kei uhi.

⁶Hihna deuh min nei mahmahte bangchibang hihna nei mahle uh kei ading in a lamdan na a omkei hi. Pathian in kuamah a khentuam kei hi; huai min nei mahmahte thugen in bangmah hon behlap kei hi.

⁷Huchih naksang in zeksumte kiang a Tanchinhoih Peter kiang a kepsak a a om bang in zeksumlouhte kiang a Tanchinhoih kei kiang ah kepsakin a om chih a theizaw uhi.

⁸Zeksumte sawltak hi ding a Peter a sempa mah in Jentelte sawltak hi ding in kei ah a sem hi.

⁹Huan hehpihna kei kiang a piak a om a muh un, Jakob, Kifa, Johan, khuam muanhuai leh min neite’n amau bel zeksumte kiang a hoh ding leh kou Jentelte kiang a hoh di’n kei leh Barnaba kithuahna khut taklam honpe zawta uhi.

¹⁰Gentheite ka theih gige lel uh a deih ua, huai mah hih ka tum chiltel hi.

¹¹Huan Peter tuh Antiok khua a a hongpai lai in demhuai mahmah a a om ziak in a maitang ngei ah ka kalh hi.

¹²Mi kuate hiam Jakob kiang a kipan a a hongpai ma un aman Jentelte kiang ah an a ne zel hi; himahleh a hong tuntak un zeksumte a kihtak ziak in pang nawnlou in a ki koihtuamta hi.

¹³Juda dangte leng a lepchiah chiat sam ua, huchi in Barnaba hilhial leng a lepchiahna ua pimang in a om zou hial hi.

¹⁴Tanchinhoih thutak bang in a omkei uh chih ka theih in avek ua ma ah Peter kiang ah, “Nang Judami na hi ngal a, Judate om bang a omlou in Jentelte om bang a na om zawk leh bangchidan ahia Jentelte Judate om bang a na omsak teitei nak?“ ka chi hi.

¹⁵Ei zaw Jentel mikhialte hilou in, Judami him a piang i hi uhi.

¹⁶Himahleh dan thilhihte ziak in mi siamtang in a omkei hi, Jesu Khrist gin ziak kia in siamtang in omzaw uh chih i thei uhi; enleng dan thilhih ziak hilou in, Khrist ginna ziak a siamtang a i om theihna ding in, Khrist Jesu i gingta hi; dan thilhihte ziak in mihing himhim siamtang a omlou ding uh ahi.

¹⁷Ahihleh Khrist a siamtang a om tum kawmpi a eite mikhialte i na hih nak leh Khrist khelhna omsakpa hita ve maw le! Hilou hial.

¹⁸Ka thil hihsiatte ka lamnawn zel in zaw, talekpa ka hi chih ka kitheisak phet ahi ding hi.

¹⁹Pathian lam adia ka hong hin theihna ding in, kei zaw dan ziak in dan lam ah ka si khinta hi.

²⁰Khrist toh kilhden in ka omta; himahleh ka hing ahi; keimah pen ka hita kei a, Khrist keimah ah a hing ahizaw; tua sa a ka hin bel ginna a hing ka hi; Pathian Tapa, hon it a ka sik a kipepa pen ginna ah.

²¹Pathian hehpihna bangmahlou in ka bawl kei, dan ziak a diktatna a om in zaw Khrist a thawn a si ahi ding hi.