Read Paite Chin GALATIATE 3 Bible Online

GALATIATE 3 - Paite Chin bible

GALATIATE 3

¹Nou Galatia mihaite aw, kuan hon bumhai a maizen a? Na mitmuh ngei ua Jesu Khrist kilhden a kichiantak a latsak a hihhih toh.

²Hiai leltak k’on dong ding: Dan thilhihte ziak in hia Kha na muh uh, na ngaihkhiak ua na gintak ziak un?

³Hichitelin na hai umaw? Kha a pankhin ngal in, sa in na zou ding ua hia?

⁴Thil huchizah zah a thawn a thuak na hi umaw? A thawn hi taktak hita leh.

⁵Na kiang ua Kha hon pepa leh na lak ua thillamdang hihpan dan thilhihte ziak in hia a hih, na ngaihkhiak ua na gintak ziak un?

⁶“Abraham in Pathian a gingta a, huai ginna diktatna a simsak a hihtak mah bang in.”

⁷Huchi in thei un, ginna a omte Abram tate ahi uhi.

⁸Huan Laisiangthou in, “Pathian in ginna ziak in Jentelte siamtang sak ding in a kisa chih theikhol in, nangmah ah namte vualzawlsak in a om ding uh” chi in, Abraham kiang ah Tanchinhoih a na genkholta hi.

⁹Huchi in ginna a omte a ginompa Abraham toh vualzawl sak in a omsam nak uhi.

¹⁰Dan thilhih a kinga peuhmahte hamse nuai ah a om uhi; “Dan laibu a thugelh tengteng bang a hih gige lou peuhmah hamsiat in om hen,” chi a, gelh ahi.

¹¹Tuin Pathian mitmuh in kuamah dan a siamtang a omkei, “Mi diktat tuh ginna in a hing ding” chih a hih ziak in chih a lang kilkel hi.

¹²Himahleh dan ginna a kinga ahi kei; huchibang a hihpa huaite in a hing ding chih ahizaw hi.

¹³Khrist ei sik a hamsiat in a hongom a, dan hamsia a kipan in a hontan kheta hi; “Sing a khailup peuhmah hamsiat hi hen” chih gelh a hih bang in.

¹⁴Huchi a Abraham tung a vualzawlnate Khrist Jesu ziak a Jentelte tung a hongtun theih a, Kha chiam ginna ziak a i muh theihna ding in.

¹⁵Unaute aw, mihing hihdan gen leng: mihing thukhun lel leng, hihkipsa nung a phelkei ua, behlap leng a behlap ngeikei uhi.

¹⁶Abraham kiang ah leh a chisuan kiang ah thuchiamte piak a na hi. Mi tampi tungthu gen bang in, “Chisuante kiang ah” a chi kei a; mi khat tungthu gen bang in, “Nang chisuan kiang ah,” a chi zaw a, huai tuh Khrist ahi.

¹⁷Huchi in hiai ka chi ahi: huai thuchiam bangmahlou suaksak a hihmang ding in, thukhun Pathian in a na hihkipsa, a nung kum za li leh sawmthum khita hongom dan in a hihmang theikei hi.

¹⁸Gouluah ding thu dan ziak ahihleh thuchiam ziak ahita kei ding a; himahleh Pathian in Abraham kiang ah thuchiam ziak in ahi a na piak.

¹⁹Ahihkeileh bangchi thu a dan om ahia leh? Chisuan, thuchiamna a hongom masiah tatleknate ziak in behlap in a om a, angelte zang a palai khut a hihkip ahi.

²⁰Huan palai himhim mi khat lak ah palai ahi ngeikei hi; Pathian bel khat ahi.

²¹Ahihkeileh dan in Pathian thuchiam te a kalh hia? Kalh lou hial, dan mi hihhing thei himhim piak a omkhin hitaleh, diktatna dan ziak in a om ngei ding hi.

²²Himahleh Jesu Khrist gin ziak a thilchiam a gingtate kiang a piak a hihtheihna ding in Laisiangthou in khelhna nuai ah bangkim a khakkhum vekta hi.

²³Himahleh ginna a hong tunma in ginna hong kilangding ah khakkhum in dan nuai a ven i na hi uhi.

²⁴Huchi in ginna ziak a siam i tan theihna ding in dan Khrist kiang a honchilpa ahi.

²⁵Himahleh ginna a hongtun in, honchilpa nuai ah i omta kei uhi.

²⁶Khrist Jesu gin ziak in Pathian tate na hi vek uhi.

²⁷Noute Khrist a baptist lut a omsate Khrist in na kithuamta uhi.

²⁸Huai ah Judami a omkei a, Grik mi leng a omkei; huai ah sikha a omkei a, noplen leng a omkei; huai ah pasal leh numei leng a omkei hi. Khrist Jesu ah na vek un pumkhat na hi uhi.

²⁹Huan Khrist a na hih uleh Abraham suan, thuchiam bang a gouluah dingte na hi uhi.