Read Paite Chin GALATIATE 4 Bible Online

GALATIATE 4 - Paite Chin bible

GALATIATE 4

¹Himahleh huchi in ka chi: Gouluah dingpa bangkim tung ah toupa himahleh naupang a hih laiteng sikha toh bangmah in a ki lamdang kei hi;

²A pa hunseh a hongtun masiah a donpa leh a kempa nuai ah a om hi.

³Huchibang in ei leng naupang i hihlai in, khovel thubulte nuai ah sikha in i om uhi;

⁴Himahleh a hunbi a hong kim in, Pathian in a Tapa, numei suan in, dan nuai a hongsuak in a hon sawlkhia hi,

⁵Ta hihna i muh theihna ding leh dan nuai a omte tankhe ding in.

⁶Huan tate na hih ziak un Pathian in a Tapa Kha, “Abba, Pa,” chi a kikou in, i lungtang uah a honsawl hi.

⁷Huchi in sikha na hita kei ua, ta na hi zawta uhi; huan ta na hihleh Pathian vanga gouluah ding na hi hi.

⁸Himahleh Pathian na theihlouh lai un, a piandan mawng ua Pathian hilou hialte sikha na hi uhi.

⁹Tua Pathian n’on theihnung un bel, ahihkeileh Pathian theihmi na hong hihnung un chih ding ahizaw; thubul zawngkhal leh namanloute nuai a bangchidan a bawi a om nawn na ut na hi ua?

¹⁰Nite, khate, hunte, kumte na tang zel ua.

¹¹Na tung uah tha ka sengthawn kha ding chih ka lau hi.

¹²Unaute aw, k’on ngen ahi, keimah bang in om un, keileng noumau bang in ka om a, ka bangmah na hihse kei uhi.

¹³Tanchinhoih na kiang ua ka gen masakna pen ka sa hatlouh ziak ahi chih na thei uhi.

¹⁴Huan ka sa a nou dia khemna om tuh na simmawh kei ua, na kih sam kei uh; Pathian angel bang leh Khrist Jesu bang hial in n’on pakta zaw uhi.

¹⁵Vangpha na kisakna uh koi a omta ahia le? Hihtheih liai hileh na mit uh khelkhia in n’on pekhin ding uh chih k’on theihpih ahi.

¹⁶Thutak k’on hilh ziak in na melma uh ka hong hita ahia?

¹⁷Amau noute phatuamngaitak in, a hoihlam deih hilou napi in a honzawl uhi; ahi, amau adia na phattuamngaih theihna ding ua kou a kipan pawsiah a hon omsak a ut uhi.

¹⁸A tup a hoih leh a hoih lam ah chiklai peuh in phatuamngaih gige a hoih hi, na kiang ua ka omlai kia hilou in.

¹⁹Ka unaute aw, Khrist noumau a siam piching a a om masiah nauvei in ka honvei hi.

²⁰Ahi, tulaiin na kiang ua om a, ka aw hihlamdan ka ut theihdan; na tungthu uah ka mang a bang ahi.

²¹Dan nuai a om utte aw, honhilh un, dan in a gen na theikei ua hia?

²²Hichibang a gelh ahi: Abraham in tapa nih a nei a, khat sikhanu toh khat noplennu toh ahi.

²³Himahleh sikhanu lak a pen sa dan in a pianga, noplennu lak a pen bel thuchiam ziak a piang ahi.

²⁴Huai thilte etsakna ahi; huai numeite thukhun nih ahi uhi; khat Sinai tang a sikha hi ding a ta neinu, Hagar ahi.

²⁵Huan Hagar bel Arabia gam a Sinai tang ahi a, Jerusalem tulai a om toh kibang ahi, a tate toh sikha in a om uhi.

²⁶Tunglam Jerusalem bel noplen ahi; huai ngeingei eite nu ahi.

²⁷“Nang ching, ta nei ngeilou, nuam in, nang, nauvei ngeilou, kikou khia in; pasal neinu sang in lungzuangnu tate a tamzaw ngal a” chih gelh ahi.

²⁸Huchi in unaute aw, eite Isak bang in thuchiam tate i hi uhi.

²⁹Himahleh huailai bang in tuin leng ahi; sa dan a piang in Kha dan a piang a sawi ahi.

³⁰Himahleh Laisiangthou in bangchi’n a gen a? Bawinu a tapa toh hawlkhia un; bawinu tapa in noplennu tapa gou a luahpih louhding ziak in, a chi hi.

³¹Huchi in unaute aw, bawinu tate i hi kei ua, noplennu tate i hi zaw uhi.