Read Paite Chin GALATIATE 5 Bible Online

GALATIATE 5 - Paite Chin bible

GALATIATE 5

¹Noplen ding in Khrist in a hon suakta sakta, huaiziak in ding kip unla, sikha hakkol ah zaw lutnawn kei un.

²Ngai un kei Paul in na kiang ua ka gen, zek na sum uleh Khrist nou ading in bangmah phattuamna hilou ding ahi.

³Ahi a, danthu tengteng zui ding a bate a na hi uh chih zeksumte tengteng kiang ah ka theisak nawn ahi.

⁴Nou dan a siamtan tumte aw, Khrist toh kikhenta na hi uh, hehpihna na puksanta uhi.

⁵Kou bel Kha ziak in ginna in diktanna lametna ka ngak uhi.

⁶Khrist Jesu ah zeksum bangmah a phatuam kei a, zeksumlouh leng bangmah a phatuam sam kei; ginna itna a sem bel a phatuam hi.

⁷Hoihtak in na tailai un thutak zuihlou ding a kuan a hondal a ahia?

⁸Hiai zekhemna zaw nou honsampa kiang a kipan ahi kei hi.

⁹Silngou tawmchik in tanghou beupi a zelsuak hi.

¹⁰Kei ngaihtuahna banglou in na ngaihtuah lamdang tuankei ding uh chih Toupa ah k’on muang hi; himahleh nou hon hihbuaite, a kua a kua hitale uh vaihawmna a tung ua kia pen a thuak ding uh ahi.

¹¹Unaute aw, ken zeksum thu gen lailai ka hih in, bangziaka sawi a om ka hia? Huchibang a hihngal leh Kros kisuihna tuh hihmang ahita ding hi.

¹²Nou hon hihbuaite satkhiakin om vanglak le uh ka deih ahi.

¹³Nou unaute aw, sikha hilou ding in sap na hi ua; himahleh na sikha hihlouhna uh sa ading a lemtanna’n zangkei unla, itna in akua akua ading a kisepsakte hizaw un.

¹⁴Nangmah na ki-it bang in na vengte na it ding ahi, chih thu kam khat ah danthu tengteng kimsakin a om hi.

¹⁵Himahleh na kikeih ua, na kinektuah uleh na kinekgaih louhna ding un pilvang un.

¹⁶Huchi in hiai ka chi ahi, Kha ah om un, huchi in sa utna na hih tangtung kei ding uhi.

¹⁷Sa in Kha a dou nak a, Kha in leng sa a dou hi; thilhih na tupte uh na hih theihlouhna ding un huaite a kikalh uh ahi.

¹⁸Himahleh Kha pi a na om uleh dan nuai ah na omkei uhi.

¹⁹Huan sa thilhihte a kilang chian hi, huaite hiaite ahi uh: angkawmna, kingaihna, thanghuaina, hukna,

²⁰Milim biakna, bumna, huatna, kinakna, hazatna, hehna, kilanna, omtuamna, gintuamna

²¹Deihgohna, tualthahna, zumun nopna, zukhamna, huchibang thilhih chingte’n Pathian gam a tangkei ding uh chi a tuma a k’on hilhkholh mah bang in, k’on hilhkhol ahi.

²²Kha gah ahihleh, itna, kipahna, lemna, thuaktheihna, migitna, hoihna, muanhuaina,

²³Nunnemna, kidektheihnate a hizaw uhi; huchibang kalh lam in danthupiak himhim a omkei hi.

²⁴Khrist Jesu a hitate’n sa a lunggulhna leh a duhgawlna toh a kilhdenta uhi.

²⁵Kha a hing i hihleh kha mah ah i om ding uhi.

²⁶Kitoutuah chiat a, kihaza chiat in, i ki koihlian kei ding uhi.