Read Paite Chin GALATIATE 6 Bible Online

GALATIATE 6 - Paite Chin bible

GALATIATE 6

¹Unaute aw, mi takhial bangpeuh a hihlai phawka na om leh nou kha mite aw, khemna ka tuaksam kha ding e, chi a kiveng hoih kawm in, huai bang mi nunnemna lungsim toh tungding thak nawn un.

²Na puakgikte uh kidawn chiat un, huchi in Khrist danthu na zui uh ahi ding.

³Mi bangmah hiloupi in mi liankuama a kibawl leh amah kikhem tawm lel ahi.

⁴Michih in amah thilhih enchian hen; huchi a midang toh kiteha, kiuangsak lou a, amah mah a suanhuai thil a hih theihna ding in.

⁵Michih in amah puak paw ding ahi ngal a.

⁶Thuhilh a om in thil hoih tengteng a hilhpa kiang ah pe sam hen.

⁷Zekhem in omkei un; Pathian zaw zekhem a mawkbawl vual ahi kei; min a tuh peuh uh huai mah at nawn ngei ding a hih ziak un.

⁸Amah salam a tuh in sa a om siatna a at ding a, khalam a tuh in bel kha a kipan tangtawn hinna a at ding hi.

⁹Huchi in thil hoih hih chimtak keini; i lungkiak kei leh a huntak ah i at ngei ding uhi.

¹⁰Huchi in lemtang hun i neihdan bangzel in mi tengteng tung ah thil hoih hih ni, ginna inkuanpihte lak a omte tung ah hi kholdiak hen.

¹¹Keimah khut mahmah a na kiang ua laimal golpi pi a ka gelh en un.

¹²Sa a mel kilawmsak utte peuhmah in zeksum a om ding in nou a honsawl teitei nak uhi; bangmah dang ziak ahi kei a, Khrist Kros ziak a sawi a thuak louhna ding lel uh ahi.

¹³Zeksumte nangawn in leng danthu a zui tuansam kei ua, na sa uah, suan ding a neih theihna ding un na zek uh kisum leh chih a ut lel uh ahi.

¹⁴Ken zaw i Toupa Jesu Khrist Kros loungal ka suan louh ding dan, huai Kros ziak in khovel kei ading in kilhden in a om a, keileng khovel a ding in kilhden in ka om hi.

¹⁵Siamthak nawnna louzaw zeksum bangmah ahi kei a, zeksumlouh leng bangmah ahi sam kei hi.

¹⁶Huai dan bang a om peuhmahte tung ah lemna leh hehpihna, Israelte Pathian tung ngei ah om hen.

¹⁷Tuban siah kuamah in hon hihbuai nawn kei hen; ka pumpi ah Jesu chiamtehnate ka pu ngal a.

¹⁸Unaute aw, Toupa Jesu Khrist hehpihna na kha uah om hen. Amen.