Read Paite Chin EPHESATE 1 Bible Online

EPHESATE 1 - Paite Chin bible

EPHESATE 1

¹Paul, Pathian deihlama Khrist Jesu sawltak in, misiangthou Ephesa khua a om Khrist Jesu a mi ginomte kiang ah:

²Pathian i Pa leh Toupa Jesu Khrist kiang a kipan hehpihna leh lemna na kiang uah om hen.

³I Toupa Jesu Khrist Pa leh Pathian phat in om hen. Aman vanmunte ah khalam vualzawlna chiteng in eite Khrist ah a hon vualzawlta hi.

⁴Amah mai a siangthou leh dembei a om ding a leitung pian ma a eite hon teltak bang ngei in:

⁵Aman a deih leh a tup bangbang in, eite Jesu Khrist vanga a tate hi ding in, itna ziak in hon sepkhol khinta hi.

⁶Huchi a it a a honpiak hehpihna thupi mahmah pahtawina i hihtheihna ding ahi.

⁷A sisan ziak in Amah ah tatkhiakna, a hehpihna hauhdan bang a i tatleknate ngaihdamna ngei i tangta hi.

⁸Tua hehpihna chillou hial in aman eite a honpeta hi;

⁹A thiltup Khrist a a gelkhiak bangbang in a deihlam thuguk pilna leh theihsiamna ngen in eite hon theisakta hi:

¹⁰Huai a deihlam thilgel bel; hunbi hong kim chiang a, thil tengteng, van a omte leh leitung a omte Khrist a gawmkhawm a a suktuah vek ding ahi.

¹¹Amah deihlama lunggel bang a thilbangkim semkhepa tup bang ngei in, amah mah ah sehkholh a om in i gouluah ding i muta uhi.

¹²Koute, Khrist a a na lamen masate, a thupina pahtawina ding a hing ding in sehkholh in ka na omkhinta uhi.

¹³Huan noute’n thutak thu, na hotdamna Tanchinhoih uh ngaikhia a na gintak nung un amah ah chiamsa Kha Siangthou a chiamteh in na omta uhi.

¹⁴Huai Kha Siangthou bel, i gouluah ding tatna kim i luah mateng a, Pathian thupina ding a khamna ahi.

¹⁵Huaiziak in ken leng Toupa Jesu a ginna na lak ua om leh misiangthoute tengteng tung a na itna uh ka zak in,

¹⁶Ka thumnate ah na min uh lou in nou ziak a kipahthu gen ka tawp kei hi.

¹⁷I Toupa Jesu Khrist Pathian, thupina Pa’n, Amah theihna lamthu a pilna leh kilakna kha nou a honpiak theihna ding in.

¹⁸Huchi a na lungsim mitte uh hihvak a hongom a, Aman nou a honsapna lametna bang leh misiangthoute a gouluah hauhsaknate na theihna ding un.

¹⁹Huan a gingta eite a thilhihtheihna thupina tehvuallouh, huai a hatna thilhihtheihna toh a sep bangzel in,

²⁰Tua thilhihtheihna bel Khrist misi lak a kipan a a kaihthoh a, vanmun a, a taklam a a tutsak hun a,

²¹Lalnate, thuneihnate, thilhihtheihnate, vaihawmna tengteng tung leh tu khovel kia hilou a khovel hongtung ding nangawn a minsak chiteng tunglam pek ah a koihlai a a zatmah ahi.

²²Aman bangkim a khenuai ah a koih a, amah bangkim tung a Saptuam lutang in a bawl hi,

²³Huai saptuam a sapum ahi a, amah bangkim a bangkim hihdimpa tangchinna ahi.