Read Paite Chin EPHESATE 2 Bible Online

EPHESATE 2 - Paite Chin bible

EPHESATE 2

¹Nou leng na tatlekna uleh na khelhnate uh ziak a si na hihlai un a hon hihhing hi.

²Huaite ah tuma lam in hiai khovel dan bang in, huihkhua a thuneipa, tua thumanglou tate sung a semlelpa kha deihdanin na khosa uhi.

³Huai thumanglou tate lak ah eite leng tuma lam in sa duhgawlna hih in, i sa utnate bang in i omvek ua, midangte mah bang in thangpaihna ta a piang i hi uhi.

⁴Himahleh hehpihna hau Pathian in, itna thupitak a hon it ziak in,

⁵Tatleknate ziak a si i hihlai in Khrist toh a hon hihhinga, hehpihna a hotdam na hita uhi.

⁶Khrist Jesu ah amah toh a hon kaithou a, vanmunte ah amah kiang ah a hon tusak hi.

⁷Huchi a hun hongtung dingte a, Khrist Jesu a i tung a migitna nei a, a hehpihna hauhdan a etsak theihna ding in.

⁸Hehpihna ziak a ginna tawn a hotdam na hi uhi; huai leng noumau a suak ahi kei a, Pathian thilthawnpiak ahi.

⁹Thilhih ziak a hi kei, huchi kei leh min a suang kha ding hi.

¹⁰Thil hoih hihding a Khrist Jesu ah siam a om in, amah khutsuak i hi uhi; huai thil hoih hih i khosakna dan ding in Pathian in a bawlkhol ahi.

¹¹Huaiziak in tuma lam a nou sa a Jentelte, sa khut a zeksum, a chihte un zeksumlouh hon chihte uh na hi uhi.

¹²Huailai in, Khrist lou in Israelte khua leh tui toh ki midang in khovel ah lametna neilou leh Pathian lou a om in, thuchiam thukhun lak ah mikhual in na om uh chih theigige un.

¹³Tun bel, Khrist Jesu ah nou nidanglai a gamlapi a omte, Khrist sisan a hihnai in na hong omta uhi.

¹⁴Amah i kilemna ahi; aman ei nihte khat a siam in i kikal a kimelmakna banglai a hihchimta hi,

¹⁵Thusehte leh danthupiakte a sa a hihmang in; huchi a nihte Amah a mihing thak khat a siam a kilemna a bawl theihna ding in;

¹⁶Huan Kros ziak a nihte pumpi khat a Pathian toh hon kilemsakna ding in kimelmakna a hihbeita hi.

¹⁷Huan a hongpai in, nou gamlapi a omte kiang ah leh naichik a omte kiang ah leng lemna Tanchinhoih a hilh sam hi.

¹⁸Amah ziak in kha khat a Pa kiang luttheihna i nei tuaktuak uhi.

¹⁹Huchi in tu’n zaw, zin leh leng na hi nawnta kei ua, misiangthoute toh tualsung khat leh Pathian inkuanpihte na hita uhi.

²⁰Khrist Jesu ngei a ning a suang kiphamoh pen hi in, sawltakte leh zawlneite suangphum tung a lam na hi uhi;

²¹Amah ah suanglep tuam chiat kituaktaka suktuah in, Toupa ah tempul siangthou a suak hi;

²²Amah ngei ah nou leng, Kha a Pathian tenna ding a lepkhawm na hi uhi.