Read Paite Chin EPHESATE 3 Bible Online

EPHESATE 3 - Paite Chin bible

EPHESATE 3

¹Hiaiziakin kei Paul, nou Jentelte ziak a Khrist Jesu hentapa in,

²Nou ading a Pathian hehpihna nasepna piak a ka omdan na za thamta ding uhi.

³Huchi a kilakna tungtawn a Khrist thuguk ka kiang a theihsaka a omdan, tuma a tomchika ka gelh bang in.

⁴Huai na sim un Khrist thuguk ka theihdan na thei ding uhi.

⁵Tu hun a a sawltak siangthoute leh a zawlnei siangthoute kiang ah Kha theihsaka a om bang in, tuma lam in mihing tate kiang ah theihsakin a om ngeikei hi;

⁶Huai thuguk hiai ahi, Tanchinhoih ziak in Khrist Jesu ah, Jentelte gouluahpihte, pumpi hiangte, leh thuchiam tanpihte ahi uhi.

⁷A thilhihtheihna nasepdan bang a, a thawnpiak Pathian hehpihna bangzel in huai Tanchinhoih nasemtu ding a bawl ka hi.

⁸Kei, misiangthou tengteng a neupen sang a neuzaw kiang ah hiai hehpihna piak ahi: Khrist hauhsakna suikhiak vuallouh Jentelte kiang a gen ding in;

⁹Huan Pathian thil bangkim siampa a tangtawn a sel a na om, thuguk kisel bang ahia chih mi tengteng musak ding in;

¹⁰Pathian pilna chiteng van munte a kumpi vaihawmte leh thuneihnate kiang a saptuamte zang a, tu hun a theihsak a hihna ding in;

¹¹Hiai a tangtawn thiltup dungzui a Toupa Khrist Jesu a a tup leh sepdan ahi.

¹²Khrist Jesu i gin ziak in amah mah ah maingalna leh hangsantaka luttheihna i nei hi.

¹³Huchi in noute ziak a ka gimthuak ziak in lungkelou ding in ka hon ngen hi, huaite na thupina uh ahi.

¹⁴Huaiziak in i Toupa Jesu Khrist Pa ma ah ka khukdin hi;

¹⁵Lei leh van a inkuan chiteng min phuahkhiakna pa,

¹⁶A thupina hauhdan bangzel a, a Kha ziak a mihing sunglam a thilhihtheihna a hihhat a a hon omsak theihna ding in,

¹⁷Huan na lungtang ua Khrist ginna a a ten theihna ding in, nou a itna a zungkai leh kingakna nei a na om theihna ding un,

¹⁸Misiangthou tengteng toh a zatdan, a saudan, a sandan, leh a thukdan theihchian theihna leh,

¹⁹Khrist itna theih phaklouh, Pathian tangchinna chiteng bang a hihdim a na om theihna ding un.

²⁰Huan eimah a semzel thilhihtheihna bang in, i nget leh i ngaihtuah tengteng sang a thupi zawtham hihtheipa kiang ngei ah,

²¹Tangtawn in suan tengteng tan in, saptuamte leh Khrist Jesu ah thupina om hen, Amen.