Read Paite Chin EPHESATE 4 Bible Online

EPHESATE 4 - Paite Chin bible

EPHESATE 4

¹Huaiziak in noute sap a na omna utoh kikhawm a khosa ding in kei Toupa a hentapa in k’on ngen hi.

²Kingaihniamna leh migitna tengteng, thuaktheihna toh, itna a kithuakzou chiat in,

³Lemna Kha a kipumkhatna vom chinten ding in.

⁴A honsapna pen lametna mun khat a sap na hih mah bang un sapum khat leh Kha khat kia a om hi;

⁵Toupa khat, ginna khat, baptisma khat,

⁶Bangkim Pathian leh Pa khat kia a om a; amah bangkim tung ah a om a, bangkim a mu suak a, bangkim sung ah a om hi.

⁷Himahleh Khrist thilpiak tehna bangzel in hehpihna i kiang chiat uah piak in a om hi.

⁸“Huaiziak in ahi, tunglam a a kahtouh lai in matte tampi a pi a, mihingte kiang ah leng thilpiakte a pia,” a chihna.

⁹Huchi in “A kahtou” chih lei mun nuainung pente bang a a hongsuk masak phot kei leh bangchi ahita dia le?

¹⁰Hongsuk pen thil tengteng a hihdim theihna ding in, van tengteng tung pek a kahtoupa mah ahi.

¹¹Huan khenkhatte Sawltak hi ding in, khenkhatte zawlnei hi ding in, khenkhatte Tanchinhoih gen ding in, khenkhatte Pastor hi ding in, khenkhatte Sinsaktu ding in a pia hi.

¹²Hiai misiangthoute thopna ding, nasepna sepna ding, Khrist pumpi lamtouhna ding in.

¹³Huai tuh ginna leh Pathian Ta theihna lam a thukituak a, piching a, Khrist tangchinna bang a i vek ua i om masiah ading ahi.

¹⁴Huchi a mihingte diklouhna zekhemna bang a lepchiah pil a khem tawmtawm a om a thuhilhna huih chiteng a a langlang a sep leh mut lengleng naupang i hih nawnlouhna ding un.

¹⁵Itna a thutak gen a, bangkim a Amah lupen, Khrist ngei a i khanlet zawkna ding uh ahi.

¹⁶Amah a kipan pumpi tengteng kizopna chiteng sep ziak a lemtak a suktuah leh kizomkhawm a, hiang chih in sep ding dan bang a sep chiang in pumpi a khang a itna ah amah leh amah a kilam tou hi.

¹⁷Tuin hiai Toupa ah k’on theisak hi, Jentelte a lungsim ginatlouhna uh pu a a om bang un, na om nawn mahmah ding uh ahi kei hi;

¹⁸Amau a lungtang uh khauh ziak a theihtheihna neilou in Pathian hinna theihtheihna apan pawsiah in a om uhi; a theihtheihna uh hihmial in a om uhi:

¹⁹A khenggawpta ua, sianglou chiteng hihna lam a huaiham in zautatna ah a kipumpiak uhi.

²⁰Nou zaw huchibang in Khrist thu na zil kei uhi!

²¹A thu za a amah a thuhilh a omkhin na hih peuhmah uleh, Jesu a thutak a om bang in.

²²Na pianken lui uh, na nidanglai hindan uh segawpsa suahkhia unla,

²³Na lungsim Kha uah a thakin hongom unla,

²⁴Pianken thak, diktatna leh sianthouna a Pathian batpih a siampen silh un.

²⁵Huchi in zuaugen tawpsan in, noumau inveng chiat kiang ah thudik gen chiat un; kihiang tuah chiat na hi ngal uhi.

²⁶Heh unla, khelh zaw khial kei un; na hehna uh ni in tumpih kei hen.

²⁷Diabol leng mun awnsam kei un.

²⁸Guta in gu nawn kei hen; tasam kiang a piakding a neih theihna ding in, a khut a thil hoih sem in gimzaw hen.

²⁹Thu sia peuhmah na kam ua kipan in pawt kei hen; a khawkdan bangzel a bawlhoih ding in thu hoih peuhmah pawt zaw hen, a ngaikhete ading a hehpihna a hong hihtheihna ding in.

³⁰Huan Pathian Kha Siangthou hih lungkham kei un, tatna ni ading in amah ah chiamteh na hi uhi.

³¹Khatna, thangpaihna, hehna, hanna, gensiatnate leh gitlouhna tengteng tawpsan in om hen.

³²Huan kihehpih chiat a lainatna nei in om unla, Pathian in Khrista nou a hon ngaihdam bang in, noumau leng kingaidam tuahchiat un.