Read Paite Chin EPHESATE 5 Bible Online

EPHESATE 5 - Paite Chin bible

EPHESATE 5

¹Huchi in a ta deihtakte bang in Pathian omdan zuite hi un;

²Huan Khrist in hon it a, namtui ding a Pathian kiang a thilpiak ding leh kithoihna ding a i sik a a kipiak bang in itna ah om un.

³Misiangthou hita na hihman un kingaihna leh sianglou tengteng huaihamna toh, na lak uah lohkhak in omkei hen.

⁴Zahmohte, thuginalou gente, chiamnuih thu nangawn huaite a kilawmlou ahi; huaite gen sang in kipahthu genzaw un.

⁵Kingaihhat leh mi thanghuai leh mi huaiham in, mi huaiham zaw milim bemi ahi, Khrist leh Pathian gam ah tanding a neikei uh chih na thei mahmah uhi.

⁶Kuamah in thuginalou peuh in hon zekhem kei uhen; huai thilte ziak in Pathian thangpaihna thumanglou tate tung ah a tungnak hi.

⁷Huaiziak in amau kikoppih kei un.

⁸Tuma in mial na hi ua, tun zaw Toupa ah vak na hong hita uhi; vak tate bang in om un;

⁹Vak gah tuh hoihna, diktatna leh thutak tengteng ahi;

¹⁰Toupa kipahna lamtak bang ahi hiam zong un.

¹¹Huan mial thilhih gah nei ngeiloute ah leng panna neikei unla, pan naksang in a diklouh dan uh theisak zaw un.

¹²A guk a a thilhih nakte uh a gen leng a zumhuai hi.

¹³Himahleh thil bangkim a diklouh dan muhtheiha om tuh vak hihlat ahi nak hi; muhtheih a om peuhmah vak ahi ngal a.

¹⁴Huaiziak in, “Nang ihmu! hak inla, misi lak a kipan thou in. Huchi in, Khrist in vak honpe ding” chih ahi.

¹⁵Huan mihaite bang a omlou in, mipilte bang a omzaw in, na omdan uah pilvang un;

¹⁶Nite a hoihlouh ziak in hun na neih sung un a tam theipen sem un.

¹⁷Huaiziak in hai nuam kei unla, Toupa deihlam bang ahia chih theizaw un.

¹⁸Uain kham in omkei un, huai ah kideklouhna a om hi; Kha a dim in omzaw un,

¹⁹Phatna late, Pathian late, khalam late a kihoupih chiat a Toupa kiang a na lungtang tengteng ua ging kilawm bawl leh lasa in,

²⁰I Toupa Jesu Khrist min a, Pathian, Pa ngei kiang a bangkim tung a kipahthu gen gige in.

²¹Khrist laudansiamin kiniamkhiak chiat un.

²²Zite aw, Toupa kiang a na kiniamkhiak bang un, noumau pasalte kiang ah kiniamkhiak un.

²³Khrist amah ngei pumpi hondampa hi a, saptuamte lutang a hih mah bang in pasal zi lutang ahi.

²⁴Huchi in saptuamte Khrist kiang a a kiniamkhiak bang un zite bangkim ah a pasalte uh kiang ah kiniamkhiak uhen.

²⁵Pasalte aw, na zite uh it un, Khrist in saptuamte a it a, a sikua a kipiak bang in,

²⁶Huchi a amau tui a sil a thu a a hih siangthou theihna ding in;

²⁷Huchi a saptuamte nin banglou, vuailou leh huchibang thil mawngmawng puloua, siangthou leh gensiatbeia omzawa, saptuamte amah leh amah thupitak a a kipiak theihna ding in.

²⁸Huchibang in pasalte’n leng amau pumpi mah bang in amau zite a it ding uh ahi. Amah zi itpa amah ki-it ahi.

²⁹Kuamah in amah sa mah a haw ngeikei a, a vak in a deihthoh zaw hi, Khrist in saptuamte a vak a a deihthoh bang in.

³⁰Amah sa leh guh apan om, a pumpi hiangte i hi uhi.

³¹Huaiziak in pasal in a nu leh a pa paisan in a zi a len chinten ding a, a nih un sa pumkhat a hong hita ding uhi.

³²Hiai thuguk thupi ahi, himahleh ken zaw Khrist leh saptuamte thu ahi ka gen.

³³Abang abang hileh nou lak a kuapeuh in amah a ki-it bang in a zi it hen; zi mah in leng a pasal zahtak ding in pilvang hen.