Read Paite Chin EPHESATE 6 Bible Online

EPHESATE 6 - Paite Chin bible

EPHESATE 6

¹Naupangte aw, hiai thildik a hih ziak in Toupa ah na nu leh pate uh thumang un.

²“Na nu leh pa zahtak in” hiai thupiak chiam nei masapen ahi.

³“Huchi in nang ading in a hoih dia, lei ah leng na damsawt ding hi.”

⁴Huan nou pate aw, na tate uh hih thangpai kei unla, Toupa thuzohna leh hilhna ah kem zaw un.

⁵Sikhate aw, Khrist thumang bang in laudansiam leh lingkawm in lungtang khat in sa dan a na pute uh thumang un:

⁶Mihing hih kipakte maimah bang a mitmei kia venglou in, Khrist sikha bang a lungtang a Pathian deihlam hihzaw in.

⁷Mihing nasem phet hilou in, Toupa nasem bang zaw a chitaktak kawm a nasem in

⁸Michih sikha hi in noplen himahleh thil hoih a hih bangmah Toupa kiang a kipan in a ngeimah a mu nawn ding uh chih thei in.

⁹Nou heutute aw, huchibang in amau leh noumau heutupa van ah a om chih leh aman mi deihsak tuam a neikei chih thei in vau lou in a tung uah hih sam un.

¹⁰A tawppen in, Toupa leh a hatna thagui ah thilhihtheihna nei in hongom un.

¹¹Diabol zekhemnate na dou zoh theihna ding un Pathian galvan kim in kivan un.

¹²I doute zaw sa leh sisan ahi kei ua, lalnate leh, thuneihnate leh tu a omlel mial tung a khovel vaihawmte leh vanmunte a kha gilou hon omte ahizaw uhi.

¹³Huaiziak in ni hoihlou a na dou zohna ding un leh na hihzoh vek nung ua leng na din theihna ding un, Pathian galvan kim la un.

¹⁴Na kawng uh thutak a gak in, diktatna awmphaw zang in,

¹⁵Lemna Tanchinhoih vanzat na khe ua bun in ding un:

¹⁶Huaite ban ah ginna lum la unla, huai in migilou thal kuangthei tengteng na hihmit thei ding uhi.

¹⁷Huan hotdamna lukhu leh Kha namsau, Pathian thu la unla:

¹⁸Thumna leh ngetna chiteng in bangchiklai peuh in leng Kha ah thum un. Huai lam ah misiangthou tengteng ading in phatuamngai leh ngen bilbel in limsak un.

¹⁹Tanchinhoih thuguk hangsantak a theisak ding a, ka kam ka kata thu gensaka ka om theihna ding in kei ding in leng hon ngetsak un.

²⁰Ka gen ding bang hangsantaka ka gen theihna ding in. Huai Tanchinhoih palai khainiang bun ka hi.

²¹Himahleh nou leng bangchibang in ka om hiam ka tanchin na theihtheihna ding un, Taikika, Toupa a unau deihtak leh nasempa muanhuai in bangkim a honthei sak ding hi.

²²Huaiziak in amah na kiang uah k’on sawl ahi, ka tanchin uh na theihna ding uleh aman na lungtang uh a khamuan theihna ding in.

²³Pa Pathian leh Toupa Jesu Khrist kiang a kipan lemna leh ginna tel itna unaute kiang ah om hen.

²⁴I Toupa Jesu Khrist tullou a itte tengteng kiang ah hehpihna om hen, Amen.