Read Paite Chin PHILIPPITE 1 Bible Online

PHILIPPITE 1 - Paite Chin bible

PHILIPPITE 1

¹Paul leh Timothi, Khrist Jesu sikhate’n, Philippi khua a om misiangthou tengteng leh heutute leh Upate kiang ah:

²Hehpihna leh lemna i Pa Pathian leh Toupa Jesu Khrist a kipan noute tung ah om hen.

³Noute k’on phawk tengin ka Pathian kiang ah kipahthu ka gen hi.

⁴Na vek ua ding a kipaktak a thum a k’on ngetsakna teng ah.

⁵Ni masapen apan tuni tanpha a Tanchinhoih a na kithuahkhawmna ziak ua kipak in.

⁶Hiai thil mahmah gingta ing: amah nou a nasep hoih panpan Jesu ni tanpha in a zoukim vek ding.

⁷Na vek ua tungtang thu a, ken hichibang lungsim ka neih a dik ahi, ka lungtang a k’on neih ziak in; ka kolbutna leh Tanchinhoih gupna leh hihkipna thu a hehpihna ka tanpihte na hi vek uhi.

⁸Khrist Jesu hehpihna nou ngiingei ah nou k’on ngai mahmah chih Pathian in a hon theihpih hi.

⁹Noute theihna leh theihkakna toh kithuah itna a na khan semsemna ding un ka thum hi;

¹⁰Huchi a thil hoihpen na deih ua, Khrist ni a siangthou leh dembei a na om theihna ding uh ahi,

¹¹Pathian thupina leh pahtawina ding a, Jesu Khrist ziak a hongom dikna gahte a dim a na om theihna ding un.

¹²Unaute aw, tuin ka tung a thil hongtungte, Tanchinhoih a khanna dia hongtung ahi uh chih na theih uh ka deih hi.

¹³Huchi in Inpi vengpawl tengteng leh a dang tengteng kiang ah Khrist a ka kolbuhna ziak a kichianta hi.

¹⁴Ka kolbuhna a kipan a Toupa muanna nei in unaute lak a tampite lau lou a Pathian thu gen ding in nakpitak in a hong hangsan deuhdeuhta uhi.

¹⁵Khenkhatte’n hazatna ziak leh thangpaihna ziak in Khrist a tangkoupih ua; khenkhatte’n hoih a sak ziak un a gen uhi:

¹⁶Pawl khatte’n itna ziak in, Tanchinhoih dik dan gen dia om ka hihdan thei in a gen uhi;

¹⁷Himahleh pawl dang in kikhenna ding in Khrist a tangkoupih ua, a taktak hilou in ka kolbuhna a ka thuakna behlap tum in.

¹⁸Bang a poi a? Kong bangkim a Khrist a kigenkhiak phot leh, a khem hi in a taktak hileh huai ah ka kipak hi. Ahi, ka kipak zel ding hi.

¹⁹Na thumnate uh leh Jesu Khrist Kha panpihna ziak in hiai ka suahtakna hongsuak ding chih ka thei hi.

²⁰Ka gintak taktakna leh ka lametna bang in bangmah ah hihzum in ka omkei hial dia, himahleh ahi gige sa mah bang in tuin leng Khrist ka hinna hiam ka sihna hiam in ka sapum ah hangsanna kim toh hihletin a om ngeingei ding hi.

²¹Kei ding in zaw hin Khrist ahi a, sih leng punna ahi.

²²Himahleh sa a hin ka tan ding hitaleh kei din sepgim gah tampi suahna ding ahi. Himahleh ka telding ka theikei hi.

²³Nih kaltehin hamhaihin ka om hi. Paimanga Khrist kiang a om utna ka nei a; nakpitak in huai a hoih zaw hi.

²⁴Himahleh noute ziak in sa a omphot a kiphamoh zaw hi.

²⁵Huchi in hiai ginna ka neih ziak in, ka omphot ding chih ka thei hi; ginna a na khanletna ding uh leh na kipahna ding un, na vek ua lak ah ka omphot ding hi;

²⁶Huchi a na kiang ua k’ong pai nawn ding ziak a Khrist Jesu na suanna ding uh tam semsem kei a na neihna ding un.

²⁷Na omdan uh Khrist tanchinhoih toh kituak sak photphot un; hong a, nou hong mu a, ahihkeileh ka omlouh a leng kha khat a na din kipdan uh leh lungsim khat nei a Tanchinhoih thugin a na pandan uh, na tanchin uh ka zak theihna ding in.

²⁸Huan bangmah ah na melmate uh hihlau in omkei un. Huai amau ading in manna ding kichetna teltak ahi a, himahleh nou ading in hotdamna ding kichetna ahi, huai Pathian a kipan ahi.

²⁹Hiai tuh nou adia phal ahita: Khrist gingtate kia hilou a, amah ziak a na thuaksam ding uh;

³⁰Keimah a na muh uleh na zak uh huai kidouna mah na dou ding uh ahi.