Read Paite Chin PHILIPPITE 2 Bible Online

PHILIPPITE 2 - Paite Chin bible

PHILIPPITE 2

¹Huaiziak in Khrist a thu kihilh ding a om a, itna a kinep theihna ding a om a, kha toh kithuahna, kilainatna leh kihehpihna a om leh,

²huai lungsim mah pu in, hichibang itna mah nei unla, tup kibang leh lungsim khat nei in ka kipahna hon hihkim sakun.

³Kikhenna ding leh kithupisakna ziak in bangmah hih kei un; lungsim niamlak in michih in amah sang in midang hoihsa zaw hen.

⁴Na lak ua kuapeuh in amah ading kia enlou in, midang a leng en sam hen.

⁵Khrist Jesu a om hiai lungsim nei le uchin:

⁶Amah Pathian bang a om hinapi in, Pathian toh kikim a om thil khiaklah ding in a sepkei hi,

⁷Himahleh amah a hong ki awngsak a, sikha bang in a hongom a, mihing bang a bawl in a hongom hi;

⁸Huchi in mihing mel a honpu a, hong kihihneu in si ding in thu a hon mang a, ahi, Kros a sihna a hong thuak hi.

⁹Huaiziak in Pathian in amah nakpitak in a hihlianta a, min laklak a min tungnungpen a peta hi;

¹⁰Jesu min a mi tengteng a khukdin a, vantung, leitung leh leinuai a thil om tengteng leh,

¹¹lei tengteng in Jesu Khrist Pa Pathian thupina ding a Toupa ahi a chih theihna ding un.

¹²Huchi a hih ziak in, ka itte aw, ka omlai kia hilou a, ka omlouh lai a leng thu na man theihtak mah bang un, lau leh ling kawm in na hotdamna chiat uh semkhia un;

¹³Amah lungtuak dia noumau a hon utsak leh hon semsakpa Pathian ahi.

¹⁴Dawngdawng lou leh phunphun lou in thil bangkim hih un:

¹⁵Khangthak gilou leh khial, a lak ua khovel vak bang a na tennate lak uah Pathian ta gensiatbei leh siangthou,

¹⁶Hinna thu taklang na hih theihna ding un; huai a kipan a ken Khrist ni a hongtun chiang a, a thawn in ka semgim kei a, a thawnin ka taigim kei ka chih ngamna ding in.

¹⁷Ahi, na ginna thillat tung ua Pathian adia buakkhiak a om ding na hi leng ka dah kei a, na vek un k’on kipahpih hi.

¹⁸Huaiziak mah in, nou leng kipak unla; keileng hon kipahpih un.

¹⁹Abang abang hileh na omdan uh ka theih a lungmuanga ka om theihna ding in Timothi na kiang ua honsawl pah Toupa Jesu ah ka lamen hi.

²⁰Hichibang lungsim pu a, na hoihna ding uh awlmoh midang kuamah ka neikei hi.

²¹Jesu Khrist thilte zong lou in, avek un amau tuam chiat a zong uhi.

²²Himahleh aman tuh ta in a pa nna a sep bang in Tanchinhoih genzakna ah kei a hon seppih chih theihchetna amah ah na nei uhi.

²³Huaiziak in bangchi’n ka om dia chih k’on theihchet peuhpeuh chiang in amah hon sawlkhiak pah ka kilamen hi;

²⁴Himahleh keimah mah leng ka hongpah ding chih Toupa ah ka kilamen hi.

²⁵Himahleh ka sanggam leh seppih leh sepaih pih leh na taksapna ua gamtang leh sawltak Epafrodita na kiang ua honsawl kiphamoh ka sa hi;

²⁶Na vek un a hon ngai mahmah hi, a damlouh thu na zak un, a lungkham mahmah hi.

²⁷Si dektak in a china ngei a; himahleh Pathian in a tung ah hehpihna a nei a; amah tung kia leng hilou in kei tung ah leng ahi sam a, huchi a lungkhamna ka neih sawnsawn louhna ding in.

²⁸Huaiziak in amah k’on sawlteitei hi, amah na muh chiang un na kipahpih un, huchi a keileng ka dah luat louhna ding in.

²⁹Huaiziak in kipaktak in Toupa ah amah na kipahpih unla; amah na ngaisang un;

³⁰Khrist nasepna ah amah tuh a hong sideka, kei ding a na hihkim louhte uh hon hihsak a tupna lam ah a hinna a khuai dektak hi.