Read Paite Chin PHILIPPITE 3 Bible Online

PHILIPPITE 3 - Paite Chin bible

PHILIPPITE 3

¹Atawppen in unaute aw, Toupa ah kipak un. A ngeimah gelh kei ading in a chimtakhuai kei a, nou ading in a hoihzaw hi.

²Uite lak ah kiveng un, na gilou semte apan kiveng un, sa atgawp mite apan kiveng un.

³Pathian kha a bia, Khrist Jesu suang, zeksum diktak i hi uhi, huan sapum ah suanding i neikei uhi.

⁴Sapum ah suang ding chile hang kei mahmah in suanding ka neisem ding hi. Mi himhim in sapum a suanding nei a a kitheih leh ken ka neisem hi:

⁵A ni giatni a zeksum, Israel chi, Benjamin nam, Hebru mi kholdiak, dan lam a Pharisai;

⁶Phatuamngaihna lam chi lehang saptuamte sawi; dan a diktatna lam chi lehang gensiatbei ka hi.

⁷A hihi hitaleh, thil kei adia punna peuhmah Khrist ziak in manna in ka simta hi.

⁸Hitaktak hi, ka Toupa theihna manpha ziak in thil tengteng ka tanta hi. Khrist ka tan theihna ding in thil tengteng ninneng bang phet in ka sim hi.

⁹Amah a ka om theihna ding in leh dan a kinga keimah diktatna hilou a, Khrist ginna ziak a om pen, ginna a kinga Pathian apan suak diktatna nei zaw in.

¹⁰Huchi a Amah leh a thohnawnna thilhihtheihna ka theih a, a thuaknate tanpiha, a sihna a Amah batna ka neih theihna ding in.

¹¹Bang chi hiam a misi lak a kipan thohnawnna ka ngah theih khak leh chi in.

¹²Hiai tangkhin ka hi kei a, bukim khinta ka hi kei; himahleh huai mah kei a hihsak tum in ka delh teitei hi, Khrist Jesu’n kei amah a hon hihsaktak ziak in.

¹³Unaute aw, tangkhinta in ka kingai kei a: himahleh thil khat ka hih; nunglama omte mangngilh in malama ompen ka delh hi;

¹⁴Khrist Jesu a Pathian sapna sang kipahman mu ding in phak chiamna ka delh hi.

¹⁵Huaiziak in i lak ua a piching deuhdeuh bek in huchibang lungsim i nei ding uh: huchi a thil peuhpeuh a lungsim dang na neih uleh Pathian in nou a hon theisak ngei ding hi.

¹⁶I hongtunna i ngahna chiang uah muanhuai in kip peuhmah ni uh.

¹⁷Unaute aw, kei hon enton vek unla huchibanga omte zuih ding a n’on neihte uh chiamteh un.

¹⁸Mi tampi a om ua, a tanchin uh k’on hilhta hi, amau Khrist Kros melmate a hihdan uh tuin leng kapkawm in k’on hilh hi,

¹⁹Leilam thil ngaihtuahte zaw a tawpna uh siatna ahi a, a pathian uh a gilpi uh ahi a, a thupina uh leng a daina uh ahi.

²⁰I khoveng hihna uh van ah ahizaw a; huai a kipan mah in Toupa Jesu Khrist hondampa i ngak uhi.

²¹I pumpi thulimlou amah thupina pumpi toh kibang ding in, a hon bawlthak sak ding a, thil bangkim amah thuthu a a omsak theihna thilhihtheihna in.