Read Paite Chin PHILIPPITE 4 Bible Online

PHILIPPITE 4 - Paite Chin bible

PHILIPPITE 4

¹Huaiziak in ka unau it leh ngaih, ka kipahna leh ka manglukhute aw, Toupa ah kiptak in ding un, ka itte aw.

²Iodia ka thuhilh a, Sintikhe ka thuhilh a, Toupa a lungsim kibang pu ding in.

³Ahi, nou leng k’on ngen hi, hakkol puakpih muanhuaite, Tanchinhoih a ka na seppih hiai numeite, Klimen leh ka naseppih dangte hinna bu a min tuangte leng na panpih un.

⁴Toupa ah kipak gige un; ka chi nawn ding hi kipak un.

⁵Na migitna uh mi tengteng kiang ah kithei hen, Toupa a nai hi.

⁶Bangmahlou ah mangbang kei un; himahleh thil bangkim ah, thumna ngetna, kipahthugenna toh na ngetnate uh Pathian kiang ah theihsak in om hen.

⁷Huchi in Pathian muanna, lungsim himhim a theihzoh vuallouh in Khrist Jesu ah na lungtang leh na ngaihtuahnate uh a hon kepsak ngeingei ding hi.

⁸Huaikhit chiang in unaute aw, thil dik peuhmah, thil phathuai peuhmah, thil kilawm peuhmah, thil siangthou peuhmah, thil hoih peuhmah, thil minhoih peuhmah, hoihna himhim a om a, phatna ding a om leh huai thilte ngaihtuah un.

⁹Keimah a na thil theihte, tante, zakte leh muhte uh, huai thilte hih un. Huchi in muanna Pathian na kiang uah om ding hi.

¹⁰Himahleh nakpitak in Toupa ah ka kipak hi, huchi a tua kei n’on awlmohna uh a thak nawn ziak in: n’on limsak mahmah ua, himahleh hun kizen na neikei ua ahi.

¹¹Taksap ziak a hiai thu gen ka hi kei a; bangchi bang in om mah leng huai a lungkima omdan ka theikheta hi.

¹²Zawn dan ka siam a, hauhdan leng ka siam, thilchih leh thil tengteng a gilvah leh gilkiala om theihna leh niang leh tasama om theihna thuguk ka thei kheta hi.

¹³A hon hihhatpa Khrist ah thil tengteng ka hihthei hi.

¹⁴Huchi a ka mangbatna a n’on panpih ziak un na hihhoih mahmah uhi.

¹⁵Nou mahmah, nou Philippite ngei in leng Tanchinhoih omtunga kipat, Masidonia gam a kipan a ka painung nou chihlouh saptuam dang kuamah in piak leh muh lam ah, honpe kei uh chih na thei uhi.

¹⁶Thessalonika khua ah ka taksap awng n’on huksakta uhi.

¹⁷Thilpiak ka zon ziak ahi kei a, nou ading a gahpung ka zong ahizaw hi.

¹⁸A himhim in thil bangkim ka nei a, ka hau a; hihdim in ka om a noumau apat bangbanghiam, gimnamtui, kithoihna hoih, Pathian kipaksak, Epafrodita a kipan in ka na mu hi.

¹⁹Huai chiang in ka Pathian in Khrist Jesu thupina a hauhna bang in na taksap tengteng uh a honpe ngeingei ding hi.

²⁰Tuin Pathian leh i Pa uh kiang ah tangtawn, tangtawn in thupina om hen, Amen.

²¹Khrist Jesu a misiangthou tengteng chibai hon buksak un. Ka kiang a unau omte’n leng chibai honbuk uhi.

²²Misiangthou tengteng in chibai a honbuk uhi, Kaisar inkuanpihte ahi deuh tuam uhi.

²³Toupa Jesu Khrist hehpihna in hon ompih hen, Amen.