Read Paite Chin KOLOSATE 2 Bible Online

KOLOSATE 2 - Paite Chin bible

KOLOSATE 2

¹Noumau leh Laodisia khua a omte leh sa a ka mel mulou peuhmahte ading in bangchibanga thupi in ahia nou adia ka kisuk na theih uh ka ut hi.

²Pathian thuguk a theihtheih ua, theihsiamna theihchetna kim hauhna tengteng lam a, phankhawma a om ua, a lungtangte uh lungmuanga a om theihna ding in;

³Pilna leh theihna gou chiteng amah Khrist ah selguk in a om hi.

⁴Kuamah in paukamsiama a hon khemzoh louhna ding un, huaite ka gen ahi.

⁵Sa in na kiang uah om keimah leng, kipaktak a om in na kizen dan uleh Khrist ginna a na kipdan uh thei in, kha in na kiang uah ka om hi.

⁶Huaiziak in Khrist Jesu, Toupa na kipahpih bang un, amah ah om un.

⁷Amah a zungkai leh lamtouha om in, a hon zilsak bang un na ginna ua kiptak a om in, kipahthugenna hau in amah ah om un.

⁸Pilvang un, huchilou in zaw kuapeuh in Khrist thu hilou, mihing thugousiah leh khovel thubulte bang in a thupil uh leh khemna peuh in gallak in a honla kha ding uhi.

⁹Amah ah Pathian tangchinna chiteng tuh sapum nei in a om gige hi.

¹⁰Amah ah hinna tangchinna na neita ngal ua; amah vaihawmna leh thuneihna tengteng lutang ahi.

¹¹Amah ah zeksum, mihing khut a sum hilou, Khrist in a bawl zeksumna ah na pianken khelhna uh suahkhia in zeksum na hita uhi.

¹²Baptisma a amah toh vui na hita ua, huai mah ah misi lak a kipan a Pathian nasep gintak ziak in amah toh kaihthoh na hi uhi.

¹³Huan noute na tatleknate uleh na sa uh zeksum louhna a si na hi ua, noumau ngei amah toh a hon hingsak in na talekna tengteng uh a ngaidamta hi.

¹⁴I tatlekna tengteng hon ngaidama, batna lai thupiaka gelh i tung ua om eimah hondou gige a nulmangta hi. Huai ngei Kros a kilhlum in a lamangta hi.

¹⁵Vaihawmna leh thuneihnate suankhia in, huaite Kros a zou in a langtang in theihsakna in a zangta hi.

¹⁶Huchi in nek leh dawn thu ah hiam, Ankuanglui leh kha thak thu ah leh khawlni tan thu ah kuamah in hondem kei hen;

¹⁷Huaite thil hongtung ding lim ahi a, a tak Khrist ahi.

¹⁸Kuamah in amau deihthu lel a thunuailutna leh angel biakna zang in, a thilmuhte uh pansan in, a salam lungsim ziak ua kisathei mawkmawk in, na kipahman uh hon suhsak kei hen.

¹⁹Lutang len chinten lou in a om uhi. Amah a kipan in sapum a pum in a guhtuah leh thaguite a vak leh zopkhawm a om in, Pathian khansak bangzel in a khang hi.

²⁰Khovel thubulte Khrist kiang a na sihsan uleh, bang achia khovel a khosa bang a thupiakte lak a na ki pelut na hi ua?

²¹Lawng ken, Chiam ken, Khoih ken, chihte,

²²Mihingte thuchiam leh zilsakna huchibang thil tengteng zatkawma mangthang ding hilou uhiam?

²³Hiai thilte bawltawm biakna leh thunuailutna taklou leh, pumpi engbawlna ah zaw hihtuak hileh a kilawm na a, himahleh sa deihlam zuih khamna ah bangmah a phatuam kei hi.