Read Paite Chin KOLOSATE 3 Bible Online

KOLOSATE 3 - Paite Chin bible

KOLOSATE 3

¹Huchi in Khrist toh kaihthoh khawma na omtak man un, tunglam a Pathian taklam a tu Khrist omna a thil omte zong un.

²Tunglam a thil omte ah na lungsim uh nga un, lei a thil omte a ngalou in.

³Na sita ua, tuin na hinna uh Pathian ah Khrist toh selin a om hi.

⁴Khrist i hinna uh a hong kilak chiang in nou leng amah kiang ah thupi in na kilak sam ding uhi.

⁵Huchi in noumau a leilam thildeihna omte that un, kingaihna, nitna, hukna, utna gilou, huaihamna; huaihamna milim biakna ahi.

⁶Huai thilte ziak in Pathian thangpaihna thumanglou tate tung ah a tung nak ahi:

⁷Nou leng tuma lam a huai thilte a na nuntak lai un, huaite ah na khosa uhi.

⁸Tuin zaw nou leng hiai tengteng, hehna, thangpaihna, huatna, gensiatna, na kam ua pau zahmohte koihmang un.

⁹Zuau kihilh tuah kei un, mihing lui a thilhih toh na suahkheta uhi.

¹⁰Mihing thak in na kivanta ngal ua; huai mihing thak a siampa batpih bang a theihna a siamthak in a om lellel hi.

¹¹Huai ah Grik mi leh Judami, zeksum leh sumlouh, melmak mite, Skithia mite, sikhate, noplente leng a omkei a; Khrist bangkim hizaw in, bangkim ah a om behlap lai hi.

¹²Huaiziak in Pathian mitel, misiangthou leh deihtakte bang in lainatna lungtang, migitna, kingaihniamna, thunuailutna, thuakzohna in kivan un.

¹³Kuapeuh in kua tung ah leng thubuai nei hile u chin, kithuakzou chiat in, kingaidam tuah unla, Toupa’n a hon ngaihdam tak bang in kingaidam tuah chiat un.

¹⁴Huan huai tengteng tung ah itna silhthuah un; huai in thil bangkim kituaktakin a gakkhawm hi.

¹⁵Huan Khrist khamuanna in na lungtang uah vaihawm hen, huai ding in pumpi khat a sap na hi ua, kipahna dan leng thei un.

¹⁶Khrist thu a hauhna teng toh noumau ah dimsak kiihkeih un, pilna chiteng a kisinsak leh kihilh tuaha om a, kipahna lungtang toh Pathian kiang a phatna late, Pathian late, khalam late sa in om un.

¹⁷Huan na hih peuhmah uh thugen ah leh thilhih ah amah ziak a Pa Pathian kiang a kipahthugen kawm in Toupa Jesu min in hihvek un.

¹⁸Zite aw, Toupa ah a kilawm hun bangzel in na pasalte uh kiang ah kingainiam un.

¹⁹Pasalte aw, na zite uh it unla, a lak uah hanhat kei un.

²⁰Naupangte aw, bangkim ah na nu uleh na pate uh thumang un, huai tuh Toupa pahtak lam ahi.

²¹Pate aw, na tate uh hihnuak kei un, huchilou in zaw a lunglel kha ding uhi.

²²Sikhate aw, sa a na heutute uh thu bangkim ah mang un, mihing hihkipak lelte bang a mitmei nasem hilou in, lungtang sa khat a Toupa kihta kawm in,

²³Na hih peuhmah uh, mihing ading bang hihlou in, Toupa ading zaw in kilawp tak in hih un;

²⁴Toupa a kipan in a itna gouluah ding na mu ding uh chih thei in: Toupa Khrist nasem na hi uhi.

²⁵Thil diklou hihpan a thil diklou hihman a mu nawn ding hi; mi khentuamna a om ngal kei hi.