Read Paite Chin KOLOSATE 4 Bible Online

KOLOSATE 4 - Paite Chin bible

KOLOSATE 4

¹Heutute aw, nou leng van ah heutupa na neih uh thei in, na sikhate uh tung ah adik atang leh a kilawm hih un.

²Thum gige unla, kipahthu genkawm in kiveng gige un.

³Khrist thuguk gen ding a Pathian in thu adia kong a hon honsak theihna ding in kou leng hon thumsak un, huai thu ziak a hen a om ka hi.

⁴Ka gen ding bangtak a ka genkhiak theihna ding in.

⁵Hun na neih sung un a tam theipen semzel unla, pawlam mite lak ah piltak in om un.

⁶Michih bangchibang a dawn ding hiam chih na theihna ding un na paukamsuak uh chisoh, hehpihna hi gige hen.

⁷Toupa a unau ngaihtak, nasempa muanhuai, sikha hihpih Tukika in ka tanchin tengteng nou a hon theisak ding hi.

⁸Hiaiziakin, ka tanchin uh na theihna ding uleh, na lungtang uh a hon khamuan theihna ding in amah na kiang uah k’on sawl hi;

⁹Onesima, unau muanhuai leh gaihtak noumau lak a mi mah toh a hongding uhi. Amau hiai lam a thil omdan tengteng a hon theisak ding uhi.

¹⁰Aristarkhas, ka hentakpih pa’n nou chibai a honbuk hi. Mark, Barnaba tupa in leng, chibai a honbuk hi, amah tungtang thu ah thupiakte na mu uh; na kiang ua a hongpai leh, na kipahpih un;

¹¹Jesu, Justa a chih un chibai nou a honbuk hi. Huaite zeksum mi ahi ua, huaite kia Pathian gam thu lam ah ka seppih leh a hon khamuante ahi uhi.

¹²Epaphra noumau lak a mi mah, Khrist Jesu sikha in chibai nou a honbuk hi, aman Pathian deihlam phot pichin leh gingta bikbeka na din theihna ding un, a thumna ah nou ading in a kisuk gige hi.

¹³Noumau ading, Laodisia khua a omte ading leh Hierapoli khua a omte ading in phatuam a ngai mahmah chih ka theihpih hi.

¹⁴Luke, Daktor ngaihtak leh Dema in chibai a honbuk uhi.

¹⁵Laodisia khuaa unau omte leh Nympha leh a inn a saptuamte chibai honbuk sakun.

¹⁶Huan hiai laikhak na lak ua na sim nung un, Laodisia saptuamte lak ah leng simsakun; nou leng Laodisia khua a pen nana sim sam ding uhi.

¹⁷Huan Arkippa kiang ah “Nasepna Toupa a i muhpen tangtun ding in pilvang in,” na chi un.

¹⁸Kei Paul in keimah khut ngeia hiai chibaibukna k’on gelh ahi. Ka kolbulhte theigige un. Hehpihna na kiang uah om hen, Amen.