Read Paite Chin 1 THESSALONIKATE 2 Bible Online

1 THESSALONIKATE 2 - Paite Chin bible

1 THESSALONIKATE 2

¹Unaute aw, na lak ua ka honglutna uh a thawnkei chih noumau mah in na thei uhi;

²A thawn hih naksang in huai malam in na theihsa bang un, Philippi khua ah gimthuak leh zumhuaitaka bawl a ka om nung un, dalna thupitak lak ah leng Pathian Tanchinhoih na kiang ua gen ding in ka Pathian uah hangsanna ka nei zaw uhi.

³Ka thugen uh zekhemna a pawt ahi kei a, sianlouhna a suak leng ahi kei a, zekhemna in leng ahi sam kei hi;

⁴Tanchinhoih kepsaka om ding a Pathian hoihsak mi ka hih bang ngei un, mihing hih kipak ding hilou a, ka lungtang uh ze-etpa Pathian hih kipak zaw in thu ka genzel uh a hizaw hi.

⁵Chiklaipeuh in kimaitang phatna thu leh huaiham khuhmangna ding thu ka zong ngeikei uh chih na thei ua; Pathian leng hon theihpihpa ahi.

⁶Khrist sawltak ka hihziak un mi ading in chimtakhuaipi hithei mahle ung, mihing lak ah nou lak ah leh midangte lak ah leng pahtawina ka zong ngei sam kei uhi.

⁷Nu naupom, amah tate deihthoh tak a kem bang in, na lak uah nunnem tak in ka omzaw uhi.

⁸Huchi in ittaka nou k’on lunggulh tuntun ziak un, Pathian Tanchinhoih kia hilou in, koumau hinna leng honpiak hial ka ut mahmah uhi.

⁹Unaute aw, ka sep tawldan uleh ka sepgim dan uh na theigige uhi; na lak uah kuamah ka suk tuailuai louhna ding un, sun leh zana nasem in Pathian Tanchinhoih nou k’on hilh uhi.

¹⁰Nou gingtate tung a siangthou tak, diktak leh dembei a ka omdan uh a hon theihpihte Pathian leh noute na hi uhi.

¹¹Na theih mah bang un, Pa’n amah tate tung a ahihbanga hanthawn leh khamuan in nou k’on theisak uhi,

¹²Amah gam leh thupina a nou hon samlutpa Pathian mi hidia kilawm him a na hin theihna ding un.

¹³Hiai ziak in tawplou in Pathian kiang ah kipahthu ka gen uhi, Pathian thu koumau a kipan a na muh uh, na sanlai un leng, mihing thu bang in na sangkei ua; Pathian thu a hihna bang a na sanzawk ziak un; huai Pathian a ahi hima, gingtami noumau sung a semzel mah ahi.

¹⁴Nou unaute aw, Judia gam a Pathian saptuam pawl Khrist Jesu a omte zuite na hi ua, amau Judate lak a thuak bang un, nou leng noumau gam mite lak ah na thuak sam uhi.

¹⁵Huai Judate’n Toupa Jesu leh zawlneite leng a that ua, kou leng a hon delhkhia ua, Pathian a sulungkim kei ua, mi tengteng a kalh nak uhi.

¹⁶Jentelte hotdam a hihtheihna ding ua a kiang ua thugen a kham ua, a khelhna uh hihdim gige ding in; himahleh thangpaihna a khawk theihtawpin a tung uah a hongtungta hi.

¹⁷Himahleh unaute aw, sawtlou kal a dia noumau toh lungtang lam a kikhenlou a, sapum lam kia a kikhen a i omtakdih ziak in, kilawptaka na mel uh mu ding in ka pang sansan uhi.

¹⁸Na kiang ua hongpai ka tum chiltel ngal ua; kei, Paul ngei in leng hongpai ka tum tuma, himahleh Setan in a hondal nak hi.

¹⁹Ka lametna uleh, ka kipahna uhiam, ka lallukhu suan uhiam bang ahia leh? A hongpai chiang in i Toupa Jesu ma ah noumau mah na hi kei ding ua hia?

²⁰Noumau mah ka suan uleh ka kipahna uh na hi uhi.