Read Paite Chin 1 THESSALONIKATE 3 Bible Online

1 THESSALONIKATE 3 - Paite Chin bible

1 THESSALONIKATE 3

¹Huchi in ka thuakzoh taklouh phet un Athen khua ah koumau kia nutsiah in om le ung hoih ka sa uhi,

²I unaupa uh Timothi bel Khrist Tanchinhoih lam a Pathian nasempa, nou hon hihkip ding leh na ginna lam ua nou hon khamuan ding in k’on sawlta uhi.

³Hiai gimthuaknate ziak a kuamah a linlouhna ding un. Hiaite bang thuak ding a seh ka hi uh chih noumau ngei in na thei uhi.

⁴Na kiang ua ka omlai un gimthuak ding ka hi uh chih k’on hilhkholh bang ngei in a tungta hi, huai na thei uhi.

⁵Hiaiziakin ka thuakzoh taklouh nung in, khempa’n nou a hon khempuk kha dia, ka sepgimna uh a thawn kha ding chi in, na gindan uh ka na theihna ding in mi k’on sawl ahi.

⁶Himahleh Timothi noumau a kipan a tua ka kiang uh a hongtun in, honmuh ka ut mahmah bang un nou leng honmuh ut mahmah in hehpih in n’on theigige uh chih leh, na ginna uh leh na itna tanchin uh kipahhuai takmai a hon puak hi.

⁷Huchi a hih ziak in unaute aw, ka mangbatna uleh gimthuakna tengteng uah na ginna ziak un na tungthu uah lungmuan in ka omta uhi;

⁸Toupa a na dinkip phot uleh tun tuh ka hingta uhi.

⁹I Pathian ma ah na tung ua ka kipahna tengteng ziak un noumau lamthu ah Pathian kiang ah bangchibang in kipahthu ka gen thei zawzen ding uam aw?

¹⁰Na mel uh ka muh theihna ding uleh na ginna lam ua na taksap awng uh k’on huksak theihna ding un sun leh zan in nakpitak in ka thum uhi.

¹¹Huchi in Pathian, i Pa leh Toupa Jesu’n leng, koute na kiang uah honpi tung hen.

¹²Huan noumau lam a itna ka hauh bang un, noumau khat leh khat na ki-ittuah chiatna uleh mi tengteng na itna uh hon khangsak zelpa Toupa’n hon hausak semsem hen;

¹³Huchi a i Toupa Jesu a misiangthou tengteng toh a hongpai chiang a, i Pathian leh a Pa ma a na lungtangte uh siangthouna lam ah gensiatbeia om ding a nou a hon hihkip theihna ding in.