Read Paite Chin 1 THESSALONIKATE 4 Bible Online

1 THESSALONIKATE 4 - Paite Chin bible

1 THESSALONIKATE 4

¹Huchi in unaute aw, a tawppenin na omdan ding uleh Pathian na hih kipahdan ding uh tua na omdan bang uh, koumau a kipan a na lak bang un na hauhsemna ding un Toupa Jesu ah k’on ngen un k’on hanthawn uhi.

²Toupa Jesu ziak in bangthute ahia k’on piak uh na thei uhi.

³Pathian deihlama na siangthouna ding uh hiai ahi: kingaih tawpsan unla;

⁴Siangthou leh zahtakhuai in noumau zi chiat kem un

⁵Pathian theilou Jentelte bang a huk lamsang a utlou in.

⁶Huai lam thu ah zaw kuamah takhial in a unau tung ah thil hoihlou hihkei hen; Toupa huchibang thilhihte tengteng phulapa a hih ziak in k’on hilhkhol un k’on theisak khinta uhi.

⁷Pathian in sianglou ding in a honsam kei a, siangthou ding in a honsam zaw hi.

⁸Huaiziak in a nial in mihing nial ahi kei a, Pathian nou a Kha Siangthou hon pepa nial ahizaw hi.

⁹A hihangin unaute itdan lamthu gelhsak na kiphamoh kei ua, ki-ittuah chiat ding in noumau ngei Pathian hilh in na omta uhi.

¹⁰Masidonia gam a unau om tengteng tung ah huai na hihngei uhi. Himahleh unaute aw, na hauhsemna ding un k’on hanthawn uhi;

¹¹Kamsim deuh a om leh noumau nna chiat limsak leh, thu ka honpiak bang ua na khut ngei ua sep na tupna ding un;

¹²Huchi in pawlam mite tung ah kilawmtakin na om thei ding ua, bangmah na tasam kei ding uhi.

¹³Himahleh unaute aw, midang lametna himhim neiloute bang a na lungkham louhna ding un, ihmute tungtang na theihlouh uh ka deihkei uhi.

¹⁴Jesu a si a, a thou nawnta chih i gingta ua, huchibang in Jesu a ihmu khinsate Pathian in amah toh a hon tonpih ding ahi.

¹⁵Hiai Toupa thu in na kiang uah ka gen uhi; eite Toupa hongpai pha a hingdam a na omlaite’n, ihmu khinsate i makhelh kei hial ding hi, chih.

¹⁶Toupa mahmah kikou aw toh, angel tungnungpen aw toh, Pathian pengkul ging toh, van a kipan a hong paisuk ding ahi ngal a, huan Khrist a sisate a thou masa phot ding uhi;

¹⁷Huaikhit chiang in eite hingdama na omlaite, huihkhua ah Toupa tuak ding in amau toh mei lak ah laktouh in i om ding ua; huchi in tangtawn in Toupa kiang ah i om ding uhi.

¹⁸Huaiziak in hiai thute in kikhamuan tuahchiat un.