Read Paite Chin 1 THESSALONIKATE 5 Bible Online

1 THESSALONIKATE 5 - Paite Chin bible

1 THESSALONIKATE 5

¹Himahleh naute aw, a hun leh a ni lam thute himhim gelhsak na kiphamoh kei uhi.

²Toupa ni tuh zana guta bang in a hongtung ding chih noumau ngei in chiantak in na thei uhi.

³Muanna leh bitna chi a a gen laitak un numei nauvei bang in thakhat in manthatna a tung uah a tung ding a, a suakta kei hial ding uhi.

⁴Himahleh unaute aw, nou zaw huai ni’n guta bang a a hon bingphawn ding in mial ah na omkei uhi;

⁵Vak tate leh sun tate na hivek ngal ua; zan a mi i hi kei ua, mial a mi leng i hi sam kei uhi.

⁶Huaiziak in midangte bang in i ihmu kei ding uh, hak ni in limsak zaw ni.

⁷Ihmute zan in ahi a ihmut uh; zukhamte leng zan in ahi a kham uh.

⁸Himahleh eibel sun a mi i hih ziak in, ginna leh itna lum tawi in, hotdam lametna lukhu a zang in limsak zaw ni.

⁹Pathian in thangpaihna thuak ding hilou in, Toupa Jesu Khrist ziak a hotdamna mu ding zaw in a honchi hi.

¹⁰I hah in leng i ihmut in leng, amah toh i hinkhawm theihna ding in i sih sik in amah a sita hi.

¹¹Huaiziak in ki hanthawn chiat in, na hihnak mah bang un kitungding tuah chiat un.

¹²Himahleh unaute aw, na lak ua semgim leh Toupa a na heutu ua na om leh nou hon thuhilhte thei ding in k’on ngen hi.

¹³A nasep ziak un it in ngaithupi mahmah un. Noumau kituak in om un.

¹⁴Tuin unaute aw, k’on hanthawn uhi, danlou a omte hilh unla, lungkete hanthawn unla, hatloute panpih unla, mi tengteng lak ah thuakzou tak in om un.

¹⁵Kuamah in kua gitlouh leng gitlouh a thuklou ding in pilvang un; thil na kihihsak tuahna lam uah leh mi tengteng tung a na hihsakna lam uah leng a hoih lamlam zui un.

¹⁶Nuam gige un;

¹⁷Tawplou in thum un;

¹⁸Bangkim ah kipahthu gen gige un; huai tuh noumau lam a Khrist Jesu ah Pathian deihlam ahi.

¹⁹Kha tuh phelh kei un;

²⁰Thugente simmawh kei un;

²¹Bangkim enchian zaw unla, a hoihlam peuhmah len chinten un;

²²Gilou lam peuhmah ah kihemkhia un.

²³Huchi in lemna Pathian ngei in nou honhih siangthou sipsip hen; na kha uh leh na lungsim uh leh na pumpi uh i Toupa Jesu Khrist hongpai chiang in gensiatbei in humbit in omsuak sipsip hen.

²⁴Nou honsampa a muanhuai a, hih leng a hih ding hi.

²⁵Unaute aw, hon thumsak un.

²⁶Unaute tengteng tawp siangthou in chibai hon na buksak un.

²⁷Hiai laithon unau tengteng kiang ah sim ding in Toupa min in k’on ngen hi.

²⁸I Toupa Jesu Khrist hehpihna na kiang uah om hen, Amen.