Read Paite Chin JOSHUA 1 Bible Online

JOSHUA 1 - Paite Chin bible

JOSHUA 1

¹Huan, hichi ahi a, TOUPA sikha Mosi sih nung in Mosi nasempa Nun tapa Joshua kiang ah TOUPA’N

²“Ka sikha Mosi a sita a; thou inla, nang leh hiai mipi tengteng in Jordan lui kan unla, Israel suante ka piak gam ah pai un.

³Mosi kiang a ka gensa bang in na khepek ua na sikna peuhmah uh k’on pevek ding.

⁴Gamdai apan leh hiai Lebanon tang apan lui lianpi Euphrates luipha a, Hitte gam tengteng, nitumna lam a tuipi zatak pha in na gam uh ahi ding.

⁵Na damsung teng kuamah himhim in a hon nangzou kei ding. Mosi kiang a ka om bang in, nang kiang ah leng ka om ding hi. K’on zuausan kei dia, pai leng k’on paisan sam kei ding hi.

⁶Hattak leh hangsantak in om in. A suante uh kichiam a piak ka na chiamsa gam, hiaite luahsak ding na hi ngal a.

⁷Ka sikha Mosi in dan tengteng zui dia thu a honpiak zui chinten din hattak leh hangsantak in om peuhmah phot in. Na paina teng a na lamzan zel theihna ding in na taklam ah hiam, na veilam ah hiam pialsan het ken.

⁸Hiai danbu in na kam pawtsan hetkei hen. Hiai a thu kigelh tengteng na zuih chinten theihna ding in sun leh zan in na ngaihtuah zaw ding ahi. Huchi in na lampite na tuahpha sakdia, na hong lamzang ding hi.

⁹Thu ka honpia hilou hiam? Hattak leh hangsantak in om in. Lau kenla, lunglel sam ken, TOUPA na Pathian na paina teng ah na kiang a om ding hi” a chi hi.

¹⁰Joshua in mipi heutute thu a pia a,

¹¹“Giahphual vasik unla, mipite kiang ah, ‘Nekding sutuah dih ua, Tu apan ni thum in TOUPA na Pathian un gamluah dia a honpiak luahdin Jordan lui na kan ding uh ahi’ ” chi in, thu a honpia hi.

¹²Reubente, Gadte leh Manasseh nam kim khatte kiang ah Joshua in,

¹³“TOUPA na Pathian un khawlna a honpia a, hiai a honpe ding chi a TOUPA sikha Mosi in thu a honpiak theigige un.

¹⁴Na zite uh, na ta neu chikchikte leh na ganhonte uh zaw Jordan lui gal a Mosi in gam a hon na piak ah a om ding uh. Nou mi hat leh hangsan teng kigalvansa in na pai masa ding ua, na unaute uh na panpih ding ua,

¹⁵TOUPA’N na unaute uh noute bangmah a khawlna a piak a, TOUPA na Pathian un a hon gam piak amaute’n leng a luah mateng uh. Huchi in TOUPA sikha Mosi in Jordan luigal, ni suahna lam gam nou a tuam dia a hon na piak na lam ah na kiknawn ding ua, na luah ding uh” a chi hi.

¹⁶Amau, “Hihdia n’on thupiak tengteng ka hih ding uh, N’on sawlna teng ah leng ka pai ding uh.

¹⁷Banglam peuh a Mosi thu ka zuih bang un, nang thu leng ka zui ding uh. TOUPA na Pathian Mosi kiang a a om bang in nang kiang ah leng om peuhmah phot hen.

¹⁸Kuapeuh na thupiak kalh a, hel a, thu na piak peuhmah zui nuamlou zaw hihlup ding ahi. Hattak leh hangsantak in om peuhmah phot in” chi in Joshua a dawng uhi.