Read Paite Chin JOSHUA 10 Bible Online

JOSHUA 10 - Paite Chin bible

JOSHUA 10

¹Hichi ahi a, Jerusalem khaw kumpipa Adoni zedek in Joshua in Ai khua a la a, a hihsegawp dimdem a, Jeriko khua leh a kumpipa a hihsiat bang in Ai khua leh a kumpipa leng a hihse gawp a, Gibeon khua a mite’n Israelte toh lemna bawl in, a lak uah a tengsam uh, chih a zak in, a lauta mahmah hi.

²Gibeon khua bel lianpi, kumpipa khopite lak a khat bang a lian ahi. Ai khua sang a lianzaw leh a mite leng hattak a hih ziak un a lau mahmah uhi.

³Huaiziak in Jerusalem kumpipa Adonizedek in Hebron khaw kumpipa Hoham, Jermuth khaw kumpipa Piram, Lakis khaw kumpipa Japhia leh Eglon khaw kumpipa Debir kiang ah,

⁴“Hongpai unla, hong panpih un, Gibeon i vadou ding uh. Joshua leh Israel suante toh lemna a bawl ngal ua” chi in a thukhak hi.

⁵Amorte kumpipa ngate: Jerusalem kumpipa, Hebron kumpipa, Jermuth kumpipa, Lakis kumpipa leh Eglon kumpipa a kikhawm ua, a sepaih tengteng utoh a hohtou ua, Gibeon khozawn ah giahphual sat in a douta uhi.

⁶Gibeonte’n Gilgal a giahphual ua Joshua kiang ah mi a sawl ua, “Na sikhate hon nusia ken. Kintak in ka kiang uah hongtou inla, hong hondam inla, hong panpih in. Singtang gam a teng Amor kumpipate kou hong dou din a kikhawm uh” chi in a va hilh uhi.

⁷Joshua leh a kiang a galdou thei mi tengteng leh mi hat hangsan tengteng Gilgal apan a hohtou uhi.

⁸TOUPA’N Joshua kiang ah, “Amaute lau hetken. Na khut ah k’on pekhinta hi. A lak ua mi kuamah na ma ah ading zoukei ding uh” a chi hi.

⁹huaiziak in Joshua in amaute a dou guih a; zankhua a Gilgal apan a a na hohtousa ahi.

¹⁰TOUPA’N Israelte ma ah amaute a hihbuai gawpta a, Gibeon khua ah tampi a that a, Bethhoron zottouhna lampi ah a delh a, Azek leh Maked khaw pha in a that hi.

¹¹Hichi ahi a, Israelte ma ah a taikek ua, Bethhoron apan a paisukna mun a a omlai un, TOUPA’N van apan gial lianpipi a tung uah Azek khaw pha in a kesak a, a si uhi. Israel suante’n namsau a satlup sang un gial denlup a tamzaw hi.

¹²TOUPA’N Amorte Israel suante a piak ni’n Joshua in TOUPA kiang ah thu a gen a; Israelte mitmuh in, “Ni, Gibeon khaw tung ah ding nilouh in; kha, nang leng, Aijalon guam ah om nilouh in” a chi hi.

¹³Mite’n a melmate uh tung a phu a lak masiah uh ni ading kinken a, kha leng a om nilouh hi. Hiai thu Jasar laibu a gelh hilou hia? Huchi in ni vanlai ah a om nilouh a, ni khat sung vengveng tum thu a ngaihtuah kei hi.

¹⁴TOUPA’N huchibang a mihing aw a ngaihkhiak ni, a ma in a om ngeikei a, a nung in leng a om ngeikei; TOUPA’N lah Israelte a doupih ngal a.

¹⁵Joshua leh Israelte a giahphual uh Gilgal ah a kiknawn vek uhi.

¹⁶Huai kumpipa ngate a taimang ua, Maked kawkhuk ah a kibu uhi.

¹⁷“Kumpipa ngate muh ahi ua, Makeddah kawkhuk ah a kibu uh” chi in Joshua hilh in a om hi.

¹⁸Joshua in, “Kawkhuk kam suang lianpi khuk in sin unla, a vengmite leng omsak un.

¹⁹Noute bel omkei unla; na melmate uh delh unla, a nungdalte that unla; a khua himhim uah lutsak kei un. TOUPA na Pathian un na khut uah amau a hon peta ngal a” a chi hi.

²⁰Hichi ahi a, Joshua leh Israel suante’n a bei masiah ua a thah khit un, kulhpi nei khuate a, a omlaite a tailut khit un,

²¹mi tengteng Joshua kiang Makkedah ah galmuangtak in a hong kiknawn ua. Israel suante dem in kuamah in lei a lok ngamkei uhi.

²²Joshua in, “Kawkhuk kam hong unla, kumpipa ngate kawkhuk apan ka kiang ah hon kaikhia un” a chi hi.

²³Hichibang in a hih ua, kumpipa ngate: Jerusalem kumpipa, Hebron kumpipa, Jermuth kumpipa, Lakis kumpipa leh Eglon kumpipa kawkhuk apan a kiang ah a hon pikhia uhi.

²⁴Hichi ahi a, kumpipate Joshua kiang a a honpi tak un, Joshua in Israel tengteng a samkhawm a, amah toh kuan galdou thei mite lak a heutute kiang ah, “Hong painai unla, hiai kumpipate ngawng sik un,” a chi hi. Huchi in a hong painai ua, a ngawng uh a hong siksak uhi.

²⁵Joshua in a kiang uah, “Lau kei unla, lunglel sam kei un. Hattak leh hangsantak in om un. Na dou uh na melma tengteng tung ah TOUPA’N hichibang in a hih ding” a chi hi.

²⁶Huaikhit in Joshua in amau a satzan a, a that a, sing nga dawn ah a khai a; nitaklam tan in singdawn ah a kikhai lai uhi.

²⁷Hichi ahi a, ni tumkuan in Joshua in thu a pia a, sing dawn apan a lakhia ua, a kibukna kawkhuk ah a pailut ua, a kawkhuk kam suang lianpi in a sin ua, tunitan in leng a omlai hi.

²⁸Joshua in huai ni’n Makkedah khua a la a, a kumpipa uh tan in namsau in a lok a; huai khua a om tengteng a satlum vek a, khat lel leng hawi a neikei hi. Jeriko khaw kumpipa tung a a hihmah bang in, Makkedah khaw kumpipa tung ah leng a hihta hi.

²⁹Joshua Israel tengteng toh Makkedah khua apan Libnah khua ah a pai ua, Libnah khua a dou uhi.

³⁰TOUPA’N huai khua kumpipa tan in Israelte khut ah a pia hi. Huai khua dou in asung a om tengteng a thatvek hi. Asung a ommi khatmah leng hinghawi a neikei hi. Jeriko khaw kumpipa tung a a hihmah bang in a kumpipa tung ah a hih hi.

³¹Joshua Israel tengteng toh Libnah khua apan Lakis khua ah a pai ua, panmun a khoh ua, a sual uh.

³²TOUPA’N Lakis khua Israelte khut ah a pia a, a ni nih ni’n a la ua, huai khua dou in asung a om tengteng namsau in a thatvek ua, Libnah khaw tung a, a hih bang in a hihta uhi.

³³Bezer khaw kumpipa Horam, Lakis khua panpih din a kuantou a; Joshua in amah leh a heute nasan khatmah leng hawilou in a thatgam hi.

³⁴Joshua Israel tengteng toh Lakis khua apan Eglon khua ah a pai ua, panmun a khoh ua; a dou uhi.

³⁵Huai ni’n a la ua, huai ni mah in huai khua dou in asung a om tengteng namsau in a thatbei sipsip hi. Lakis khaw tung a a hih bang in a hihta hi.

³⁶Joshua, Israelte tengteng toh Eglon khua apan Hebron khua ah a pai ua; a dou uh.

³⁷A la ua, huai khua, a kumpipa, a khopel tengteng leh asung a om tengteng namsau a dou in a thatvek ua, Eglon khaw tung a hih bang in khat mah leng hinghawi a neikei hi. A khua nangawn hihse vek in asung a om tengteng a that bei sipsip hi.

³⁸Joshua leh Israel tengteng Debir khua ah a kihei nawn ua; a dou ua;

³⁹huai khua, a kumpipa leh a khopel tengteng a la ua; namsau in a dou ua, asung a om tengteng a that bei sipsip ua; khatmah leng hawi a neikei uh. Hebron khaw tung leh Debir khua leh a kumpipa uh tung a hih bang in a hihta hi.

⁴⁰Huchi in Joshua in a gam pumpi, tang gamte, simlam a phaizang leh mual gamte hihse vek in a kumpipa tengteng uh a thatvek a; khatmah hinghawi a neikei hi. TOUPA, Israelte Pathian thupiak bang in a hing peuhmah a hih chimit vek hi.

⁴¹Joshua in Kadesh-barnea apan Gaza pha in, Gosen gam tengteng toh Gibeon pha in a hihse vek hi.

⁴²Huai kumpipate tengteng leh a gam uh TOUPA, Israelte Pathian in Israelte a doupih ziak in, Joshua in hun khat a a lakvek ahi uhi.

⁴³Joshua leh Israel tengteng a giahphual Gilgal ah a kiknawn vek uhi.