Read Paite Chin JOSHUA 13 Bible Online

JOSHUA 13 - Paite Chin bible

JOSHUA 13

¹Joshua a hong upata a, a hong tek mahmah ta hi. TOUPA’N a kiang ah, “Na hong upa in na hongtek mahmahta a, gam lak ding lah a tamlai mahmah ngal a.

²Hiai gamte ahi lak louh: Philistia gam tengteng leh Geshur gam tengteng.

³Aigupta gam chin a om Sihor apan mallam pang a Ekron gamgi tan in, huai bel Kanan mite gam a sim ahi; Philistiate toupa ngate, Gaza mite, Ashdod mite, Ashkelon mite, Git mite leh Ekron mite; simlam a Avi mite.

⁴Kanan mite gam tengteng leh Zidon mite gam a Mearah, Amorte gamgi Aphek khaw pha in.

⁵Gebal mite gam leh nisuahna lam Lebanon gam tengteng Hermon tang nuai Baal gad apan Hamath kholutna pha in.

⁶Lebanon apan Misrephoth maim mun pha in, tanggam a teng tengteng, Zidon mi tengteng. Amaute Israel suante ma ah ka delhkhe dia; k’on thupiak bang in Israel gouluah din bawlsak in.

⁷Huchi in hiai gam nam kuate leh Manasseh nam kimkhatte gouluah din hawmsak in” a chi hi.

⁸TOUPA sikha Mosi in amau adia a sehsak bang in Reuben suante leh Gad suante’n Manasseh nam kimkhat dangte toh Mosi piaksa Jordan suahlam gam ah goutan a neita uhi.

⁹Huai gam ahihleh Arnon guam gei a om Aroer khua apan leh guam laitak a khopi leh Medeba phai gam tengteng, Dibon tan ahi.

¹⁰Amorte kumpipa Sihon, Heshbon khua a Kumpipa a tu khopi tengteng Ammon suante gamgi tan ahi.

¹¹Gilead gam leh Geshurte leh Maakatte gamgi chiang leh Hermon tang tengteng leh Bashan gam tengteng Salkah khaw tan ahi.

¹²Astaroth leh Edre-i khua a kumpipa a tu Bashan gam kumpipa Og gam tengteng toh, huaite Rephaim nam milian omsunte ahi uh; huaite Mosi in a na dou a, a na delhkheta hi.

¹³Himahleh Geshurte leh Maakatte Israel suante’n a delhkhe kei ua; Geshurte leh Maakatte tunitan in Israelte lak ah a tengden lai uhi.

¹⁴Levi namte kia ahi gouluah ding a piak louh. A kiang ua a na gensa bang in TOUPA, Israelte Pathian adia mei a thillatte amau gouluah ahi.

¹⁵Reuben suante nam a inkuan dungzui in Mosi in gam a na peta hi.

¹⁶A gamgi uh Arnon guam pang a om Aroer khua apan guam laitak a khopi leh Medeba phaigam tengteng apan,

¹⁷Heshbon leh huai phaigam a khopi tengteng; Debon, Bamoth baal, leh Beth baal meon;

¹⁸Jahaz, Kedemoth leh Mephaath;

¹⁹Kiriathaim, Sibmah leh guam gei a Zereth sahar;

²⁰Beth peor leh Ashdot pisgah leh Beth jeshimoth;

²¹Phai gam khopi tengteng, Heshbon a vaihawm Amorte Kumpipa Sihon lalgam teng, Mosi in a na thah khitsa Midiante kumpipate Evi, Rekem, Zur, Hur leh Reba omna gam toh ahi.

²²Beor tapa Balaam, aisansiam leng a inkuante toh Israel suante’n a that uhi.

²³Reuben suante gam chiang bel Jordan leh a pang teng ahi. Hiai gam leh a khopite leh khuate ahi Reuben suante adia a inkuan omdan bangzel a gouluah dia a sehsak uh.

²⁴Mosi in Gad suante a inkuan dungzui un gam a pia hi.

²⁵A gamgi uh Jazer khua leh Gilead gam khopi tengteng leh Ammon suante gam kimkhat, Rabah khaw kiang a om Aroer pha in;

²⁶Heshbon apan Ramath mizpeh leh Betonim pha in; Mahanaim apan Debir gamgi pha in;

²⁷Guam ah Betharam, Bethnimarah, Sukoth, Zaphon, Heshbon kumpipa Sihon gam teng, Jordan leh a gei a gamte, Jordan gal suahlam pang a Kinereth dil tawp chiang tan in ahi.

²⁸Hiai Gad suante adia a inkuan omdan bangzel a a gouluah ding ua seh, a khopite uh leh a khuate uh ahi.

²⁹Mosi in Manasseh suan kimkhatte gam a pia hi. Manasseh suan kimkhatte adia a inkuan omdan bangzel a piak ahi uh.

³⁰A gamgi uh Mahanaim apan Bashan gam tengteng, Bashan gam kumpipa Og gam tengteng leh Bashan gam a Jair khopi tengteng toh, khua sawmguk ahi.

³¹Gilead gam kimkhat leh Bashan gam kumpipa Og gam a Astaroth, Edre-i; huai Manasseh tapa Makir suan, Makir suan kimkhatte adia a inkuan uh omdan bangzel a seh ahi.

³²Hiaite Moab phai, Jeriko zawn, Jordan gal lehlam a, Mosi in gouluah dia a piak gamte ahi uh.

³³Levi chite Mosi in gouluah ding a pe kei hi. A kiang ua a na gensa bang in TOUPA, Israelte Pathian a gouluah uh ahi.