Read Paite Chin JOSHUA 14 Bible Online

JOSHUA 14 - Paite Chin bible

JOSHUA 14

¹Hiaite ahi Israel suante’n Kanan gam a lak ua, siampu Eleazar, Nun tapa Joshua leh Israel suante nam inkuan intekpente’n a gouluah ding ua a na hawm uh.

²Nam kuate leh nam kimkhatte a tuam dia TOUPA’N Mosi zang a thu a na piak bang in aisan in a gouluah uh piak ahi.

³Mosi in nam nih leh nam kimkhatte Jordan gal ah a gouluah ding uh a na peta hi. Levi chite bel a lak uah gouluah ding a pe kei hi.

⁴Joseph suante nam nih ahi ua, Manasseh leh Ephraim. Levi chite huai gam ah tantuam a pe kei uh, a omna ding uh khopite leh a daikim ua gantatna ding mun leh a inn leh a lou uh bawlna ding loungal piak ahi kei uhi.

⁵TOUPA’N Mosi thu a piak bang in Israel suante’n a hih ua, gam a hawm uhi.

⁶Judah suante Gilgal khua ah Joshua kiang ah a va hoh ua; Keniz mi Jephunneh tapa Kaleb in a kiang ah, “Kadesh-barnea mun a Pathian mi Mosi kiang a TOUPA’N ka tungtang leh na tungtang thu a na gen na thei hi.

⁷TOUPA sikha Mosi in Kadesh-barnea mun apan gam va enkhe dia a hon sawllai in kum sawmli a upa ka na hita a; ka lungsim a om bangtak a kiang ah ka tun nawn hi.

⁸Himahleh ka unau ka kiang a paisamte’n mipite lungtang a tuisuak sak ua; ken bel TOUPA ka Pathian ka zui hi.

⁹Mosi in huai ni’n, TOUPA ka Pathian na zuih ziak in na khe in a na siksa gam tangtawn in nang leh na suante gouluah ahi ngeingei ding, chi in a kichiam hi.

¹⁰Huchi in ngai in, TOUPA’N Mosi kiang a huai thute a gen nung Israelte gamdai a, a vakvaih sung un TOUPA’N a gensa bang in kum sawmli leh nga tak a hon damsak hi. Ngai in, tuin kum sawmgiat leh nga ka hita hi.

¹¹Hichi pipi in leng Mosi in a hon sawllai mah bang in ka hatlai a, nidanglai a kidouna ding leh nasep silbawlna dia thagui ka neih mah bang in tuin leng ka neilai hi.

¹²Huaiziak in hiai tang, TOUPA’N huai ni a a gensa pen honpia in. Anakimte a om ua, a khopite uh a thupi a, kulh a umsuak ahi uh, chih huai ni’n na za a; TOUPA’N a hon ompih dia, amaute ka delhkhe thei ding, TOUPA’N a na gensa bang in” a chi hi.

¹³Joshua in a vualzawl a; Jephunneh tapa Kaleb a gouluah din Hebron khua a peta hi.

¹⁴Huaiziak in, Hebron khua tunitan in Keniz mi, Jephunneh tapa Kaleb gouluah a hong hita hi; TOUPA Israelte Pathian a zuih ziak in.

¹⁵Hebron khaw min a ma in Kiriath Arba ahi. Arba ahihleh Anakimte lak a mi thupipen ahi. Huaikhit in a gam a hong galmuangta hi.