Read Paite Chin JOSHUA 17 Bible Online

JOSHUA 17 - Paite Chin bible

JOSHUA 17

¹Manasseh suante tantuam hiaite ahi. Manasseh Joseph tapa masa ahi a, Gilead pa, Manasseh tapa masa Makir galhat a hih ziak in Gilead leh Bashan gam a tang hi.

²Manasseh suan dang tengteng ading in a inkuan uh dungzui in tantuam leng a om hi. Abiezer suante ading, Helek suante ading, Sekem suante ading, Hepher suante ading, leh Semidah suante ading. Huaite a inkuan uh dungzui zel a Joseph tapa Manasseh suan pasalte ahi uhi.

³Manasseh tapa Makir, huai tapa Gilead, huai tapa Hepher, huai tapa Zelophehad in tapa neilou in tanu ngen a nei hi. A tanute min Mahlai, Noah, Hoglai, Milkah leh Tirzah ahi.

⁴Siampu Eleazar ma ah leh Nun tapa Joshua ma ah leh miliante ma ah a hoh ua, “Ka unaute uh lak a tantuam hon pesam din TOUPA’N Mosi thu a pia hi” chi’n a gen uh. TOUPA thupiak bang in a pa uh unaute lak ah tantuam a pesamta hi.

⁵Jordan gal ah Gilead leh Bashan gam simlouh in, Manasseh tantuam ding in mun sawm a puk a;

⁶Manasseh tanute’n a tapate uh lak ah tantuam a neihsam ziak uh ahi. Gilead gam bel Manasseh tapa dangte’n a tang uhi.

⁷Manasseh gamgi Sekem suahlam a om Asher apan Mikmethath pha in ahi a; taklam pang ah En Tappuah mite tenna pha in a pai hi.

⁸Tappuah gam Manasseh a ahi a; himahleh Manasseh gamgi chin a Tappuah ahihleh Ephraim suante a ahi.

⁹Gamgi Kan in luita simlam pangah a paisuka, Ephraim suante gamgi a sun hi. Ephraim suante khopite khenkhat Manasseh suante khopite lak ah a om hi. Himahleh Manasseh suante gamgi bel Kana kuam mallam pang ah a pai a, tuipi ah a tawp hi.

¹⁰Simlam pang Ephraim a ahi a, mallam pang pen Manasseh a ahi. Tuipi a gamgi ahi. Mallam ah Asher pha in ahi a, suahlam ah Issakar pha in ahitou hi.

¹¹Issakar leh Asher gam ah Manasseh in Beth Sean leh a kim a khuate, Ibleam leh a kim a khuate, Endor a tengte leh a kim a khuate Taanak a tengte leh a kim a khuate, Meggiddo a tengte leh a kim a khuate zou in, khaw seh thum a nei uhi.

¹²Himahleh Manasseh suante’n huai khopi a tengte a delhkhe zou kei ua; Kanan mite huai gam ah a teng uhi.

¹³Hichi ahi a, Israel suante a honghat hiaihiai un, Kanante nasem a goih din a omsak ua, a delhkhe siangvek kei uhi.

¹⁴Joseph suante’n Joshua kiang ah, “Bangchidan ahia gouluah ding tantuam seh khat, tan khat kia n’on piak tuam, TOUPA’N lah tutan in a hon nak vualzawl mahmah ngal a?” a chi uhi.

¹⁵Joshua in a kiang uah, “Tam na hih uleh, Perizte leh miliante gammang na tenna ding un vavat un. Ephraim tang gam pen nou adia a neu luat leh” a chi hi.

¹⁶Joseph suante’n, “Tanggam kou adin a hun kei hi. Phaigam a teng Kanan tengteng, Beth shean leh a khopi a tengte leh Jezreel guam a tengte’n sik kangtalai a neichiat tuamse uh” a chi uhi.

¹⁷Joshua in Joseph inkuante, Ephraim leh Manasseh suante kiang ah, “Na tam mahmah ua, hat leng na hat ua; tan khat kia na neikei ding uhi.

¹⁸‘Tanggam teng nou ading ahilai ding hi. Gammang hita leh, na vat ding ua, a gam chiang tengteng nou a ahi ding’. Kanante’n sik kangtalaite nei in, hat tawk le uh leng, na hawlkhe zou ding uh” a chi hi.