Read Paite Chin JOSHUA 18 Bible Online

JOSHUA 18 - Paite Chin bible

JOSHUA 18

¹Huai nung in Israel suan mipi tengteng Shiloh khua ah a kikhawm ua, huai ah Kihoupihna puanin a kai uh. Huai gam teng a zoukhinta uhi.

²Israel suante lak ah a tantuam uh tang nailou nam sagih a omlai uhi.

³Joshua in Israel suante kiang ah, “TOUPA na pipute uh Pathian in nou a hon piaksa gam, bang tan ahia luahlou a na awltat lai ding uh?

⁴Namchih a mi thum zel telkhia unla; amau a kuan ding ua, gam a va en vialvial ding ua, a tantuam hun ding uh bangchiat zel in a vagelh ding ua; ka kiang ah a hongnawn ding uh.

⁵Mun sagihin a khenphot ding ua; Judah pawl simlam ah a tantuam uah a om ding ua, Joseph inkuante mallam ah a tantuam uah a om ding uh.

⁶Gam mun sagih in va khen unla, huai gelhna honpia un. Huchi in hiai ah TOUPA i Pathian ma ah ai k’on sansak ding hi.

⁷Levi teng in na lak uah tantuam a neikei ding uh. TOUPA mai a siampu nasep amau goutan ahi. Gad pawl, Reuben pawl leh Manasseh nam kimkhat bel Jordan gal suahlam ah amau tantuam TOUPA sikha Mosi in a piak a na tangta uh” a chi hi.

⁸Huchi in huai mite a pawtkheta ua, Joshua in, “Gam va en vialvial unla, hon gelhkhia unla, ka kiang ah hontun nawn unla, hiai ah Shiloh khua ah TOUPA ma ah ai k’on sansak ding” chi in thu a pia hi.

⁹Mite a kuan ua, gam a va en vialvial ua, mun sagih in a khen ua, laibu ah a khuakhua in a gelhkhia ua, giahphual Shiloh ah Joshua kiang ah a kiknawn uh.

¹⁰Joshua in Shiloh ah TOUPA ma ah ai a na sansak a; huai ah Joshua in Israel suante a kikhen dan bangzel un gam a hawmta hi.

¹¹Aisan a inkuan uh dungzui in Benjamin suante tung ah a keta a; a gamgi chiang uh Judah suante leh Joseph suante kikal ahi.

¹²Mallam pang a a gamgi chiang uh Jordan apan ahi a; Jeriko sik ah mallam pang ah a paitou a, tumlam pang ah tanggam ah a paitou zel a; Beth-Aven gamdai ah a tawp hi.

¹³Hiai apan Luz lam ah, Luz, huai bel Bethel ahi, sik ah, simlam pang ah a pai zel a; Beth-horon khang simlam pang a tangzul ah Ataroth-adar ah a paisuk hi.

¹⁴A pai zel a, Beth-horon simlam pang a tangchin apan tumlam ah simlam pang ah a kualphei a; Kiriath-baal, huai Kiriath-jearim ahi, Judah suante khopi ah a tawp a; huai tumlam pang gamgi ahi.

¹⁵Simlam pang a gam Kiriath-jearim tawp apan ahi a; tumlam ah a pawt a, Nephtoah lui tuite ah a pai zel hi.

¹⁶Rephaim mallam pang guam a Hinnomtapa guam chin a tangmong ah a paisuk a; Jebuste sik ah, simlam pang a Hinnom guam ah a paisuk a, En-rogel ah a paisuk hi.

¹⁷Mallam zuan in a pai a, En-semes ah a pai a, Adumim kahtouhna chin Geliloth ah a pai a; Reuben tapa Bohan suang ah a paisuk a;

¹⁸Arabah sik mallam pang ah a pai zel a, Arabah ah a paisuk a;

¹⁹Beth-hoglah sik, mallam pang ah a pai zel a; a tawpna bel Jordan simtawp, Chi Tuipi mallam tuipi meng ah ahi. Huai simlam gamgi ahi.

²⁰Jordan suahlam pang, a gamgi chiang ahi. Huai ahi Benjamin suante a inkuan uh dungzui a a tantuam gam in a kolhkhum sung.

²¹Benjamin suante a inkuan dungzui un a khopite uh, Jeriko, Beth-hoglah, Emek keziz,

²²Beth-arabah, Zemariam, Bethel,

²³Avim, Parah, Ophrah,

²⁴Kephar-ha-ammonai, Ophni leh Geba; a khopi tengteng sawmlehnih ahi a, a khopel tengteng toh.

²⁵Gibeon, Ramah, Beeroth,

²⁶Mizpeh, Kephirah, Mozah,

²⁷Rekem, Irpeel, Taralah;

²⁸Zelah, Eleph, Jebus, huai Jerusalem ahi, leh Gibeah leh Kiriath, khopi sawmlehli, a khopelte toh. Hiaite ahi Benjamin suante a inkuan uh dungzui ua a tantuam ding ua seh.