Read Paite Chin JOSHUA 2 Bible Online

JOSHUA 2 - Paite Chin bible

JOSHUA 2

¹Huan Nun tapa Joshua in, “A gam leh Jeriko khua va en mahdih ua” chi in mi nih Sittim apan a sim a enkhe ding a sawl hi. A va hoh ua, kizuak khat, a min Rahab inn ah a valut ua, huai ah a va zintung uhi.

²“Ngai in, tu zan in gam enkhe din Israel suante a hong uh” chi in Jeriko kumpipa hilh in a om hi.

³Jeriko khaw kumpipa’n, “Na inn a hongtung mikhualte hon pekhia in. Gam pumpi enkhe dia hong ahi uh” chi din Rahab kiang ah mi a sawl hi.

⁴Numei in huai mi nihte a pi a, a sel a, a kiang uah, “He, mite ka kiang ah a hong ngei ngut ua, himahleh koi apan hongpai ahi ua, chih zaw ka theikei.

⁵Hichi ahi a, khomial, kulh kongpi khak hunlai in huai mite a pawtkhe nawnta uh. Koi lam ah ahia a pai uh ka theita kei hi. Delh meng le uchin, na phalai ding uh” a chi hi.

⁶Himahleh in tung ah a pitou a, in tung a jija kung siatkhawm lak a selkhin lah ahi ngal a.

⁷Mite’n Jordan lui lam ah, a galkaina tan in a vadelh ua; a delhmite a pawt khiak tak un kulh kongpi a khak uhi.

⁸A lup ma un in tung ah a kiang uah a va hohtou hi.

⁹A kiang uah, “Hiai gam TOUPA’N nou a hon peta, na lauhhuaina un a hon delhkhum a, hiai gam a teng tengteng na ma uah a zulkhin uh, chih ka thei hi.

¹⁰Aigupta gam apan na hongpawt khiak un TOUPA’N Tuipi San a honhih kangsak a, Jordan luigal a Amorte kumpi nih: Sihon leh Og tung a na hih dante uh, huchibang a na hihmang dante uh lah ka na zata ngal ua.

¹¹Huai ka na zak tak un, ka lungtangte uh a zulkhin a, noute ziak a laulou himhim a omkei hi. TOUPA na Pathian u lah tunglam van ah leh nuailam lei ah Pathian ahi.

¹²Tuin na tung uah ka hehpihna ka langsakta hi, nou leng ka pa inkawte tung ah na hehpihna uh langsak sam un.

¹³Ka nu leh ka pa, ka sanggam pasalte, ka sanggam numeite leh a neih teng uh hawi unla, sihna lak apan ka hinna uh hon hum bitsak din TOUPA min in hehpih in ka kiang ah kichiam unla, chiamtehna dik honpia un,” a chi hi.

¹⁴Mite’n a kiang ah, “Ka thilhih uh na genkhiak kei ding leh na sih tang in ka si ding uh. Hichi ahi ding a, TOUPA’N gam a honpiak hun chiang in, k’on hehpih ding ua, na tung ah muanhuaitak in ka hih ding uh” a chi uhi.

¹⁵Tohlet ah khauhual a zan khesuk a; a inn khopi kulh khou a om ahi a, kulh tung a teng ahi.

¹⁶A kiang uah, “Tanglam zuan in pai un, huchilou in zaw nou hon delhte’n a honmu kha ding uh. Huai ah ni thum va kibu un; nou hon delhte a hong kiknawn masiah uh. Huai zoh chiang in na pai nawn na ding uh” a chi hi.

¹⁷Mite’n a kiang ah, “Kichiamna a n’on kichiamsakna ah zaw dembei ka hi ding uh.

¹⁸Ngai in, hiai gam ka honglut chiang un hiai khausan n’on khiakna tohlet ah na gak belh in. inn sung ah na kiang ah na pa, na nu, na sanggam teng leh na pa inkawte tengteng pilut vek in.

¹⁹Hichi ahi ding a, na inn kongpi apan kholak a pawtkhe peuhmah a lu tung ah a sisan a om dia, kou ahihleh mawh in ka omkei ding uh. Kuapeuh insung a na kiang a om peuhmah a tung ua khutkhak ahihleh, ka lu tung uah a sisan uh a om ding hi.

²⁰Himahleh ka thilhih uh na genkhiak leh n’on kichiamsakna ah mawh in ka omkei ding uh” a chi uhi.

²¹Aman, “Na thu bangzel uh hileh ake” a chi a; huchi in amau a khakhia a, a paita uhi. Tohlet ah khau san a gakden hi.

²²A pai ua, huai tang a va tung ua, huai ah ni thum, amau delhte a kiknawn masiah uh a va om uhi. A delh mite’n lamtawn in a zong ua, himahleh a mu zoukei uh.

²³Huai mi nihte a kiknawn ua, huai tang apan a paisuk ua, a galkah ua, Nun tapa Joshua kiang a tung ua; a tung ua thiltung tengteng a hilh uh.

²⁴Joshua kiang ah, “TOUPA’N a gam pumpi i khut uah a hon na pe petmah ve, huai kia leng hilou, huai gam a tengte i ma uah a zulkhin uh,” a chi uhi.