Read Paite Chin JOSHUA 20 Bible Online

JOSHUA 20 - Paite Chin bible

JOSHUA 20

¹Huan, TOUPA’N Joshua a houpih a,

²“Israel suante kiang ah, ‘Kihumbitna khuate bawl in, Mosi zang a na kiang ua ka genkhitsa ahi.

³Kuapeuh theilou leh tumlou pi a mithat kha, huai ah a tailut thei ding hi. Huchi in sisan phulami apan nou adin kihumbitna ahi ding.

⁴Huai khopite lak a a koi hiam pen a, a tailut chiang in, khopi kulh kongpi lutna ah a va ding dia, huai khaw upate bil a zak in a tanchin a vatun ding. Amau khopi sung ah a kiang uah a pilut ding ua, a lak ua a ten sam theihna din a omna ding a sehsak ding uhi.

⁵Sisan phulami in a hondelh leh a thatmi pen a khut ah na pe ding uh ahi kei. A invengte theilou a, a thah ahi a, a ma in a haw ngalkei hi.

⁶Mipi ma a vaihawmsak dia adin ma leh siampu lian a pangpa a sih mateng, huai khopi ah a teng ding hi. Huai nung in mi thatmi pen amah khaw sung mahmah, a tai khiaksan khua, amah mah inn sung ah a lut nawn ding ahi’ ” chi’n gen in, a chi hi.

⁷Huchi in Naphtali tanggam a Galili a Kadesh, Ephraim tanggam a Sekem leh Judia singtang gam a Kirath Arba, huai bel Hebron ahi, a septa uhi.

⁸Suahlam ah Jordan gal a Jeriko ah Reuben nam gam a gamdai phaizang a Bezer, Gad nam gam a Gilead gam a Ramoth, Manasseh nam gam a Bashan a Golan a septa uhi.

⁹Hiai khuate ahi Israel suan tengteng leh a lak ua namdang tengte adia seh a om. Kuapeuh mi that kha, hiai khuate a tailut in mipi mai a adin mateng sisan phulami khut ah silou in a omthei ding hi.