Read Paite Chin JOSHUA 21 Bible Online

JOSHUA 21 - Paite Chin bible

JOSHUA 21

¹Huchi in Levi chi inkuan a intekpente siampu Eleazar kiang ah leh Nun tapa Joshua kiang ah leh Israel suante nam inkuan a intekpente kiang ah a hoh uhi.

²“Kanan gam a Shiloh khua ah, TOUPA’N Mosi zang in ka tenna ding uh khopite, ka gan uh tatna ding a kimvel toh n’on piak ding uh thu a na peta” a chi uhi.

³Huchi in Israel suante’n TOUPA thupiak bang in a tantuam ua kipan hiai khopite a kimvel toh Levi chite a pia uhi.

⁴Aisan Kohath suan tung ah a pukta hi. Huchi in siampu Aron suan Levi chi a mite’n Judah nam tantuam apan, Simeon nam tantuam apan leh Benjamin nam tantuam apan khopi sawmlehthum aisan in a tangta uhi.

⁵Kohath suan dangte’n Ephraim nam suante tantuam apan, Dan nam tantuam apan leh Manasseh nam kimkhat tantuam apan khopi sawm aisan in a tangta uhi.

⁶Gershon suante’n Issakar nam suante tantuam apan, Asher nam tantuam apan, Naphtali nam tantuam apan leh Bashan gam a Manasseh nam kimkhatte tantuam apan, khopi sawmlehthum aisan in a tangta uhi.

⁷Merari suante’n a inkuan uh dungzui in Reuben nam tantuam apan, Gad nam tantuam apan leh Zebulun nam tantuam apan khopi sawmlehnih a tangta uhi.

⁸Israel suante’n TOUPA’N Mosi zang a thu a piak bang in Levi mite khopite leh a kimvel aisan in a pia uhi.

⁹Huchi in Judah suante nam tantuam apan leh Simeon suante nam tantuam apan hiai khopi minlohte a pia uhi.

¹⁰Huaite Levi suan, Kohath pawl a namte, Aron suan pawl ading ahi; aisan amau tung ah a puk masapen hi.

¹¹Amau adin Judah tanggam a Kiriath Arba leh a kim a gantatna gam toh a pia uhi. Kiriath Arba Hebron kichi ahi a, Arba ahihleh Anak pa ahi.

¹²Khopi kimvelte leh a khopelte Jephunneh tapa Kaleb tantuam din a pia uhi.

¹³Siampu Aron suante Hebron, mi thatmite kihumbitna khopi, a kimvel toh, Libnah khua, a kimvel toh;

¹⁴Jattir khua, a kim a velte toh, Astemoa khua, a kim a velte toh;

¹⁵Holon khua, a kim a velte toh, Debir khua, a kim a velte toh;

¹⁶Ain khua, a kim a velte toh, Juttah khua, a kim a velte toh; Beth Semes khua, a kim a velte toh; huai nam nihte tantuam apan khopi kua a pia uhi.

¹⁷Benjamin nam tantuam apan Gibeon khua, a kim a velte toh, Geba khua, a kim a velte toh;

¹⁸Anathoth khua, a kim a velte toh, Almon khua, a kim a velte toh; khopi li a pelai uhi.

¹⁹Aron suan, siampute khopi tengteng khopi sawmlehthum ahi, a kim a velte toh.

²⁰Kohath suante inkuan, Levi pawl leh Kohath suan dangte’n leng a tantuam khopite uh Ephraim nam tantuam apan in ahi a tan uh.

²¹Mi thatmite kihumbitna khopi Ephraim singtang gam a Sekem khua, a kim a velte toh, Gezer khua a kim a velte toh,

²²Kibzaim khua, a kim a velte toh, Bethhoron khua, a kim a velte toh; khopi li a pia uhi.

²³Dan nam tantuam apan Eltekeh khua, a kim a velte toh, Gibbethon khua, a kim a velte toh;

²⁴Aijalon khua, a kim a velte toh, Gath-rimmon khua, a kim a velte toh, khopi li.

²⁵Manasseh nam kimkhatte tantuam apan Taanak khua, a kim a velte toh; Gath-rimmon khua, a kim a velte toh; khopi nih.

²⁶Kohath suan dangte nam khopi tengteng khaw sawm ahi, a kim a velte toh.

²⁷Gershon suante pawl, Levi namte Manasseh nam kimkhatte tantuam apan, mi thatmite kihumbitna khopi, Bashan gam a Golan khua, a kim a velte toh; Beeshterah khua, a kim a velte toh; khopi nih a pia uhi.

²⁸Issakar nam tantuam apan Kishion khua, a kim a velte toh, Daberath khua, a kim a velte toh;

²⁹Jarmuth khua, a kim a velte toh, En-gannim khua, a kim a velte toh; khopi li.

³⁰Asher nam tantuam apan Mishal khua, a kim a velte toh;

³¹Helkath khua, a kim a velte toh, Rehob khua, a kim a velte toh, khopi li.

³²Naphtali nam tantuam apan, mi thatmite kihumbitna khopi, Galili gam a Kadesh khua, a kim a velte toh, Hammoth Dor khua, a kim a velte toh, Kartan khua, a kim a velte toh, khopi thum.

³³Gershon pawl a inkuan uh dungzui zel a, a tantuam uh khopi tengteng sawmlehthum ahi, a kim a velte toh.

³⁴Merari suante pawl inkuan, Levi pawl dangte bel Zebulun nam tantuam apan Jokneam khua, a kim a velte toh, Karta khua, a kim a velte toh,

³⁵Dimnah khua, a kim a velte toh, Nahalal khua, a kim a velte toh, khopi li.

³⁶Reuben nam tantuam apan Bezer khua, a kim a velte toh, Jahaz khua, a kim a velte toh,

³⁷Kedemoth khua, a kim a velte toh; khopi li.

³⁸Gad nam tantuam apan, mi thatmite kihumbitna khopi, Gilead gam a Ramoth khua, kim a velte toh, Mahanaim khua, a kim a velte toh;

³⁹Heshbon khua, a kim a velte toh, Jazer khua, a kim a velte toh; avek in khopi li.

⁴⁰Hiai tengteng Levi pawl inkuan dangte Merari suante pawl a inkuan uh dungzui zel a, a khopite uh ahi. Huchi in a tantuam uh khopi sawmlehnih ahi.

⁴¹Israel suante pawl tantuam apan Levi pawl khopi tengteng sawmli leh giat ahi, a kim a velte toh.

⁴²Hiai khopite’n a kimvel a neichiat ua; khopi tengteng huchibang vek ahi uh.

⁴³Huchi in TOUPA’N a pipute uh kichiam a piak a na chiamsa gam tengteng Israelte a pia hi. Amau huai gam a luah ua, asung ah a tengta uhi.

⁴⁴TOUPA’N a pipute uh kiang a kichiam a, a na chiamsa bang ngei in munchih ah muanna a pia a, a melma tengteng uh kuamah a ma ua pangzou himhim a omkei uhi. TOUPA’N a melma tengteng a khut uah a pevek hi.

⁴⁵TOUPA’N Israel inkuante kiang a, a hoih lam thu a na gen tengteng vuaksuak khat leng a omkei a, a hongtung vek hi.