Read Paite Chin JOSHUA 22 Bible Online

JOSHUA 22 - Paite Chin bible

JOSHUA 22

¹Huaikhit in Joshua in Reuben pawlte, Gad pawlte leh Manasseh nam kimkhatte a sam hi.

²A kiang uah, “TOUPA sikha Mosi in hon thupiak peuhmah na zuita ua, ken thu k’on piak peuhmah leng na zuita uhi.

³Tuni pha in na unaute uh na taisan kei ua, TOUPA na Pathian un hihdia thu a honpiak na zuita uhi.

⁴TOUPA na Pathian un a kiang ua a na gensa bang in, na unaute uh muanna a peta hi. Huaiziak in, TOUPA sikha Mosi in Jordan gal a na tantuam ding ua a hon piaksa gam ah, na puanin kaihte uah pai nawnta un.

⁵TOUPA sikha Mosi in TOUPA na Pathian uh it a, a lampi tengteng tawn a, a thupiakte zui a, amah len chinten a, na lungtang tengteng uleh na kha tengteng ua amah na sem chiatchiat dia a hon thupiakte, huai thupiak leh dante pilvangtak in limsak un” a chi hi.

⁶Joshua in amau a vualzawl a, a paisakta hi. Huchi in a puanin lam uah a paita uhi.

⁷Manasseh nam kimkhatte Mosi in Bashan gam ah tantuam a pia a; a kimkhat dangte Joshua in tumlam pang ah Jordan gal ah a unaute lak ah tantuam a pezawta hi. Joshua in a inlam ua a paisakdek lai in a vualzawl hi.

⁸A kiang uah, “Na puanin lam uah hauhsakna tamtak toh paita unla, gan tampi toh, dangka toh, dangkaeng toh, dal toh, sik toh, silhlehten tampi toh. Na melmate ua pan na gallakte uh unaute toh kihawm dialdial un” a chi hi.

⁹Reuben suante, Gad suante leh Manasseh nam kimkhatte a kiknawn ua, Kanan gam Shiloh khua apan Israel suante kiang apan Gilead gam, TOUPA’N Mosi zang a thu a na piak bang in amau tantuam ding mawng a sehsa gam a pai din a pawtkheta uhi.

¹⁰Kanan gam a Jordan gamgi a va tun un Reuben suante, Gad suante leh Manasseh nam kimkhatte’n Jordan lui gei ah maitam lianpi kholang mahmah khat a doh uhi.

¹¹Ngai in, Reuben suante, Gad suante leh Manasseh nam kimkhatte’n Kanan gamchin tak, Jordan gamgi, Israel suante gam lampang ah maitam a doh uh, chih Israelte kiang ah kuahiam khat in a va hilh hi.

¹²Israel suante’n hiai thu a zak un, Israel suan mipi tengteng amaute dou tum in Shiloh khua ah a kikhawm uhi.

¹³Israel suante’n Gilead gam a Reuben suante, Gad suante leh Manasseh nam kimkhatte kiang ah siampu Eleazar tapa Phinehas a sawl uhi.

¹⁴Milian sawm, Israel nam a inkuan a intekpente in Phinehas a zui uhi.

¹⁵Reuben suante, Gad suante leh Manasseh nam kimkhatte kiang Gilead gam ah a hoh ua, a kiang uah,

¹⁶Huchi in TOUPA mite tengteng in, “Bangziak a tuni a TOUPA tung a heltum a maitam doh a, TOUPA lehngatsan na hi ua”? a chi uhi

¹⁷Peor mun a tatsiatnate, ei adia neu lua a sim theih ahi maw? Tunitan in leng huai a i khelhna ua pan silsiang i hi naikei ua, TOUPA mipite lak ah hipi leng napi in leng.

¹⁸Tuni a TOUPA lehngatsan na tup maizen uh? Huchi in tuni’n TOUPA tung ah na na helta maimah ua, zingchiang a zaw Israel mipi tengteng tung a Amah heh ding eive.

¹⁹Na gam luah uh sianglou ahihleh, TOUPA gam, TOUPA biakbuk omna mun ah hongpai unla, ka lak uah hongteng un. Himahleh TOUPA i Pathian un a chihlouh maitam dang bawl in TOUPA tung ah hel kei unla, kou tung ah leng hel kei un.

²⁰Zer tapa Akan in hamsiat thil ah a na hihkhial a, Israel mipi tengteng tung ah hehna a hongom ahi kei maw? Huai mi tatsiatna ah amah kia a mangthang tuam kei hi’ ” a chi uhi.

²¹Reuben suante, Gad suante leh Manasseh nam kimkhatte’n Israel nam a intekpente a dawng ua, a kiang uah,

²²“TOUPA, pathiante Pathian, pathiante TOUPA Pathian in a thei. Israel pawl in leng thei hen! Ka maitam doh uh TOUPA lehngatsan a, hel tupna hiam thil hihkhelh tupna hiam a ka hih uleh, tuni in leng honhawi kei un,

²³Haltum thillatna ding hiam, nekding thillatna ding hiam, lemna thillatna ding hiam ahihleh, TOUPA mahmah in thukhen hen.

²⁴‘Tunung chiang in na suante un ka suante uh kiang ah, Nou TOUPA, Israelte Pathian na zat phakna uh bang om ahia?

²⁵Nou Reuben suante leh Gad suante aw, TOUPA’N kou leh nou adin Jordan gamgi din a bawl hi. TOUPA ah tantuam na neisam kei uh, a honchi kha ding uh, chi a, pilvan ziak a a ziak neitak a ka hih uh ahi. Na suante un kou suante TOUPA laudan theilou in a bawl kha thei uhi.

²⁶Huaiziak in, kisa un, maitam i bawl ding uh, haltum thillatna ding leh kithoihna ding bel hilou in.

²⁷Kou leh, nou leh i nung ua i suante kikal ah theihpihna ahi dia, huchi in ka haltum thillatte uh leh ka kithoihnate uh leh ka lemna thillatte ua TOUPA na ka sep theihna ding uh leh na suante un leng tunung chia ka suante uh kiang a TOUPA ah tantuam na neisam kei uh, a honchih louhna ding un, ka chi ua ahi.

²⁸Huaiziak in, hichi ahi ding a, tunung chiang a, ka kiang uh hiam, ka suante uh kiang uh hiam a huchibang a, a honchih chiang ua kou, En ve ua, ka pipute un TOUPA maitam a bawl uh omdan, haltum thillatna ding leh kithoihna ding ahi kei a, kou leh nou kikal a theihpihna ahizaw hi, ka chihna ding ua, ka hih uh ahi.

²⁹TOUPA tung a hel a TOUPA lehngatsan a, TOUPA ka Pathian uh maitam, a biakbuk chin a maitam kia lou haltum thillatna ding hiam, nekding thillatna ding hiam, theihpihna ding hiam a maitam bawl ka hih louh dan uh” a chi uhi.

³⁰Siampu Phinehas leh a kiang a om mipi milian, Israel pawl nam intekpente’n Reuben suante leh Gad suante leh Manasseh suan kimkhatte thugen a zak un a kipaksak mahmah hi.

³¹Siampu Eleazar tapa Phinehas in Reuben suante leh Gad suante leh Manasseh suan kimkhatte kiang ah, TOUPA tung a thil na hihkhelh louh ziak un, tun zaw TOUPA i lak ua om ngeina ahi, chih ka thei tave ua. Huchi in Israel suante TOUPA khut apan na honkheta uh, a chi uhi.

³²Huchi in siampu Eleazar tapa Phinehas leh milian pawl, Reuben suante leh Gad suante apan leh Gilead gam apan Kanan gam ah Israel suante kiang ah a kiknawnta ua, thu a va tun nawn uhi.

³³Huai thute’n Israel suante a kipaksak mahmah a; Israel suante’n Pathian a phatta uh. Huchi in Reuben suante leh Gad suante dou a, a tenna gam uh suksiat sak din kuankhiat a tum nawn kei uhi.

³⁴Reuben suante leh Gad suante’n huai maitam pen ‘theihpihtu’ a chi uh. “TOUPA, Pathian a na hingei chih i kikal ua theihpihtu ahi ngal a” a chi uhi.