Read Paite Chin JOSHUA 23 Bible Online

JOSHUA 23 - Paite Chin bible

JOSHUA 23

¹Hichi ahi a, TOUPA’N Israelte a melma tengteng apan galmuanna a piak nung hun sautak a painungin Joshua a hong upa in, a hong tekta hi.

²Joshua in Israel tengteng, a upate leh a intekpente, a vaihawmmite leh a heutu teng uh a samsaka, a kiang uah, “Ka upa in, ka tekta hi.

³TOUPA na Pathian un noute ziak a hiai nam tengteng tung a a thilhihte na muta ua; TOUPA na Pathian un, Amahmah in nou adin gal a hon dousak hi.

⁴Ngai un, Jordan lui leh tumlam Tuipi Lian kikal a nam omlaite zou in, aisan in na tantuam ding un k’on pia hi.

⁵TOUPA na Pathian un na ma uah amau a delhkhe dia, na muhbat louhna uah a hawlmang vek ding. TOUPA na Pathian un na kiang ua a gensa bang in a gam uh na luah ding uhi.

⁶Huaiziak in Mosi dan laibu a gelh tengteng taklam ah hiam veilam ah hiam a na pialsan hetlouhna ding un hangsantak in zui un.

⁷Hiai nam na lak ua omlaite toh tengkhawm kei un. A pathiante uh min gen kei unla, a minte un kichiam kei unla, a na uh leng sem kei unla, a ma uah leng kun in a na uh sem kei un.

⁸Himahleh tuni tan a na hih gige bang un, TOUPA na Pathian uh lenkip un.

⁹TOUPA’N na ma uah chi thupitak leh hattakte a delhkhe khinta hi. Na ma uah tunitan in kuamah pangzou himhim a omkei uhi.

¹⁰Na lak ua mi khat in mi sang khat a delh dia, na kiang ua a gensa bang in, TOUPA na Pathian un nou adin gal a hondou sak ngal a.

¹¹TOUPA na Pathian uh it ding in pilvang mahmah un.

¹²Pilvang lou a, na lehngatsan himhim ua, hiai namte lak a omlaite, na lak ua omlaite ngei, na pawlmat ua, amaute toh pasal leh zi a na kineih ua, amaute na luppih ua, amau leng nou a hon luppih u le zaw,

¹³TOUPA na Pathian un hiai namte na mitmuh un a hon delhkhiak sak nawn kei ding hi. TOUPA na Pathian un hiai gam hoihtak a honpiak apan na manthat vek masiah uh amaute nou adin pial leh thang leh na pang ua din khetna chiang leh na mit ua din ling a honghi zaw ding uh, chih teltak in thei un.

¹⁴Ngai un, tuni in lei pumpi dan bang in ka paita ding hi. TOUPA na Pathian un na tungtang uh, a hoih lam, a na gensa tengteng vuaksuak khat lel leng a omkei, chih na lungtang tengteng uh leh na lungsim tengteng un na thei uhi. Na tung uah a hong tungvekta a, khat lel leng vuaksuak a omkei hi.

¹⁵huaiziak in hichi ahi ding a, TOUPA na Pathian un thil hoih na kiang ua a gen tengteng na tung ua a hong tunvek tak mah bang in, TOUPA na Pathian un a honpiak hiai gam hoih tak apan a hon manthat sak vek masiah TOUPA’N thil hoihloute na tung uah a tung sak ding hi.

¹⁶TOUPA na Pathian un a hon thupiak thukhun na tatlek san ua, pathian dangte nasem a kun a na biak uleh, TOUPA hehna na tung uah a om dia, a honpiak gam hoih tak apan na mangthang pah ding uhi” a chi hi.