Read Paite Chin JOSHUA 24 Bible Online

JOSHUA 24 - Paite Chin bible

JOSHUA 24

¹Huan, Joshua in Israel nam tengteng Sekem ah a samkhawm a, Israel upate, a intekpente, a vaihawmmite leh a heutute uh a samsaka; Pathian ma ah a hong kimu sak chiat uhi.

²Joshua in mi tengteng kiang ah, “TOUPA, Israelte Pathian in hichi in a chi. Na pipute uh nidanglai in lui khen lam ah a teng ua, Abraham pa leh Nahor pa Terah hialte leng. Amaute’n pathian dangte nna a sem uhi.

³Na pu uh Abraham huai lui gal apan ka pikhia a, Kanan gam teng tawnsuak in ka pi a, a suante ka pungsak a, Isak ka pia hi.

⁴Isak kiang ah Jakob leh Esau ka pia a; Esau tantuam din Seir tang ka pia a; Jakob leh a tate Aigupta ah a paisuk uhi.

⁵Mosi leh Aron ka sawl a, a lak ua thillamdang hih in Aigupta ka gawt a: huaikhit in amau k’on pikhia hi.

⁶Na pipute uh Aigupta gam apan ka pikhia a, tuipi na hongtung ua; Aigupta mite’n na pipute uh kangtalaite leh sakol tungtuang mite toh Tuipi San tan in a nungdelh uhi.

⁷Amau TOUPA a sam ua, Aigupta mite toh na kikal uh a mialsak bikbek a, amaute tuipi tuamsak in a khuhkhum sak a; Aigupta gam a ka thilhih na mit un a mu a; gamdai ah sawtpi na teng uhi.

⁸Jordan lui gal a om Amorte gam ah ka honpi a; amau a hondou uh. Na khut uah amau k’on pia a, a gam uh na luahta uh. Amau k’on hihmang sakta hi.

⁹Moab kumpipa Zippor tapa Balak a hong kisa a, Israel a dou a; Beor tapa Balaam nou hon hamsiat din a samsak hi.

¹⁰Himahleh Balaam thu ka ngaikhe kei hi. Huaiziak in nou a hon vualzawl zawsopta hi. Huchi in a khut apan k’on honkheta hi.

¹¹Jordan lui na kan ua, Jeriko khua na tung tou ua; Jeriko khomite’n a hon na dou ua, Amorte, Perizte, Kanante, Hitte, Girgaste, Hivte leh Jebuste toh; amau na khut uah k’on peta hi.

¹²Na ma uah tunpi ka sawl a, huai in na ma uah amau a delh a, Amorte’ kumpipa nihte tan in leng. Himahleh na namsau un hiam, na thal un hiam in ahi kei hi.

¹³Na sepkhiak hetlouh uh gam leh na bawl hetlouh uh khopite k’on pia a, huaite ah na teng ua; na suanlouh uh grephuan leh olive huan apan na ne uhi.

¹⁴Huaiziak in TOUPA laudan siam unla, chitak leh thutak in Amah na sem un. Na pipute un Luigal leh Aigupta gam a, a na a sep uh pathiante koih khia unla; TOUPA na sem un.

¹⁵TOUPA na sep hoihlou a na theih uh leh tuni in kua na ahia na sep ding uh, tel un. Na pipute un Luigal a, a na a sep uh pathiante hia, na luah uh gam a Amorte pathiante? Kei leh inkuante’n zaw TOUPA na ahi ka sep ding uh” a chi hi.

¹⁶Mipite’n, “TOUPA Pathian paisan a, pathian dangte na ka seplouh ding dan uh.

¹⁷TOUPA i Pathian ngei ahi, i pipute toh Aigupta gam saltanna inn apan hon pikhia a, i mitmuh a chiamtehna thupitak tak hih a, i paina teng leh mipi tengteng i nawk paisuakna ah leng hon vengbit hi.

¹⁸TOUPA’N i ma ngei uah namchih huai gam a om Amorte ngei a delhkhe vek hi. Huaiziak in kou leng TOUPA na ahi ka sep ding uh; Amah lah ka Pathian uh ahi ngal a” chi in a dawng uhi.

¹⁹Joshua in mipite kiang ah, “TOUPA nna nasem theikei ding uh. Amah lah Pathian siangthou ahi ngal a. Mullithat Pathian ahi a; na tatleknate uh leh na khelhnate uh a ngaidam kei ding hi.

²⁰TOUPA na paisan ua, namdang pathiante nna nasep uleh, na tung ua thil hoih a hihkhit nung in a hong kihei dia, hon hihna in a honhih mangthang ding” a chi hi.

²¹Mipite’n, Joshua kiang ah, “Hilou e, TOUPA na ka sem kinken zaw ding uh” a chi uhi.

²²Joshua in mipite kiang ah, “A na sep tum in TOUPA na telta uh, chih a theihpihtute noumau mah na hi uh” a chi hi. Amau, “Theihpihtute ka hi uh” a chi uhi.

²³Amahmah in, “Huchi ahihleh na lak ua namdang pathian omte koihmang unla, na lungtangte uh TOUPA, Israelte Pathian lam ah awnsak un” a chi hi.

²⁴Mipite’n Joshua kiang ah, “TOUPA i Pathian na ka sem ding ua, a thu ka zui ding uh” a chi uhi.

²⁵Huai ni’n Joshua in mipite toh kikal ah thu a khung a, Sekem khua ah dan leh vaihawmna a sehsak hi.

²⁶Joshua in hiai thu Pathian Dan Laibu ah a gelh a; suang lianpi a la a, TOUPA Mun Siangthou chin a tawsaw nuai ah a phut hi.

²⁷Joshua in mipi tengteng kiang ah, “Ngai un, hiai suang i thu hon theihpihtu hi hen. TOUPA’N i kiang ua thu a gen tengteng a zavekta hi. Huaiziak in na thu uh hon theihpihtu ahi ding hi, huchilou in zaw Pathian na kitheihmohbawl kha ding uh” a chi hi.

²⁸Huchi in Joshua in mipite a tantuam gamchiat uah a paisakta hi.

²⁹Hichi ahi a, huai thilte khit in Nun tapa Joshua, TOUPA sikha kum za leh sawm a upa a hih in a sita hi.

³⁰Gaash tang mallam pang, Ephraim tanggam a amah tantuam gamgi sung Timnath Serah ah a vuita uhi.

³¹Joshua damsung leh amah khup a dam, TOUPA’N Israelte adia thil a hih tengteng theihpih mite damsung in Israelte’n TOUPA na a sem uhi.

³²Israel suante’n Aigupta gam apan Joseph guhte a puak touh uh Sekem a Sekem pa Hamor tate apan Jakob in dangka za khat a a leina mun ah a vui ua; huai mun Joseph suante tantuam ahita hi.

³³Huan Aron tapa Eleazar a si a; Ephraim tang gam a a tantuam dia a piak a tapa Phinehas tang ah a vui uhi.