Read Paite Chin JOSHUA 3 Bible Online

JOSHUA 3 - Paite Chin bible

JOSHUA 3

¹Huan, Joshua zingkhang in a thou a, Israel suan tengteng toh Shittim apan a kisuan ua, Jordan lui a tung uhi. A galkah ma un huai ah a giak uhi.

²Hichi ahi a, ni thum nung in heutute’n giahphual a vatawn vialvial uhi.

³“TOUPA na Pathian uh thukhun bawm leh siampute, Levi chite’n a zawn uh na muh chiang un na omna ua kipan kisuan unla, na zui ding uh ahi.

⁴Himahleh nou toh a kal tehna tong sang nih vel ahi ding ahi. Naih kei unla, huchi in na paina ding lampi na theithei ding uhi. Hiai lampi lah tuma lam in na tawn ngei ngalkei ua” chi in mipite thu a pia uhi.

⁵Joshua in mipite kiang ah, “Kihih siangthou un, zingchiang a Toupa’n na lak ua thillamdang mahmah hih ding ahi” a chi hi.

⁶Joshua in siampute kiang ah, “Thukhun bawm zawng unla, mipite ma ah galkah un” a chi hi. Huchi in thukhun bawm a zawng ua, mipite ma ah a paita uhi.

⁷TOUPA’N Joshua kiang ah, “Mosi kiang a ka om bang in na kiang ah ka om ding, chih a theihtheihna ding un, tuni in Israel tengteng mitmuh in k’on pahtawi pan ding hi.

⁸Thukhun bawm zawng siampute, Jordan luigei na tun chiang un, Jordan lui ah dingden un, chi in thu pia in” a chi hi.

⁹Joshua in Israel suante kiang ah, “Hongpai unla, TOUPA na Pathian uh thu hong ngaikhia un” a chi hi.

¹⁰Joshua in, “Hiai ah Pathian hing na lak uah a om a, na ma uah Kanante, Hitte, Hivte, Perizte, Girgaste, Amorte leh Jebuste a delhkhe ngeingei ding hi.

¹¹Ngai un, lei pumpi Toupa thukhun bawm in na ma uah Jordan lui a kan hi.

¹²Israel namte lak a mi sawmlehnih, namchih sik in mi khat zel telkhia un.

¹³Hichi ahi ding a, TOUPA lei pumpi Toupa bawm zawng siampute khepek Jordan tui a a kingaktakin, Jordan tui, saklam apan tui hongluangte a kitat dia; a hong kiching venvon ding” a chi hi.

¹⁴Hichi ahi a, mipite Jordan lui kan dia a puanin ua kipan a pawtlai un, thukhun bawm zawng siampute mipite ma ah a pai uhi.

¹⁵Bawm zawngte Jordan lui a va tung ua, bawm zawng siampute khe in tuigei a siktakin, buhlak sung teng Jordan lui a kuang tengteng ah tui a let gige hi.

¹⁶Saklam apan tuipi luanglai a khawlta a, gamla kuamtak a Zarethan gam chin a Adam khua ah a hong kiching hi. Arabah tuipi, chi tuipi lam a luangsuk lai a kitat geih a; huchi in mipite Jeriko khozawn tak ah a galkahta uhi.

¹⁷TOUPA thukhun bawm zawng siampute Jordan luilai ah, leihul ah ading ua, mipi tengteng Jordan lui a galkah vek uhi.