Read Paite Chin JOSHUA 4 Bible Online

JOSHUA 4 - Paite Chin bible

JOSHUA 4

¹Huan, hichi ahi a, a nam pumpi in Jordan lui a galkah siang nung un, TOUPA’N Joshua kiang ah,

²“Mipite lak a mi sawmlehnih, namchih a mi khatzel telkhia inla,

³A kiang uah, Jordan luilai, siampute dinna laitak a suangte sawmlehnih la unla, pawphei unla, giahphual, tu zan a na giahna ding uah koih un, chi in thu pia in” a chi hi.

⁴Huchi in Joshua in Israel suante lak a mi sawmlehnih, namchih a mi khat zel a telkhiakte a sam a;

⁵Joshua in a kiang uah, “Toupa na Pathian uh ma ah bawm in Jordan luilai ah galkah unla, Israel suante a nam zah zel in, michih in suang khatchiat pua hen.

⁶Hiaite na lak uah chiamtehna a honghi dia, tunung chiang in na tate un, hiai suangte bang na chihna uh ahia? chi a a hondot chiang un,

⁷Nou a kiang uah, TOUPA thukhun bawm ma a Jordan tuite a hong kan tak ziak in ahi. Jordan a kanlai un, Jordan tuite a hong kitat a ahi. Hiai suangte Israel suante’n tangtawn a a theihgigena ding uh ahi, na chi ding uh” a chi hi.

⁸Israel suante’n Joshua thupiak bang in a hih ua, Israel suante’n a nam zah zel in, Jordan luilai a suang sawmlehnih a la ua; a giahphual uah, a paw phei ua, huai ah a koih uhi.

⁹Thukhun bawm zawng siampute dinna laitak Jordan luilai ah Joshua in huai suang sawmlehnihte a phut a; huaite tunitan in a omlai uhi.

¹⁰Mosi in Joshua thu a na piak tengteng bang a TOUPA’N mipite kiang a hih dia Joshua thu a piak a hih zohvek mateng uh siampu bawm zawngte Jordan luilai ah ading nilouh uh. Mipite a kinoh ua, a galkahta uhi.

¹¹Hichi ahi a, mipi tengteng a galkah siangvek nung un, TOUPA bawm leh siampute leng mipi mitmuh in a galkahta uhi.

¹²Reuben suante, Gad suante leh Manasseh nam kimkhatte Mosi in a kiang ua a na genkhitsa bang in, Israel suante ma ah kigalvan in a galkah uh.

¹³Galvan a kivan dimdiam mi sing li vel galdou din Jeriko phaizang ah TOUPA ma ah a galkah uhi.

¹⁴Huai ni’n TOUPA’N Israel tengteng mitmuh in Joshua a tawisang a; Mosi a lauh mah bang un a damsung teng in amah a lau uhi.

¹⁵TOUPA’N Joshua kiang ah thu a gen a:

¹⁶“Siampute, thu theihpihna bawm zawngte Jordan lui apan hongpawt ding in thupia in” a chi hi.

¹⁷Joshua in siampute, “Jordan lui apan hong pawtta un” chi in thu a pia hi.

¹⁸Hichi ahi a, siampute, TOUPA thukhun bawm zawngte Jordan luilai apan a hongpawt ua, siampute khete’n leihul a sik tak in, Jordan tuite a luan ngeina bang un a hongluang nawn ua, a ma mah bang in a kuang ah a luanglet nawn hi.

¹⁹Mipite a kha khatna, ni sawm ni’n Jordan lui apan a pawt ua, Jeriko suahlam pang Gilgal ah giahphual a satta uhi.

²⁰Suang sawmlehnih, Jordan lui apan a puakkhiak uh, Joshua in Gilgal ah a phut hi.

²¹Israel suante kiang ah, “Tunung chiang a na suante un a pate uh, hiai suangte bang chihna ahia? chi a hondot chiang un,

²²‘Israelte’n Jordan lui leihul ah a galkah ua ahi, chi in na suante uh na theisak ding uhi.’

²³TOUPA na Pathian un nidanglai a Tuipi San i galkah masiah ua, i ma ua a na kangtat sak mah bang in, TOUPA na Pathian un Jordan tuite na galkah masiah uh na ma uah a kangtat sak a ahi.

²⁴Lei a nam chiteng in TOUPA khut a na hat ngei, chih a theih ua, TOUPA na Pathian uh tangtawn a a lauh theihna ding un” chi’n a gen hi.