Read Paite Chin JOSHUA 5 Bible Online

JOSHUA 5 - Paite Chin bible

JOSHUA 5

¹Huan hichi ahi a, Jordan lui khen suahlam a om Amorte kumpipa tengteng leh tuipi gei a om Kanan gam kumpipa tengtengte’n a galkah masiah uh TOUPA’N Jordan tuite Israel suante ma ah a kangtat sak, chih a na zak un, Israel suante ziak in a lungtang uh a na zulkhin a, lauthawng lou himhim a omkei uhi.

²Huailai in TOUPA’N Joshua kiang ah, “Temta hiam kibawl inla, Israel suante zek a nihveina din sumsak in” a chi hi.

³Joshua in temta hiamte a kibawla, Israel suante Gibeth Haraloth ah a zek uh a sumsak hi.

⁴Joshua in a zeksumna san hiai ahi: Aigupta gam apan pawt tengteng, pasal galdoumi tengteng Aigupta gam apan a pawt khiak nung un lamkal ah gamdai ah a sihkhittak ziak uh ahi.

⁵Aigupta gam apan pawt tengteng zeksumsa vek ahi ua; himahleh Aigupta gam apan a pawt ua gamdai a lamkal a piang tengteng bel zeksum ahi kei uhi.

⁶TOUPA aw a ngaihkhiak noplouh ziak ua mipi tengteng, Aigupta gam apan hongpawt galdoumite tan hihman a a omvek tan un Israel suante gamdai ah kum sawmli a vialvak uhi. TOUPA’N amau pi leh pute kiang a nawitui leh khuaizu luanna gam kichiam a piak a na chiam, huai gam mu lou dia TOUPA a kiang uah a na kichiamta hi.

⁷A suante uh amau sik a a khan letsakte Joshua in a zek uh a sum sak hi. Lamkal a a zek uh sum a hih louh ziak in zeksum louh a na hi him uhi.

⁸Hichi ahi a, mipi tengteng zek a sum khit un, a dam mateng uh amau giahphual chiat uah a om uhi.

⁹TOUPA’N Joshua kiang ah, “Tuni in Aiguptate’n nou a hon muhsitna uh noumau apan ka khuk mangta” a chi hi. Huchi in tunitan in huai mun Gilgal a chi uhi.

¹⁰Israel suante’n Gilgal ah giahphual a sat ua; Jeriko phaizang ah huai kha, a ni sawmlehli ni’n Paikan Ankuang a lui uhi.

¹¹Paikan khit a zingmah in huai gam a tanghou silngou sohlouh leh vaimim kan a ne uhi.

¹²Huai gam a buh a nek ni zing apan manna a keta kei a; Israel suante’n manna leng a mu nawn kei uhi. Huai kum in Kanan gam a buh leh bal a ne zawta uhi.

¹³Huan, Joshua Jeriko khaw kiang chin a, a omlai in a dak a, a entou a, ngai in, a mazawn chin ah mi khat a namsau phawisa tawi in a na ding hi. Joshua in a va naih a, a kiang ah, “Kou lam a pang na hi hia, ka melmate uh lam a pang?” a chi hi.

¹⁴Aman, “Hilou e, TOUPA sepaihte heutu dia hongpai ka hi zaw” a chi hi. Huchi in Joshua lei ah a khupboh a, amah a bia a, a kiang ah, “Ka Toupa’n a sikha kiang ah bang gen ding nei ahia?” a chi hi.

¹⁵TOUPA sepaihte heutu in Joshua kiang ah, “Na khepek apan na khedap phel in. Na dinna Mun Siangthou ahi” a chi a; huchi in Joshua in a phelta hi.