Read Paite Chin JOSHUA 6 Bible Online

JOSHUA 6 - Paite Chin bible

JOSHUA 6

¹Jeriko khua Israel suante ziak in a kikhak bikbek a; kuamah a pawt kei ua, kuamah leng a lut kei uh.

²TOUPA’N Joshua kiang ah, “En in, Jeriko leh a kumpipa uh leh a mi hat hangsante uh na khut ah k’on pekhinta hi.

³Galdoumi tengteng in khopi kimvel in khatvei na va velsuak phot ding uh. Huchibang in ni guk sung na hih ding uh ahi.

⁴Siampu sagih in bawm malam ah belampa ki pengkul sagih a tawi ding ua, a ni sagih ni’n khopi sagihvei na velsuak ding ua, siampute’n pengkul a mut ding uh.

⁵Hichi ahi ding a, belampa ki a mutging uh na zak chiang un, mipi tengteng ngaihtak in kikou uhen. Huchi in khopi kulh a chim dia, mipi amau mazawn chiat ah a paitou ding uh” a chi hi.

⁶Nun tapa Joshua in siampute a sam a, a kiang uah, “Thukhun bawm zawng unla, siampu sagih in TOUPA bawm malam ah belampa ki pengkul sagih tawi uhen” a chi hi.

⁷Aman mipite kiang ah, “Pai zel unla, khopi velsuak un, mi kigalvante TOUPA bawm malam ah pai zel uhen” a chi hi.

⁸Hichi a hong hita a, Joshua in mipite kiang a thu a genkhit in TOUPA ma a belampa ki pengkul sagih tawi siampu sagihte a pai zel ua, pengkul a mut ua; TOUPA thukhun bawm in a zui hi.

⁹Mi kigalvante pengkul mut siampute ma ah a pai ua, nungdal mite’n bawm a masuan ua, siampute’n paikawm in pengkul a mut uhi.

¹⁰Joshua in mipite kiang ah, “Kikou kei unla, na aw u leng zak hi kei hen. Kikou dia thu k’on piak ni a tun mateng na kam ua apan thu pawtkei hen. Huai hun chiang in na kikou ding uh” chi in thu a pia hi.

¹¹TOUPA bawm khopi khatvei velh in a velsuak sak a; giahphual ah a pai ua, giahphual ah a giak nawn uhi.

¹²Joshua zing khang in a thou a, siampute’n TOUPA bawm a zawng uh.

¹³TOUPA bawm ma ah belampa ki pengkul sagih tawi siampu sagihte a pai ua, pengkul a mut uh. Mi kigalvante a ma uah a pai ua; nungdalte’n TOUPA bawm a hon masuan ua, siampute’n a paikawm un pengkul a mut uhi.

¹⁴A ni nih ni’n khopi khatvei a velsuak nawn ua, a giahphual uah a kiknawn uh. Huchibang in ni guk a hih uhi.

¹⁵Hichi ahi a, a ni sagih ni’n zingkhang, phalvak in a thou ua, a hihdan ngeimah un sagihvei a velsuak ua; huai ni kia in khopi sagihvei a velsuak uhi.

¹⁶Hichi ahi a, a sagihveina a siampute’n pengkul a muttak un Joshua in mipite kiang ah, “Kikou un: TOUPA’N Khopi a hon pekhinta hi.

¹⁷Khopi leh asung a thil om tengteng TOUPA hamsiat ahi. Rahab kizuaknu kia, amah leh a inn sung a a kiang a om tengteng bel i mi sawlte uh a na sel ziak in hinghawi ding ahi.

¹⁸Nou zaw hamsiat thilte apan kihuikhe hiau un, huchilou in zaw, hamsiat thilte la in noumau mah hamsiat in na omloh kha ding uhi. Israelte giahphual hamsiat a omsak in na buaisak kha ding uhi.

¹⁹Dangkasik, dangkaeng, dal leh sik tuium-belsuan teng ahihleh TOUPA a tuam ahivek hi. Toupa sum in a koih ding ahi” a chi hi.

²⁰Mipite a kikou ua, siampute’n pengkul a mut uh. Hichi ahi a, mipite’n pengkul ging a zaktak un, ngaihtak in a kikou ua, kulh a chimta hi. Huchi in mipite a mazawn chiat uah a paitou ua, khopi ah a lut ua, khopi a lata uhi.

²¹Khopi sung a mi tengteng, numei leh pasal, a neu a lian, bawngpa, belam leh sabiltung teng namsau in a satlum vek uhi.

²²Joshua in mi nih, gam va enkhete kiang ah, huai kizuaknu inn ah va lut unla, a kiang a na kichiamsa bang un huai numei leh a neih teng honpi khia un, a chi hi.

²³Enkhemi tangvalte a va lut ua, Rahab, a nu leh pa, a sangamte leh a neih teng a hon pikhia ua, a tanau teng leng a hon pikhia ua; Israelte giahphual pawlam ah a omsak uhi.

²⁴Khopi leh asung a thil om teng mei in a halvek ua; dangkasik, dangkaeng, sumeng leh sik tuium-belsuan teng kia TOUPA inn a sumkoihna ah a koih uhi.

²⁵Himahleh Rahab kizuaknu leh a neihteng leh a pa inkuante Joshua in a hinghawi vek a; Israelte lak ah tunitan in a tenglai uhi; Jeriko khua enkhe dia Joshua in a misawlte a na humbit ziak in.

²⁶Huailai in Joshua in, Hiai Jeriko khopi hon lamnawn peuhmah TOUPA ma ah hamsiat in om hen. A suangphum phummi ta masa leh a kulh kongpite tungkhemi ta tumpen leng hamsiat in om hen, chi in amau a hilh chiatchiat hi.

²⁷TOUPA Joshua kiang ah a om a; gam pumpi ah a min a hong thangta hi.