Read Paite Chin JOSHUA 7 Bible Online

JOSHUA 7 - Paite Chin bible

JOSHUA 7

¹Himahleh Israel suante hamsiat thilte ah a hong talekta uhi. Judah nam a Zerah tapa Zabdi, huai tapa Karmi, huai tapa Akan in hamsiat thilte a na lata a, Israel suante tung ah TOUPA a hehta hi.

²Joshua in Jeriko khua apan Bethel suahlam Beth-Aven chin a om Ai khua ah mi a sawl a, a kiang uah, “Va hohtou unla, gam va enkhia un” chi in a gen hi. Mite a va hohtou ua, Ai khua a va enkhia uhi.

³Joshua kiang ah a kiknawn ua, a kiang ah, “Mi tengteng hohtou chitchiat kei uhen. Mi sang nih hiam sang thum hiam va hohtou uhenla, Ai khua dou le uh. Mi tengteng va hihgim chitchiat ding ahi kei; tawmchik kia lah ahi ngal ua” a chi uhi.

⁴Huchi in mipi lak a mi sang thum huai ah a hohtou ua, Aite ma ah a hong taikek uhi.

⁵Aite’n mi sawmthum leh guk a na that ua; kulh kongpi chin apan Sebarim phahialin a hondelh ua, a kumsukna ah a that uhi. huaiziak in, mite lungtang a zulkhina, tui bang a hong hita hi.

⁶Joshua in a puante a botkek a, TOUPA bawm ma ah amah leh Israel upate a mai ua leisi in nitaklam tan in a khupboh uh. A lu uah leivui a buak uhi.

⁷Joshua in, “Maizen! TOUPA Pathian aw, bang ding in ahia, hiai mipite hih manthat dia, Amorte khut a piak dia, Jordan lui na pi galkai mahmah? Jordan luigal ah lungkimtakin om hiathiat zaw mai le ung!

⁸TOUPA aw, hichi a melmate delh a Israelte a taikek mawk uh bang ka lohta dia oi?

⁹Kanante leh hiai gam a tengte’n a za ding ua, a honum ding ua, lei apan ka min uh hih mangthang ding eita ve ua. Na min thupi bang na chihta dia leh?” a chi hi.

¹⁰TOUPA’N, Joshua kiang ah, “Thou in, Bang a chia Khupboh nilouh na hia?

¹¹Israelte’n thil a hihkhial ua; zuih dia ka piak ka thukhun ah a talek ua, hamsiat thilte a la ua, a gu na lai ua, a sim im behlap ua, amau vanlak mahmah ah a simsel uhi.

¹²Huaiziak in ahi, Israel suante’n a melmate uh zoulou a, a melmate apan a taikek uh. Hamsiat in a omta ua ahi. Hamsiat a om pen na lak ua pan na hihmang kei leh k’on ompih nawn kei ding.

¹³‘Thou inla, mipite hihsiangthou photmai in’. A kiang uah, Zingchiang adin ki hihsiangthou un. TOUPA Israelte Pathian in, Israelte aw, na lak uah hamsiat thil a om a ahi. Na lak ua pan hamsiat thil na lakmang masiah uh na melmate uh na zou theikei ding uh.

¹⁴Zingchiang in a chichi a, na hong kilat ding uh ahi. Hichi ahi ding a, TOUPA’N huai chi a na mat pen a namnam a na hong kilat nawn ding uh ahi. TOUPA’N huai nam a na mat pen a inkuan kuan ua a hong kilat nawn ding uh ahi. TOUPA’N huai inkuan a na mat pen a malmal a a hong kilat nawn ding ahi.

¹⁵Hichi ahi ding a, kuapeuh hamsiat thil na la peuhmah, amah leh a neih tengteng mei a halvek ding ahi. TOUPA thukhun a tatlek san ziak leh, Israelte lak a thil gilou haihuai tak a hih ziak in, a chi” na chi ding hi.

¹⁶Joshua zingkhang in a thou a, Israelte a chichi in a hong kilang sak a; Judah namte mat a hong hita uh.

¹⁷Judah namte a hong kilang sak nawn a; Zerah namte a na man a; Zerahte inkuante a malmal in a hong kilang nawn ua; Zabdi mat a na hi.

¹⁸A inkuante a malmal in a hong kilang sak nawn a; huchi in Judah chi a Zerah tapa Abadi, huai tapa Karmi, huai tapa Akan mat a hong hita hi.

¹⁹Joshua in Akan kiang ah, “Ka tapa, TOUPA, Israelte Pathian thupina pia inla; a kiang ah kiphuang in. Na thilhih honhilh in. Kei kiang ah im ken” a chi hi.

²⁰Akan in Joshua a dawng a, a kiang ah, “TOUPA, Israelte Pathian tung ah thil ka na hihkhialta hi, hichibang in ahi ka na hih:

²¹‘Gallak lak a Babulon puan hoihtak leh, dangka sekel za nih leh dangkaeng tang sekel sawmnga buk ka mu a, ka enlah lua a, ka la mai hi. Ngai in, ka puanin sung a lei a selguk ahi a, dangka pen huai nuai ah a om’ ” a chi hi.

²²Joshua in mite a sawl a, puanin sung ah a vatai ua; ngai in, a puanin ah selguk ahi ngei a, a nuai ah dangka a na om hi.

²³Puanin sung a kipan a la ua, Joshua leh Israel suan tengteng kiang ah a hontawi ua; amau TOUPA ma ah a koih uhi.

²⁴Joshua leh Israel tengteng in Zerah tapa Akan dangka, puan, dangkaeng tang, a tapate, a tanute, a bawngpa, a sabiltungte, a belamte, a puanin leh a neih tengteng toh a pi ua; Akor guam ah a paitouh pih uhi.

²⁵Joshua in, “Bangdia honhih mangbang na hia? TOUPA’N tuni in nang leng a honhih mangbang ding hi” a chi hi. Huchi in Israel tengteng in suang in a deng ua; suang a a denkhit un mei in a hal uhi.

²⁶A tung ah suang a chiang vum ua, tunitan in a omlai hi. Huchi in TOUPA’N a heh petmahna a kiheisan hi. huaiziak in, huai mun min tunitan in Akor guam a chilai uhi.