Read Paite Chin JOSHUA 8 Bible Online

JOSHUA 8 - Paite Chin bible

JOSHUA 8

¹Huan, Toupa’n Joshua kiang ah, “Lau ken, lunglel sam ken. Galdou thei tengteng tonpih inla, thou inla, Ai khua ah hohtou in. Ngai in, Ai khaw kumpipa, a mite, a khua leh a gam na khut ah k’on peta hi.

²Jeriko leh a kumpipa uh tung a na hih bang in, Ai khua leh a kumpipa tung ah leng na hih ding hi. Gallak leh gante kia nou a tuam din nei un. Khopi nung ah guktan un” a chi hi.

³Joshua leh galdou thei tengteng Ai khua a hohtou din a kisata uh. Joshua in mi hat hangsan sing thum a telkhia a, zan in a sawlkheta hi.

⁴A kiang uah, “Ngai un, khopi nunglam ah khopi dou din guktan un. Khopi apan gamla lua ah pai kei unla, mansa in om gige un.

⁵Kei leh ka kiang a om tengteng in khopi ka honzuan ding uh. Hichi ahi ding a, tuma a mah bang in hongdou dia a hongpawt tak un, a ma uah i taikek ding uh.

⁶Hondelh din a hongpawt ding ua, khua apan gamla sim i ki hepkhiak tan in. Amau, ‘Tuma a mah bang in i ma uah taikek uh e,’ a chi ding ua; a ma uah i taikek ding uh.

⁷Guktanna apan na hong pawtkhe ding ua, khopi na la ding uhi. TOUPA na Pathian un na khut uah a honpe ding hi.

⁸Hichi ahi ding a, khopi na lak chiang un, khopi na hal ding uh. TOUPA thu bangzel in na hih ding uh ahi. Ngai un, thu k’on pekhin hi” chi in, thu a pia hi.

⁹Joshua in a kuansakta a, guktanna mun ah a hoh ua, Ai khaw tumlam ah Bethel leh Ai khaw kikal ah a om uh. Joshua bel huai zan in mipite lak ah a giak hi.

¹⁰Zingkhang in Joshua a thou a, mipite a kaikhawm a, amah leh Israel upate mipite ma ah Ai kholam ah a hohtou uhi.

¹¹Mi tengteng, a kiang a galdou thei omte tan in a hohtou ua, a va zuan ua, khopi chin ah a hohtou ua, Ai khaw mallam pang ah a giaktou uh. Ai khua toh a kikal uah guam a om hi.

¹²Mi sang nga a tonpih a, khopi tumlam a Bethel leh Ai khaw kikal ah a guktan sak hi.

¹³Mite, khopi mallam a sepaihte panmun leh khopi tumlam a guktanmite panmun hoihtak in a sep a; Joshua huai zan in guam lak ah a pai hi.

¹⁴Hichi ahi a, Ai khaw kumpipa’n huai a muhtak in, kintak in zingkhang in a thou a, huai khua a mite leh amah leh a lawite tengteng toh, a munseh Arabah zawn ah Israelte dou ding in a pawtta hi. Himahleh khaw nunglam ah amah dou din guktanmi a om uh chih a theikei hi.

¹⁵Joshua leh Israel tengteng zohsa bangtak in a om ua, gamdai lampi ah a tai uhi.

¹⁶Khopi a om tengteng amau delh din a samkhawm ua; huchi in Joshua a delh ua, khopi apan gamla sim ah khemkhiak in a omta uhi.

¹⁷Ai khua ah leh Bethel khua ah Israelte delhlou khat leng a omkei ua; khopi bangmah loukal a pawtsan in Israelte a delhta uhi.

¹⁸TOUPA’N Joshua kiang ah, “Na teipi tawi Ai kholam nga in lik in. Na khut a honpe ding ka hi” a chi hi. Joshua in a teipi khopi lamnga in a likta hi.

¹⁹Guktan mite a omna ua kipan a hong paikhe guih ua, a khut a zaktakin a tai ua, khopi ah a lutua, a lata ua; khua a halpah uhi.

²⁰Aite’n a nunglam uh a et uleh, ngai in, khopi meikhu vanlam a khutou a mu ua, a koilam lam ah leng tai theihna himhim a neikei ua; Gamdai a tai delhte’n a na lehdelh uhi.

²¹Joshua leh Israel tengteng in guktanmite’n khopi a lak ua, khopi meikhu paitou a muhtak un a kiknawn ua, Aite a that uhi.

²²Midangte amau dou din khopi sung apan a hong pawtkhia ua Israelte’n a kaltehta uhi. A khen a langkhat ah, a khen a langkhat ah a om uhi. Huchi in a that ua, khatlel leng hawi leh khah a neikei uhi.

²³Ai khaw kumpipa a hingmat ua, Joshua kiang ah a honpi uhi.

²⁴Hichi ahi a, Israelte’n Ai khaw mi gamlak a om tengteng, gamdai gam a amau a vadelhna mun uah namsau in a thatvek uhi. Huaikhit in Israelte tengteng Ai khua ah a kiknawn ua, asung a om tengteng namsau in a vathat uhi.

²⁵Huai ni a si tengteng numei leh pasal sing khat leh sang nih ahi ua, Ai khua a pasal teng a sikhin vek uhi.

²⁶Joshua in lah a teipi likna khut Aite tengteng a hihman keuhkeuh masiah a kaikik kei hi.

²⁷TOUPA’N Joshua thu a piak a, hihdia a chih bangbang in huai khopi a gante leh gallakte kia Israelte a tuamdin a tangta uhi.

²⁸Joshua in Ai khua a hala, tangtawn adin leivum in a bawl a, tunitan in loihsan ahita hi.

²⁹Ai khaw kumpipa nitak tan in sing dawn ah a khai a; nitum kuan in Joshua in thu a pia a, huchi in a luang singdawn apan a lakhia ua, khopi kulh kongpi lutna ah a pai ua, a tung ah suang a vum ua, tunitan in a omlai hi.

³⁰Joshua in Ebal tang ah TOUPA, Israel Pathian adin maitam a doh hi.

³¹Mosi dan laibu a gelhsa bang in, TOUPA sikha Mosi in Israel suante a na piaksa bang in, seklouh suangte, kuamah in sik a a sekngei nai hetlouhte in maitam a bawl hi. Huai ah TOUPA adin haltum thillatte a lan a, lemna thillatte leng a lan uhi.

³²Huai ah Israel mite muh mah in Mosi dan gelhsa huai suangte tung ah a teisawn hi.

³³Israel tengteng, gamdang mi hi in, tualsung mi hita leh avekpi un, a upate uh, a makaite uh leh vaihawmmite toh TOUPA thukhun bawm sik tuak ah ading uhi. Amau huai bawm zawng Levi siampute mai ah huai bang in ading uhi. Amau kikim khen in, a kimkhat Gerizim tang mazawn ah ading ua, a kimkhat dang Ebal tang mazawn ah ading uhi. TOUPA sikha Mosi in Israelte vualzawl dia thu a hilhlai in, hiai bang a hih din thu a na pekhinta hi.

³⁴Huaikhit in Joshua in danthu teng, vualzawlna thu leh hamse thu tengteng a sim a, dan laibu a kigelh tengteng bang in a simkhia hi.

³⁵Mosi thupiak tengteng Israel omkhawm tengteng leh numeite leh naupang neu chikte leh a lak ua namdang omte ma ah Joshua in simlouh himhim a neikei hi.